កំពូលស្មាតហ្វូនជំនាន់ថ្មីរបស់ក្រុមហ៊ុន vivo ស្ថិតក្នុងស្រឡាយ X-Series គឺ vivo X90 Series ទំនងជានឹងបង្ហាញវត្តមានផ្លូវការណ៍នាអំឡុងខែធ្នូ ចុងឆ្នាំ 2022 នេះ។ បងប្អូនកំពូលស្មាតហ្វូនជំនាន់សែស្រឡាយ X90 Series នឹងមានដូចជា vivo X90, vivo X90 Pro និង vivo X90 Pro+ ហើយក្នុងចំនោមបងប្អូនទាំង 3 នាក់នេះ បងធំ X90 Pro+ ត្រូវបានគេដឹងថា នឹងបំពាក់នូវកំពូលឈីបជំនាន់ថ្មី Snapdragon 8 Gen 2 របស់ Qualcomm។
ដោយឡែកក្នុងពេលនេះបើតាមគណនីតម្លាយព័ត៌មានចចាមអារ៉ាមល្បីឈ្មោះរបស់ប្រទេសចិន គឺ Digital Chat Station បានបង្ហើបពីទំហំថ្មដែលនឹងមាននៅលើបងប្អូនគ្រួសារ vivo X90 Series។ ដែលក្នុងនោះបើតាមប្រភព DCS បានបង្ហាញថា បងប្អូនទាំងបីនាក់ក្នុងគ្រួសារ vivo X90 Series នឹងមានបំពាក់មកជាមួយថ្មចំនួនពីរកូន ឬ Dual-Cell ដូចៗគ្នាព្រមទាំងគាំទ្របច្ចេកវិទ្យាសាកភ្លើងល្បឿនលឿនបំផុតដែលមិនបង្ករឲ្យឡើងកំដៅថ្មរបស់ទូរស័ព្ទថែមទៀតផង។
ប្រភពដដែលខាងលើនេះបានបញ្ជាក់ថា សម្រាប់ម៉ូដែល vivo X90 ដែលជាប្អូនពៅនឹងបំពាក់ដោយថ្មទំហំ 4,700mAh, បងធំបន្ទាប់ពីប្អូនពៅ vivo X90 Pro នឹងមានថ្មទំហំ 4,870mAh រីឯបងធំបង្អស់ vivo X90 Pro+ នឹងមានថ្មទំហំ 5,000mAh។ ហើយថ្មីៗនេះក៏មានព័ត៌មានចចាមអារ៉ាមបាននិយាយថា vivo X90 Pro+ និងគាំទ្របច្ចេកវិទ្យាសាកភ្លើងល្បឿនលឿនដល់ 200W និងបំពាក់សែនស័រកាមេរ៉ាទំហំធំខ្នាត 1-inch ថែមទៀតផង៕