Samsung Galaxy z Flip 4 ត្រូវបានក្រុមហ៊ុនធ្វើការប្រកាសចេញជាសកលកាលអំឡុងខែសីហា ក្នុងឆ្នាំ 2022 នេះ។ ស្មាតហ្វូនអេក្រង់បត់ Clamshell ជំនាន់ចុងក្រោយចេញពីក្រុមហ៊ុនបច្ចេកវិទ្យាខ្នាតយក្សរបស់កូរ៉េខាងត្បូងមួយនេះមានការបង្កើនគុណភាពលើការឌីស្សាញរូបរាងកាន់តែមានភាពធន់រឹងមាំ និងបំពាក់បច្ចេកវិទ្យាប្រើប្រាស់កាន់តែទំនើបជាងជំនាន់ Z Flip 3។ ហើយទន្ទឹងនឹង Z Flip 4 កំពុងចរាចរណ៍លក់នៅលើទីផ្សារ ស្រាប់តែមានលេចលឺព័ត៌មានថ្មីនិយាយពីជំនាន់បន្ទាប់ដែលនឹងមកដល់នៅឆ្នាំ 2023 គឺ Galaxy Z Flip 5។
បើតាមដំណឹងលេចលឺក្នុងពេលថ្មីៗនេះបានបង្ហើបថា Samsung Galaxy Z Flip 5 នឹងមានការកែប្រែទម្រង់ឌីស្សាញថ្មីមួយចំនួនបន្ថែមពីលើជំនាន់ Z Flip 4 បច្ចុប្បន្ន ក្នុងនោះដូចជានឹងមានការបំពាក់អេក្រង់ខាងក្រោយ ឬ Cover-Display ធំជាងជំនាន់មុនជាដើម។ បើតាមការបញ្ជាក់ពីលោក Ross Young អ្នកវិភាគមកពីក្រុមហ៊ុន Display Supply Chain Consultant បានឲ្យដឹងថា អេក្រង់លើខ្នងខាងក្រោយ ឬ Cover-Display របស់ Galaxy Z Flip 5 នឹងមានទំហំធំឡើងដល់ 3 អ៊ីញ ធៀបនឹងទំហំ 1.9 អ៊ីញនៅលើ Z Flip 4 បច្ចុប្បន្ន។
ប្រសិនបើ Galaxy Z Flip ជំនាន់ថ្មីពិតជាបំពាក់អេក្រង់ខាងក្រោយទំហំធំដូចអ្វីដែលបានលេចលឺនេះមែន គឺនឹងធ្វើឲ្យស្មាតហ្វូនអេក្រង់ Clamshell របស់ Samsung កាន់តែទទួលបានប្រជាប្រិយភាពកាន់តែខ្លាំងសម្រាប់អ្នកប្រើប្រាស់ ព្រោះថា អ្នកប្រើទទួលបានភាពរីករាយក្នុងការប្រើប្រាស់អេក្រង់ខាងក្រៅរបស់ស្មាតហ្វូន Z Flip ជាមួយការបង្ហាញមាតិកាបានកាន់តែច្រើន និងកាន់តែធំច្បាស់ល្អសម្រាប់ការអានសារដំណឹង ក៏ដូចជាការប្រើប្រាស់មុខងារទូទៅប្រចាំថ្ងៃ។ ក្រៅតែពីដំណឹងពីការពង្រីកទំហំអេក្រង់ Cover Display ទៅ Galaxy Z Flip 5 ក៏នឹងមានការបង្កើនគុណភាពគន្លឹត្រចៀកបត់ថ្មីដើម្បីកាត់បន្ថយចន្លោះប្រហោងនៅពេលបត់ផងដែរ។ យ៉ាងណាមិញសម្រាប់គុណសម្បត្តិផ្សេងៗទៀតរបស់ Samsung Galaxy Z Flip 5 មិនទាន់ត្រូវបានគេបង្ហើបចេញនៅឡើយទេក្នុងពេលនេះ៕
