ស្មាតហ្វូនជំនាន់ថ្មីរបស់ Google ម៉ូដែល Pixel 7 និង 7 Pro ត្រូវបានគេមើលឃើញថា បានបង្ហាញវត្តមានជាផ្លូវការនៅលើទីផ្សាររួចរាល់ហើយកាលពីដើមខែនេះ។ នៅថ្ងៃនេះ មានដំណឹងថា ស្មាតហ្វូនជំនាន់ថ្មីរបស់ Google Pixel ចំនួនពីរម៉ូដែលថ្មីទៀត បាននឹងកំពុងតែស្ថិតនៅក្នុងដំណើរការ។ គួរបញ្ជាក់់ថា បើមើលទៅការលេចធ្លាយកន្លងមក គឺមានការបញ្ចេញនូវ Pixel Fold ហើយបន្ទាប់មកក៏មានបញ្ចេញព័ត៌មានថា Pixel 7a នឹងបង្ហាញខ្លួនជាផ្លូវការនៅក្នុងពេលឆាប់ៗនេះផងដែរ។
តាមរបាយការណ៌នៅពេលនេះ គឺបានបញ្ជាក់ថា ក្រុមហ៊ុនអាមេរិកាំងមួយនេះ គឺកំពុងតែធ្វើការនៅលើស្មាតហ្វូនថ្មីមួយទៀតហើយ ប៉ុន្តែមិនទាន់មានឈ្មោះច្បាស់នោះទេ។ ស្មាតហ្វូននេះ គឺស្ថិតនៅក្នុងត្រកូល Pixel 7 Series។ មានការទម្លាយថា ស្មាតហ្វូននេះ គឺមានឈ្មោះ G10។ ទាក់ទងជាមួយនិងព័ត៌មានថ្មីនេះ 91mobiles ដែលមាននការសហកាជាមួយលោក Kuba Wojciechowski បានបញ្ចេញនូវព័ត៌មានថ្មីថា ស្មាតហ្វូននេះ គឺមានឈ្មោះថា G10 និងមានការបញ្ជាក់បន្ថែមថា អេក្រង់ស្មាតហ្វូននេះ មានប្រវែង 155mm និងមានកំពស់ 71mm ហើយនិងអាចបង្ហាញចេញបាន 3120x1440 pixels resolution នៅក្នុងនោះក៏មានការនិយាយថា អេក្រង់ស្មាតហ្វូននេះ គឺមានទំហំ 6.7-អ៊ីង ដែលប៉ុនគ្នាជាមួយនិងអេក្រង់ Pixel 7 Pro ទៀតផង។
របាយការណ៌ខាងលើបន្តថា ការឌីស្សាញរបស់ស្មាតហ្វូន Pixel G10 គឺនឹងមានលក្ខណៈស្រដៀងគ្នាជាមួយនិង Pixel 7 Series។ សម្រាប់ស៊ុមជុំវិញ និងរន្ធ Punched Notch គឺមានការរៀបចំដូចគ្នា។ ស្មាតហ្វូននេះត្រូវបានគេនិយាយថា នឹងប្រើប្រាស់អេក្រង់របស់ក្រុមហ៊ុន BOE ដែលពេលនេះ ក្រុមហ៊ុនផលិតអេក្រង់របស់ចិនមួយនេះ ក៏ត្រូវបានជ្រើសរើសជាអ្នកផ្គត់ផ្គង់អេក្រង់សម្រាប់ iPhone ផងដែរ។ ស្មាតហ្វូននេះ គឺប្រើប្រាស់នូវសិនស័របច្ចេកវិទ្យាស្កែនម្រាមដៃលើអេក្រង់របស់ក្រុមហ៊ុន Qualcomm។