បច្ចេកវិទ្យាស្តង់ដាបន្ទះឈីបថ្មីទំហំ 3nm បាននឹងកំពុងចាប់ផ្តើមដំណើរការផលិតហើយ។ ក្នុងនោះមានក្រុមហ៊ុនផលិតឈីបដូចជា Samsung និង TSMC បានចាប់ផ្តើមដំណើរការសង្វាក់ផលិតកម្មបន្ទះឈីបដែលអភិវឌ្ឍន៍ជាមួយស្តង់ដារថ្មីនេះ។ បើតាមប្រភពព័ត៌មានបាននិយាយថា TSMC នឹងចាប់ផ្តើមការនាំចេញបន្ទះឈីបស្តង់ដារថ្មីទំហំ 3nm របស់ខ្លួនទៅកាន់ក្រុមហ៊ុន Apple ដើម្បីប្រើបំពាក់នៅលើ iPhone 15 Series ដែលចេញនៅឆ្នាំក្រោយនេះ(2023)។ ប្រភពបានបញ្ជាក់បន្ថែមថា បន្ទះឈីបស្តង់ដារថ្មីទំហំ 3nm នឹងផ្តល់នូវអនុភាពប្រើការខ្លាំងជាងមុន និងមានប្រសិទ្ធិភាពខ្ពស់ជាងមុន ហើយតម្លៃរបស់ឈីបថ្មីនេះ ក៏ថ្លៃជាងមុនផងដែរ។ បើតាមការបង្ហើបពី TSMC តម្លៃរបស់ឈីបទំហំ 3mm នឹងស្មើរពីរដងនៃតម្លៃរបស់ឈីបទំហំ 7nm។
ចំពោះបន្ទះឈីប iPhone ជំនាន់ថ្មី A17 Bionic ដែលចេញនៅត្រីមាសទី 3 ឆ្នាំ 2023, Apple នឹងប្រើនូវស្តង់ដារថ្មីទំហំ 3nm របស់ក្រុមហ៊ុន TSMC ដែលជាក្រុមហ៊ុនឈានមុខគេទៅលើការអភិវឌ្ឍន៍បច្ចេកវិទ្យាផលិតបន្ទះឈីបស្មាតហ្វូនជាមួយការប្រើប្រាស់នូវប្រព័ន្ធ State-of-the art process node។ ទាំងក្រុមហ៊ុន TSMC និង Samsung ត្រូវបានគេរាយការណ៍ថា នឹងចាប់ផ្តើមសង្វាក់ផលិតកម្មបន្ទះឈីបស្តង់ដារថ្មីទំហំ 2nm នៅឆ្នាំ 2025 និងខ្នាត 1nm នៅឆ្នាំ 2030។ បើតាមរបាយការណ៍ក្រុមហ៊ុន TSMC គ្រោងបង្កើនតម្លៃច្រើនជាង 2 ម៉ឺនដុល្លារសម្រាប់ឈីប 3nm/wafer ដែលកើនឡើងដល់ទៅ 60% ធៀបនឹងឈីបស្តង់ដារ 7nm ដែលមានតម្លៃ 1 ម៉ឺនដុល្លារ/wafer រីឯតម្លៃរបស់ឈីបខ្នាត 5nm មានតម្លៃខ្ទង់ 1 ម៉ឺន 6 ពាន់ដុល្លារ/wafer។
ផ្អែកទៅលើកត្តាតម្លៃរបស់ឈីបស្តង់ដារថ្មីទំហំ 3nm នៅលើឈីប A17 Bionic ឆ្នាំក្រោយនេះ អាចនឹងធ្វើឲ្យតម្លៃទូរស័ព្ទ iPhone 15 Series ដែលចេញនៅឆ្នាំ 2023 ក៏នឹងមានការកើនឡើងខ្ពស់ជាងការរំពឹងទុកផងដែរ។ បើតាមប្រភពរបាយការណ៍ និងព័ត៌មានបែកធ្លាយជាច្រើនបាននិយាយថា Apple នឹងប្រើបន្ទះឈីបជំនាន់ថ្មី 3nm A17 Bionic តែនៅលើម៉ូដែល iPhone 15 Pro និង iPhone 15 Pro Max/Ultra ប៉ុណ្ណោះ ដោយពីរម៉ូដែលផ្សេងទៀត គឺ iPhone 15 និង iPhone 15 Plus នឹងប្រើបន្ទះឈីប 4nm A16 Bionic ដែលប្រើនៅលើ iPhone 14 Pro និង iPhone 14 Pro Max បច្ចុប្បន្ន៕