នៅពេលនេះ Huawei ដែលជាក្រុមហ៊ុនបច្ចេកវិទ្យាយក្សរបស់ចិន ត្រូវបានគេបញ្ជាក់ថា បាននឹងកំពុងតែធ្វើការនៅលើស្មាតហ្វូនថ្មីទៀតហើយ បើទោះបីជាទីផ្សារស្មាតហ្វូនរបស់ខ្លួននៅមិនទាន់ល្អក៏ដោយ។ មកដល់ពេលនេះ ក្រុមហ៊ុននេះ ក៏នៅមិនមានលទ្ធភាពក្នុងការប្រកួតប្រជែងពេញលេញនៅលើទីផ្សារស្មាតហ្វូនផងដែរ។ ទីផ្សារស្មាតហ្វូនរបស់ Huawei ពេលនេះគឺ ត្រឹមតែរស់រានមានជីវិត និងមានម៉ាកយីហោនៅលើទីផ្សារប៉ុណ្ណោះ។
កាលពីសប្តាហ៍មុននេះ ស្មាតហ្វូនចំនួន 3 ម៉ូឌែលនោះគឺ Huawei Mate 50 series (BNE-AL00, DCO-AL00, CET-AL00) ហើយវាក៏ទទួលបាននូវការអនុម័តចេញពី ក្រសួងឧស្សាហកម្ម និងបច្ចេកវិទ្យាព័ត៌មានផងដែរ។ តាមការបញ្ជាក់នៅក្នុងរបាយការណ៍ជាច្រើននោះ ស្មាតហ្វូនទាំងនេះ គឺជាម៉ូឌែល Huawei Mate 50, Huawei Mate 50 Pro និង Huawei Mate 50 RS។ សម្រាប់ព័ត៌មានលម្អិតរបស់ស្មាតហ្វូននេះនៅមិនទាន់បញ្ជាក់នៅឡើយទេ។ ពេលនេះ ស្មាតហ្វូន Huawei Mate 50 ក៏ឆ្លងកាត់នូវវិញ្ញាបនបត្រ 3C របស់ចិនផងដែរ។
ស្មាតហ្វូននេះមានលេខម៉ូឌែល DCO-AL00 ហើយវាទ្រទ្រង់នូវបច្ចេកវិទ្យា 66W wired charging ។ បន្ថែមពីនេះទៀតនោះផលិតផល Huawei មួយទៀតក៏ទទួលបាននូវវិញ្ញាបនបត្រ 3C ផងដែរ។ វាប្រហែលជា Huawei MateBook E។ នៅក្នុងបញ្ជីរបស់ 3C នេះ ឧបករណ៍ទាំង 3 នេះគឺទ្រទ្រង់នូវស្តង់ដារ TD-LTE / LTE FDD / WCDMA / CDMA 1X / GSM ។ បន្ថែមពីនេះទៀតនោះ វាក៏ទ្រទ្រង់នូវ dual-card dual-standby ហើយវាក៏ប្រើប្រាស់នូវប្រព័ន្ធប្រតិបត្តិការ HarmonyOS របស់ក្រុមហ៊ុន Huawei ថែមទៀត។ នេះមានន័យថា មិនមានផលិតផលណាមួយរបស់ម៉ូឌែលទាំង 3 នេះទ្រទ្រង់នូវ 5G នោះទេ។
រហូតមកដល់ពេលនេះ នៅមិនទាន់មានការបង្ហាញនូវកាលបរិច្ឆេទផ្លូវការនៃការប្រកាសបង្ហាញវត្តមានរបស់ស្មាតហ្វូន Huawei Flagship Series នោះទេ ស្របពេលដែលព័ត៌មាននៃការបែកធ្លាយជាច្រើនរបស់ស្មាតហ្វូន Huawei Mate 50 Series ផងដែរ។ បើតាមការទម្លាយចេញពី @wangzaibaishitong បានបញ្ជាក់ថា ក្រុមហ៊ុន Huawei នឹងរៀបចំនូវព្រឹត្តិការណ៍សម្ភោធន៍មួយនៅថ្ងៃទី 7 ខែកញ្ញាខាងមុខនេះ ដើម្បីបង្ហាញនូវស្មាតហ្វូន Mate 50 series ។ ក្រុមហ៊ុននេះ អាចនឹងប្រកាសចេញនូវវត្តមានរបស់ស្មាតហ្វូន Huawei Mate 50e, Mate 50, Mate 50 Pro និង Mate 50 RS ៕
