កាលពីដើមខែ realme បានប្រកាសចេញស្មាតហ្វូនជំនាន់ថ្មី realme 11 Series នៅទីផ្សារប្រទេសចិន។ ជាមួយគ្នានេះ realme ក៏បានបញ្ជាក់ដែរថា ម៉ូដែល realme 11 Pro Series នឹងត្រូវប្រកាសចេញនៅទីផ្សារប្រទេសឥណ្ឌានៅក្នុងខែមិថុនា។ ដោយនៅថ្ងៃនេះនៅលើគេហទំព័រផ្លូវការណ៍របស់ realme នៅប្រទេសឥណ្ឌា និងគេហទំព័របណ្តាញលក់រាយ Flipkart ក៏បានដាក់បង្ហាញ realme 11 Pro Series ផងដែរ។ បើយោងទៅលើព័ត៌មានច្បាស់ការណ៍ realme 11 Pro Series នឹងត្រូវប្រកាសចេញលក់នៅទីផ្សារប្រទេសឥណ្ឌានាថ្ងៃទី 08 ខែមិថុនា ខាងមុខនេះ។
Realme 11 Pro Series ដែលត្រៀមបង្ហាញវត្តមានក្នុងទីផ្សារប្រទេសឥណ្ឌានៅថ្ងៃទី 08 ខែមិថុនា ខាងមុខនេះរួមមាន realme 11 Pro និង realme 11 Pro+។ ហើយក្រៅពីស្មាតហ្វូនទាំងពីរនេះ realme ក៏នឹងបង្ហាញវត្តមានកាស realme Buds 5 Pro TWS ផងដែរ។ realme 11 Pro នឹងមានជម្រើសបីផ្សេងៗគ្នាក្នុងនោះមានជម្រើសបំពាក់រ៉េមទំហំ 8GB ជាមួយម៉េមូរី 128GB, 8GB ជាមួយម៉េមូរី 256GB និង 12GB ជាមួយម៉េមូរី 256GB ចំនែកម៉ូដែល realme 11 Pro+ នឹងមានជម្រើសពីរផ្សេងគ្នា គឺជម្រើស 8GB ជាមួយម៉េមូរី 256GB និង 12GB ជាមួយម៉េមូរី 256GB។ ស្មាតហ្វូនជំនាន់ថ្មីនេះក៏នឹងមានជម្រើសពណ៌ខ្មៅ Astral Black, ពណ៌ផ្កាឈូក Sunrise Beige និងបៃតង Oasis Green។
Realme 11 Pro និង realme 11 Pro+ គឺមានអេក្រង់ទំហំ 6.7 អ៊ីងជាប្រភេទ AMOLED Display 120Hz និងគាំទ្រកម្រិតបង្ហាញ FHD+។ សម្រាប់បន្ទះឈីបវិញ គឺនឹងប្រើ MediaTek Dimensity 7050។ នៅលើម៉ូដែល realme 11 Pro នឹងបំពាក់សែនស័រកាមេរ៉ាទំហំ 100MP និង 2MP រួមនឹងសែនស័រសែលហ្វីទំហំ 16MP។ ចំនែកឯ realme 11 Pro+ នឹងមានកាមេរ៉ាសែលហ្វីទំហំ 32MP ហើយនិងមានប្រព័ន្ធកាមេរ៉ាក្រោយដែលប្រើសែនស័រទំហំ 200MM ជាមួយ OIS + 8MP Ultrawide + 2MP Macro Sensor៕
