ម៉ាស៊ីនកុំព្យូទ័រ Desktop ខ្នាតតូចក្នុងស្រឡាយផលិតផល SFF PC ពីក្រុមហ៊ុន Asus ត្រូវបានប្រកាសចេញផ្លូវការណ៍ ដោយម៉ាស៊ីនប្រភេទនេះ ផលិតឡើងដោយផ្តោតសំខាន់ទៅលើការប្រើប្រាស់នៅសម្រាប់ក្រុមហ៊ុន វិស័យឧស្សាហកម្ម ការលក់រាយ និងផ្នែកហិរញ្ញវត្ថុជាដើម។ ចំពោះម៉ាស៊ីន Desktop ដែលទើបចេញមកថ្មីនេះត្រូវបាន Asus ដាក់ឈ្មោះហៅថា ExpertCenter D7 SFF PC ដែលត្រូវបានផលិតឡើងតាមគុណភាពស្តង់ដារ MIL-STD-810H compliant Steel Electrodeposition Cold Common ហៅកាត់ថា “SECC”។
បើតាមការបញ្ជាក់ពី Asus បានឲ្យដឹងថា ExpertCenter D7 SFF PC បានបំពាក់នូវ Mainboard ស៊េរី B660 របស់ក្រុមហ៊ុនផ្ទាល់។ ដោយនៅលើ Mainboard ត្រូវបានដំឡើងមកជាមួយ Intel Alder Lake processor CPU ដែលមានជម្រើសចាប់ពីស៊េរី Intel Celeron G900 ដល់ Intel-core i7-12700 និងអាចដាក់ទំហំរ៉េមបានដល់ 128GB នៅលើរន្ធប្រភេទ dual-channel DDR4-3200។ សម្រាប់អង្គក្រាហ្វិចវិញ គឺមានភ្ជាប់មកស្រាប់ជាមួយស៊េរី Intel UHD Graphics 770 ហើយ Asus ក៏ផ្តល់នូវជម្រើសដែលអាចធ្វើការបន្ថែមបានជាមួយ Nvidia GeForce GT730, GT1030 ឬ Nvidia T600 ផងដែរ។ សម្រាប់ជម្រើស ExpertCenter D7 SFF PC ដែលប្រើអង្គក្រាហ្វិច Nvidia T600 អាចឲ្យធ្វើការភ្ជាប់បំបែកទៅកាន់អេក្រង់ម៉ូនីទ័របានចំនួន 4 តាមរយះរន្ធ mini-DisplayPorts។
សម្រាប់រន្ធ I/O Port នៅលើ Asus ExpertCenter D7 SFF PC គឺមានដូចជារន្ធ USB ចំនួន 11 Ports, រន្ធ Smart Card reader, SD Card reader, parallel port និង Serial port ជាដើម។ បន្ថែមពីនេះវាក៏មាននូវ Optical Drive ផងដែរ។ ជានេះទៅទៀត D7 SFF ក៏ទទួលបានវិញ្ញាបនប័ត្របញ្ជាក់ទៅលើប្រព័ន្ធប្រើប្រាស់ភ្លើងកម្រិត 80 PLUS Platinum ឬ 80 PLUS Bronze PSU ថែមទៀតផង។ ចំពោះតម្លៃវិញ Asus ExpertCenter D7 SFF PC ត្រូវបានដាក់លក់នៅលើបណ្តាញលក់ទំនិញអនឡាញ Amazon ក្នុងតម្លៃខ្ទង់ចាប់ពី $879.99៕
