ក្រុមហ៊ុនផលិតស្មាតហ្វូន Infinix បានប្រកាសចេញស្មាតហ្វូនជំនាន់ថ្មីម៉ូដែល Infinix Zero 5G 2023 ក្នុងទីផ្សារសកល ដោយស្មាតហ្វូនជំនាន់ថ្មីនេះ គឺជាស្មាតហ្វូនដំបូងគេដែលបំពាក់ឈីប MediaTek Dimensity 1080។ ប៉ុន្តែ នៅថ្ងៃប្រកាសចេញនោះ Infinix មិនបានបញ្ជាក់ពីតម្លៃ ក៏ដូចជាថ្ងៃចេញលក់ស្មាតហ្វូនជំនាន់ថ្មីរបស់ខ្លួននោះទេ ទើបតែមកប្រកាសចេញនៅថ្ងៃនេះដោយក្រុមហ៊ុន Infinix ប្រចាំនៅទីក្រុងហុងកុងផ្ទាល់តែម្តងដោយមានតម្លៃខ្ទង់ $239 ជាជម្រើសពណ៌ខ្មៅ ស និងទឹកក្រូច។
Infinix Zero 5G 2023 បានបំពាក់មកនូវបន្ទះអេក្រង់ IPS LCD ទំហំ 6.78 អ៊ីញជាមួយលែនទម្លុះថ្ងាសមួយគ្រាប់ និងគាំទ្រកម្រិតបង្ហាញ Full-HD+ 1080x2400px ជាមួយល្បឿន refresh rate 120Hz ហើយនិង touch sampling rate 240Hz។ ហើយនៅត្រង់លែនទំលុះថ្ងាសអេក្រង់នេះ មានភ្ជាប់ដោយសែនស័រកាមេរ៉ាទំហំ 16MP។ ស្មាតហ្វូនជំនាន់ថ្មីនេះមានកាមេរ៉ាក្រោយចំនួន 3 គ្រាប់ភ្ជាប់មកនូវសែនស័រមេទំហំ 50MP និងទំហំ 2MP ជា Macro ហើយនិង Depth Sensor អមជាមួយអំពូល Quad-LED Flash។ ចំពោះមុខងារសម្រាប់កំនត់ការថតចេញពីកម្មវិធីកាមេរ៉ាមានច្រើនដូចជា Super Night Mode, Night Filter, 960s slow-motion video shooting, Sky Remap editing, និងមួយចំនួនទៀតតម្រូវតាមការប្រើប្រាស់។
ចំពោះកំលាំងម៉ាស៊ីនវិញ Infinix Zero 5G 2023 ត្រូវបានក្រុមហ៊ុនដាក់ឲ្យដំណើរការនៅលើឈីបស៊េរី MediaTek Dimensity 1080 ជំនួសឲ្យឈីប Dimensity 900 ដែលប្រើនៅលើជំនាន់មុន។ ស្មាតហ្វូនជំនាន់ថ្មីនេះមានរ៉េមទំហំ 8GB មានមុខងារបង្កើនទំហំរ៉េម RAM Extended បានទំហំ 5GB និងម៉េមូរីផ្ទុកក្នុងម៉ាស៊ីនទំហំ 256GB។ Infinix Zero 5G 2023 បានដំឡើងមកជាមួយប្រតិបត្តិការ Android 13 និងស្រោបដោយផ្ទៃមុខកម្មវិធី XOS12។ សម្រាប់ថ្មរបស់ Zero 5G 2023 គឺមានទំហំ 5,000mAh និងគាំទ្របច្ចេកវិទ្យាសាកភ្លើងកំលាំង 33W Wired Fast Charging តាមរយះរន្ធចម្លង USB-C។ ហើយស្មាតហ្វូននេះក៏មានប្រព័ន្ធសែនស័រស្កែនក្រយ៉ៅម្រាមដៃដោះសោរសុវត្ថិភាពស្ថិតនៅលើប៉ូតុងចាក់សោរលើស៊ុមខាងស្តាំដៃផងដែរ៕