យោងទៅលើរបាយការណ៍ស្រាវជ្រាវទីផ្សាររបស់ស្ថាប័ន Canalys បានឲ្យដឹងថា ទីផ្សាររថយន្តអគ្គិសនីនៅទូទាំងទីផ្សារសកលសម្រាប់ឆមាសដំបូងក្នុងឆ្នាំ 2022 នេះមានការកើនឡើងរហូតដល់ទៅ 63% ហើយអ្វីដែលគួរឲ្យចាប់អារម្មណ៍បំផុតនោះ គឺរថយន្តអគ្គិសនីដែលផលិតដោយក្រុមហ៊ុនចិនមានចំនែកទីផ្សារលក់សរុបរហូតដល់ទៅ 57% នៅលើទីផ្សារទូទាំងសកលលោក។
បើតាមស្ថិតិបានបង្ហាញថា នៅក្នុងឆមាសដំបូងប្រជាជនបានទិញរថយន្តអគ្គិសនីចំនួន 2.4 លានគ្រឿង មានចំនែកទីផ្សារលក់សរុបប្រមាណ 26% នៅក្នុងប្រទេសនេះ ហើយបើធៀបនឹងឆមាសដូចគ្នាកាលពីឆ្នាំ 2021 ឃើញថាមានអត្រាកើនឡើងប្រមាណ 10%។ សម្រាប់ទីផ្សារអឺរ៉ុបវិញការនាំចេញរថយន្តអគ្គិសនីគឺមានចំនួន 1.1 លានគ្រឿង និងមានចំនែកការលក់ 20% កើនឡើង 16% ធៀបនឹងឆមាសទីមួយក្នុងឆ្នាំ 2022។ ដោយឡែកនៅទីផ្សារសហរដ្ឋអាមេរិកវិញមានចំនួនលក់ចេញបាន 414,000 គ្រឿង ដែលបង្ហាញថាមានចំនែកទីផ្សារកំណើនកើនឡើងពី 3% ទៅ 6% ក្នុងមួយឆ្នាំ។
តាមការបង្ហាញក្នុងរបាយការណ៍ Canalys ឃើញថា ទីផ្សាររថយន្ត EV របស់ប្រទេសចិន គឺជាទីផ្សារដែលរីកលូតលាស់លឿនបំផុត ដែលបង្ហាញពីសញ្ញានៃការងើបឡើងវិញបន្ទាប់ពីបញ្ហាខ្សែសង្វាក់ផ្គត់ផ្គង់។ BYD គឺជាក្រុមហ៊ុនផលិតរថយន្ត EV ដ៏ធំបំផុតនៅក្នុងប្រទេសចិន ហើយរថយន្តចំនួន 6 ក្នុងចំណោមរថយន្តដែលលក់ដាច់បំផុតទាំង 10 ត្រូវបានផលិតដោយក្រុមហ៊ុនមួយនេះ។ ហើយនៅទីផ្សារអ៊ឺរ៉ុបវិញ ត្រូវបានគេមើលឃើញពីសញ្ញានៃការថមថយមួយចំនួន ដោយសារការលក់រថយន្តដឹកអ្នកដំណើរសរុបបានធ្លាក់ចុះ ហើយរថយន្តប្រភេទ PHEVs មិនសូវមានប្រជាប្រិយភាពខ្លាំងទេនៅឆ្នាំនេះ បើធៀបនឹងឆ្នាំ 2021។
ក្រុមហ៊ុន Tesla ត្រូវបានគេមើលឃើញថា ជាក្រុមហ៊ុនផលិតរថយន្តអគ្គិសនីដែលកំពុងនាំមុខទីផ្សារនៅអឺរ៉ុបជាមួយនឹងម៉ូដែលពីររបស់ខ្លួននៅលើតារាងលក់ដាច់បំផុតក្នុងនោះមាន Model Y បានឈរនៅចំណាត់ថ្នាក់ទី 1 ក្នុងតារាងលក់ ហើយតាមពីក្រោយដោយ Model 3 ។ ក្រុមហ៊ុនផលិតរថយន្ត Tesla បាននាំមុខទីផ្សាររថយន្តអគ្គិសនីនៅសហរដ្ឋអាមេរិកដោយកាន់កាប់ចំនែកទីផ្សារសរុប 60%។ បើតាមការស្រាវជ្រាវ តម្រូវការទីផ្សាររថយន្តអគ្គិសនីរបស់ Tesla អាចនឹងមានតម្រូវការខ្ពស់ជាងនេះប្រសិនបើក្រុមហ៊ុនអាមេរិកនេះបានបញ្ចេញម៉ូដែលថ្មី។
ក្នុងរបាយការណ៍បញ្ជាក់ថា ការកើនឡើងតម្លៃប្រេងឥន្ធនៈ និងការលើកទឹកចិត្តរបស់រដ្ឋាភិបាលអាមេរិក គឺជាកត្តាជំរុញចម្បងសម្រាប់ការកើនឡើងនៃចំនួនការលក់រថយន្ត EV ប៉ុន្តែការផ្គត់ផ្គង់នៅតែមានកម្រិត ហើយប្រជាជនរង់ចាំអស់ជាច្រើនខែសម្រាប់រថយន្តដែលបានបញ្ជាទិញរបស់ពួកគេមកដល់។ អ្នកវិភាគមានការព្រួយបារម្ភថា អនាគតសេដ្ឋកិច្ចមិនច្បាស់លាស់ (អតិផរណាសកល) អាចជាបញ្ហាបង្កឲ្យមានផលប៉ះពាល់ដល់ទីផ្សារ EV ជាអវិជ្ជមាននៅឆ្នាំក្រោយនេះ៕