កាលពីថ្ងៃម្សិលមិញនេះក្រុមហ៊ុនផលិតឈីប Qualcomm បានដាក់សម្ភោធកំពូលឈីបនាគរាជជំនាន់ថ្មីចុងក្រោយរបស់ខ្លួន Snapdragon 8 Gen 2 ជាផ្លូវការណ៍។ ហើយព្រមជាមួយគ្នានេះដែរ ក៏មានក្រុមហ៊ុនផលិតស្មាតហ្វូន Android ជាច្រើនបានប្រកាសចេញនឹងប្រើកំពូលឈីបនាគរាជជំនាន់ថ្មីនេះនៅលើផលិតផលស្មាតហ្វូនជំនាន់ថ្មីរបស់ខ្លួន ហើយក្នុងនោះក៏មានក្រុមហ៊ុនបច្ចេកវិទ្យាខ្នាតយក្សលំដាប់ពិភពលោករបស់កូរ៉េខាងត្បូង Samsung Electronics ផងដែរ។
ដូចដែលយើងបានដឹងរួចហើយថា Samsung តែងតែបញ្ចេញកំពូលស្មាតហ្វូនត្រកូល Galaxy S-Series របស់ខ្លួនជាមួយជម្រើសម៉ាស៊ីនពីរផ្សេងៗតម្រូវតាមទីផ្សារក្នុងតំបន់មួយចំនួនដែលមានជម្រើសម៉ាស៊ីនប្រើឈីប Snapdragon Series របស់ Qualcomm និងជម្រើសប្រើឈីប Exynos Series ដែលជាឈីបផលិតដោយក្រុមហ៊ុន Samsung ខ្លួនឯងផ្ទាល់។ ហើយសម្រាប់កំពូលស្មាតហ្វូនជំនាន់ថ្មី Galaxy S23 Series ដែលចេញនៅដើមឆ្នាំ 2023 ក៏ដូចគ្នាជំនាន់មុនៗដែលគឺមានជម្រើសម៉ូដែលប្រើឈីប Snapdragon និង Exynos។
ហើយនៅថ្ងៃនេះដែរនៅលើគណនីទម្លាយព័ត៌មានល្បីឈ្មោះ Ice Universe បានធ្វើការចែករំលែកមានសមត្ថភាពកំលាំងម៉ាស៊ីនរបស់កំពូលស្មាតហ្វូន Galaxy S23 Ultra ដែលបំពាក់ឈីបជំនាន់ថ្មី Snapdragon 8 Gen 2 ដែលធ្វើតេស្តដោយកម្មវិធី Geekbench 5។ នៅលើបញ្ចីកម្មវិធី Geekbench 5 បង្ហាញឲ្យដឹងថា Samsung Galaxy S23 Ultra គឺមានលេខកូដសំគាល់ម៉ូដែលថា SM-S918B ហើយបើផ្អែកទៅលើពិន្ទុដែលបានបង្ហាញនៅលើ Geekbench 5 គឺទទួលបានចំនួន 1,504 ពិន្ទុនៅលើ Single-Core CPU និង 4,580 ពិន្ទុនៅលើ Multi-core CPU។ នៅលើទិន្នន័យតេស្តក៏បានបង្ហាញដែរថា សម្រាប់ម៉ាស៊ីន Galaxy S23 Ultra គឺមានបំពាក់រ៉េមទំហំ 8GB ជាមួយការដំណើរការដោយ Android 13។
សម្រាប់កំពូលឈីបជំនាន់ថ្មី Snapdragon 8 Gen 2 គឺបានបំពាក់មកជាមួយ Prime-core CPU ជំនាន់ថ្មីស៊េរី Cortex-X3 Kryo ដែលមានល្បឿន 3.36GHz ខ្ពស់ជាងជំនាន់ 8+ Gen 1 ដែលមានល្បឿន 3.2GHz។ យ៉ាងណាមិញនៅមុនការបង្ហាញរបស់ Ice Universe ក៏មានប្រភពផ្សេងទៀតបានធ្វើការចែករំលែកពីសមត្ថភាពម៉ាស៊ីនរបស់ Galaxy S23 Ultra តាមរយះការធ្វើតេស្តនៅលើកម្មវិធី Geekbench 5 ដូចគ្នាផងដែរ ប៉ុន្តែកាលនោះ គឺទទួលបានពិន្ទុដល់ 1,530 នៅលើ Single-core CPU និង 4,779 ពិន្ទុ នៅលើ Multi-core CPU៕
