ថ្មីៗនេះក្រុមហ៊ុន Honor ទើបតែប្រកាសចេញនូវស្មាតហ្វូនស៊េរីថ្មីរបស់ខ្លួនម៉ូដែល Honor 80 Series នៅក្នុងប្រទេសចិន ដែលស្មាតហ្វូននេះ គឺមាន 3 ម៉ូដែល គឺ Honor 80 SE, Honor 80 និង Honor 80 Pro។ យោងតាមព័ត៌មានថ្មីនៅថ្ងៃនេះ បាននិយាយថា ស្មាតហ្វូន Honor 80 Series នឹងមានម៉ូដែលថ្មីមួយទៀត Honor 80 GT ដែលគឹដឹងថា នឹងមានការបង្ហាញ វត្តមាននៅខែធ្នូខាងមុខនេះហើយ។
បើតាមអ្នកទម្លាយដែលប្រភពមកពីប្រទេសចិន TechGoing) នោះ គឺបានបញ្ជាក់ថា Honor 80 GT នឹងមានអេក្រង់រាបស្មើរ ខណៈដែល Honor 80, 80 SE និង 80 Pro សុទ្ធតែមានអេក្រង់ OLED ដែលមានគែមកោងទាំងអស់។ ស្មាតហ្វូន Honor 80 GT គឺមានការឌីស្សាញផ្តោតខ្លាំងទៅលើការលេងហ្គេម ហើយស្មាតហ្វូននេះ នឹងមានការបំពាក់មកជា មួយនូវបន្ទះឈីប Snapdragon 8 Plus Gen 1។ សម្រាប់លក្ខណៈសម្បត្តិផ្សេងៗទៀត គឺមិនទាន់មានការទម្លាយចេញ នោះទេ។
សូមជំរាបផងដែរថា បន្ទះឈីប Snapdragon 8 Plus Gen 1 នេះ ក៏ធ្លាប់បានប្រើប្រាស់នៅលើស្មាតហ្វូន Honor 80 Pro, ផងដែរ។ ស្មាតហ្វូននេះ មានអេក្រង់ទំហំ 6.78-អ៊ីង OLED មានរន្ធអេក្រង់ pill-shaped ហើយនិងមានគែមអេក្រង់កោង ថែមទៀតផង។ អេក្រង់នេះបង្ហាញចេញបានទំហំ 1224x2700pixels និងមានការប្រើប្រាស់នូវស្បែកកម្មវិធី Magic UI 7 ផ្អែកនៅលើប្រព័ន្ធ Android 12 ចេញពីប្រអប់តែម្តង។ ស្មាតហ្វូននេះ មានរ៉េមទំហំ 12GB និងមានអង្គចងចាំទំហំ 512GB។
Honor 80 Pro មានកាមេរ៉ាមុខភ្លោះទំហំ 50-Megapixel និងគ្រាប់ទីពីរមានទំហំ 2-Megapixel។ សម្រាប់កាមេរ៉ាក្រោយ គឺមានទំហំ 160-Megapixel និងគ្រាប់ទីពីរមានទំហំ 50-Megapixel ultra-wide និងមាមគ្រាប់ទីបីទំហំ 2-Megapixel depth។ ស្មាតហ្វូននេះមានទំហំ 4,800mAh និងមានកម្លាំងសាក 66W fast charging។ ស្មាតហ្វូន Honor 80 Pro មាន ប្រព័ន្ធស្កែនម្រាមដៃនៅលើអេក្រង់។