កាលពីម្សិលមិញនេះ ស្មាតហ្វូនបត់បានជំនាន់ថ្មី Xiaomi MIX Fold 2 បានបង្ហាញខ្លួនជាផ្លូវការនៅក្នុងប្រទេសចិនហើយ។ ក្រុមហ៊ុននេះ ក៏មានការប្រកាសចេញនូវផលិតផលជាច្រើនទៀតផងដែរ ក្នុងរួមមានស្មាតហ្វូន Redmi K50 Extreme Edition, Pad 5 Pro 12.4, Watch S1 Pro និងកាសស្តាប់ Buds 4 Pro ជាដើម។ អ្វីដែលលេចធ្លោជាងគេ គឺ Mix Fold 2 ដោយសារតែនេះ គឺជាស្មាតហ្វូនដែលមានអេក្រង់បត់បានជំនាន់ទី 2 របស់ក្រុមហ៊ុននេះ ហើយស្មាតហ្វូនបត់បានថ្មីនេះ ត្រូវបានក្រុមហ៊ុនដាក់គោលដៅនៅក្នុងការប្រកួតប្រជែងជាមួយនឹងស្មាតហ្វូន Galaxy Z Fold 4, OPPO Find N, Vivo Fold X និងម៉ូឌែលជាច្រើនទៀតនៅលើទីផ្សារផងដែរ។
ស្មាតហ្វូនXiaomi MIX Fold 2 មានលក្ខណៈជាច្រើនដែលខុសប្លែកពីម៉ូដែលជំនាន់មុន។ ស្មាតហ្វូននេះប្រើប្រាស់នូវប្រព័ន្ធ កាមេរ៉ារបស់ Leica ដែលប្រើប្រាស់ម៉ូឌុលកាមេរ៉ា Sony IMX766 ទំហំ 50MP និង 13MP ultra-wide-angle ហើយនិង គ្រាប់ទីបីមាន 8MP Telephoto ជាមួយនឹងសមត្ថភាពហ៊្សូមបាន 2x zoom។ ស្មាតហ្វូននេះអាចថតវីដេអូកម្រិត 8K និងទ្រទ្រង់នូវ Dolby Vision HDR format ផងដែរ។ ស្មាតហ្វូនដែលអាចបត់បាននេះមានប៊ូតុង Volume និង power នៅខាងស្តាំ។
ស្មាតហ្វូនXiaomi MIX Fold 2 នេះមានកម្រាស់ 5.4mm ហើយនៅពេលដែលវាបត់ វាមានកម្រាស់ 11.2mm ។ ស្មាតហ្វូននេះមានទម្ងន់ប្រហែលជា 262g ។ អេក្រង់ខាងក្រៅរបស់ស្មាតហ្វូន Xiaomi MIX Fold 2 នេះមានទំហំ 6.5-inch Samsung E5 AMOLED ជាមួយនឹងកម្រិតភាពច្បាស់ FHD+ និង 120Hz refresh rate ។ ស្មាតហ្វូននេះការពារដោយកញ្ចក់ Corning Gorilla Glass Victus ថែមទៀត។ សម្រាប់អេក្រង់ខាងក្នុងរបស់ស្មាតហ្វូននេះមានទំហំ 8.2-inches ជាមួយនឹងកម្រិតភាពច្បាស់ 2.5K និង 120Hz refresh rate ។ អេក្រង់ខាងក្នុង និងខាងក្រៅនេះទ្រទ្រង់នូវ Dolby Vision, 1,000 nits និង TrueColour។
ស្មាតហ្វូន Xiaomi MIX Fold 2 នឹងមានបន្ទះឈីប Snapdragon 8+ Gen 1 processor រ៉េមទំហំ 12GB និងម៉េមូរីទំហំ 1TB Storage ។ ស្មាតហ្វូនដែលអាចបត់បាននេះមានថាមពលថ្មទំហំ 4,500mAh និងទ្រទ្រង់នូវបច្ចេកវិទ្យា 67W fast charging ។ ស្មាតហ្វូននេះប្រើប្រាស់នូវ MIUI 13 ជាមួយនឹងប្រព័ន្ធប្រតិបត្តិការ Android 12 ។
ស្មាតហ្វូន Xiaomi MIX Fold 2 នេះមានពណ៌ខ្មៅ និងពណ៌មាស និងមានតម្លៃ Yuan 8,999 (~$1,335) សម្រាប់ទំហំ 256GB។ សម្រាប់ទំហំ 512GB និង 1TB គឺមានតម្លៃ Yuan 9,999 (~$1,483) និងYuan 11,999 (~$1,780)។ ស្មាតហ្វូននេះអាចធ្វើការកក់ទិញបានចាប់ពីថ្ងៃនេះ ហើយការលក់គឺចាប់ពីថ្ងៃទី 16 ខែសីហានេះ៕