ក្រុមហ៊ុនជួលរថយន្តខ្នាតយក្ស Hertz បានប្រកាសថា ខ្លួនបាននឹងកំពុងពង្រីកសេវាកម្មជួលរថយន្តថ្មីរបស់ខ្លួនជាមួយការប្រើប្រាស់រថយន្តអគ្គិសនី។ ក្រុមហ៊ុននេះ បានយល់ព្រមក្នុងការទិញរថយន្តអគ្គិសនីពីក្រុមហ៊ុន GM ចំនួន 175,000 គ្រឿងសម្រាប់រយះពេល 5 ឆ្នាំទៅមុខទៀត។
នៅក្នុងចំនោមរថយន្តទាំងអស់ដែលក្រុមហ៊ុន Hertz ព្រមព្រៀងទិញពី GM នឹងមានចាប់ពីម៉ូដែល Chevrolet, Buick, GMC, Cadillac, និង BrightDrop ហើយការនាំចេញទំនងជានឹងចាប់ផ្តើមធ្វើឡើងនៅត្រីមាសដំបូងក្នុងឆ្នាំ 2023 រួមជាមួយរថយន្តម៉ូដែល Bolt EV និង Bolt EUV រហូតដល់ឆ្នាំ 2027។ នេះវាមិនមែនត្រឹមតែជាការពង្រីកសេវាកម្មជូលរថយន្តរបស់ក្រុមហ៊ុន Hertz ប៉ុណ្ណោះទេ ប៉ុន្តែវាក៏ជាការពង្រីកទីផ្សាររថយន្តអគ្គិសនី សម្រាប់ការបើកបរនៅលើដងវិថីផងដែរ ដោយក្រុមហ៊ុន Hertz នឹងផ្តល់ជូនរថយន្តចាប់ពីរថយន្តខ្នាតតូច ខ្នាតមធ្យម SUV រថយន្ត Pickup និងរថយន្តប្រភេទ Luxury ថែមទៀតផង។ Hertz បានប៉ាន់ប្រមាណថា ក្នុងរយៈពេល 5 ឆ្នាំខាងមុខ អតិថិជនរបស់ខ្លួននឹងធ្វើដំណើរជាង 8 ពាន់លានម៉ាយជាមួយរថយន្ត EV ទាំងនេះ។
នាយកប្រតិបត្តិក្រុមហ៊ុន GM លោក Mary Barra បាននិយាយថា "ជាមួយនឹងជម្រើសយានយន្ត បច្ចេកវិទ្យា និងរយះចំងាយបើកបរដែលយើងកំពុងផ្តល់ជូន ខ្ញុំមានទំនុកចិត្តថា បទពិសោធន៍ជួលរថយន្តនីមួយៗនឹងបង្កើនការពិចារណាលើការទិញសម្រាប់ផលិតផលរថយន្តអគ្គិសនីរបស់យើង និងជំរុញកំណើនការលក់សម្រាប់ក្រុមហ៊ុនរបស់យើងបន្ថែមទៀត" ។ ក្រុមហ៊ុន Hertz ចង់បង្កើតពង្រីកការជួលរថយន្តឲ្យធំបំផុតសម្រាប់រថយន្ត EVs នៅអាមេរិកខាងជើង។ ក្រុមហ៊ុននេះមានរថយន្តអគ្គិសនី (EV) រាប់ម៉ឺនគ្រឿងសម្រាប់ជួល និងមានទីតាំងសម្រាប់ជូល 500 ទីតាំងនៅទូទាំង 38 រដ្ឋ។ គោលដៅរបស់ក្រុមហ៊ុន Hertz គឺផ្តល់ជូនអតិថិជនសម្រាប់ការជូលរថយន្តអគ្គិសនីដល់ទៅ 25% ត្រឹមចុងឆ្នាំ 2024៕
