ក្រុមហ៊ុន realme ត្រៀមខ្លួនក្នុងការប្រកាសចេញនូវស្មាតហ្វូនម៉ូដែលថ្មី GT Neo 4 នៅខែក្រោយនេះហើយនេះបើយោងតាមពាក្យចចាមអារ៉ាមជាច្រើនដែលដកស្រង់ចេញពីប្រទេសចិន។ ស្មាតហ្វូនជំនាន់ថ្មីនេះ គឺនឹងមានការប្រើប្រាស់នូវបន្ទះឈីប ជំនាន់ថ្មីរបស់ក្រុមហ៊ុន Qualcomm គឺម៉ូដែល Snapdragon 8+ Gen 1។
ទាក់ទងទៅនឹងស្មាតហ្វូនខាងលើនេះ អ្នកទម្លាយ Digital Chat Station ដែលជាប្រភពជឿជាក់បាននោះ បានសសេរថា ស្មាតហ្វូននេះនឹងមានការបំពាក់មកជាមួយនូវអេក្រង់ដែលមានកម្រិតបង្ហាញចេញ 1.5K ហើយអេក្រង់នេះក៏មានសមត្ថភាពអាចរត់បានជាមួយននូវល្បឿន 120Hz refresh rate និង 2160-step PWM ផងដែរ។
ជាមួយគ្នានេះ ក៏មានការបញ្ជាក់ថា ស្មាតហ្វូន realme GT Neo 4 នឹងមានបច្ចេកវិទ្យាសាកថ្មលឿន 100W Flash Charging ថែមទៀត។ អ្នកទម្លាយរូបនេះ បានបញ្ជាក់ថា សម្រាប់វត្តមានរបស់ស្មាតហ្វូននេះ គឺនឹងក្លាយជាគូរប្រកួតប្រជែងជាមួយនឹងវត្តមានស្មាតហ្វូន Redmi K60 ដែលនឹងវត្តមាននៅក្នុងខែនេះដែរ។ អ្វីដែលយើងនៅមិនទាន់ច្បាស់នោះ គឺថា យើងនៅមិនទាន់ទទួលបាននូវការបញ្ជាក់ជាផ្លូវការចេញពីក្រុមហ៊ុន realme នៅឡើយទេអំពីស្មាតហ្វូនថ្មីនេះ៕