ក្រុមហ៊ុន OnePlus នឹងប្រកាសចេញម៉ូនីទ័រស៊េរីថ្មីចំនួនពីរម៉ូដែលនៅទីផ្សារប្រទេសឥណ្ឌានាថ្ងៃទី 12 ខែធ្នូសប្តាហ៍ក្រោយនេះ។ ម៉ូនីទ័រស៊េរីថ្មីរបស់ OnePlus ត្រូវបានគេដឹងថាជាម៉ូដែល X27 ដែលមានអេក្រង់ទំហំ 27 អ៊ីញ និង E24 ដែលមានអេក្រង់ទំហំ 24 អ៊ីញ។ ហើយក្នុងថ្ងៃនេះដែរ OnePlus ផ្ទាល់ក៏បានបង្ហើបបង្ហាញចេញនូវគុណសម្បត្តិមួយចំនួនរបស់ Monitor ស៊េរីថ្មីទាំងពីរម៉ូដែលរបស់ខ្លួនផងដែរ ហើយគុណសម្បត្តិទាំងនេះអាចនឹងមាននៅលើទាំងពីរម៉ូដែលតែម្តង។
បើតាម OnePlus បញ្ជាក់ថា ម៉ូនីទ័រស៊េរីថ្មីចុងក្រោយរបស់ខ្លួន គឺមានអេក្រង់កម្រិត 165Hz refresh rate ជាមួយល្បឿន response time 1ms ក៏ដូចគាំទ្រនូវបច្ចេកវិទ្យា AMD Freesync Premium ដែលផ្តល់ឲ្យការបង្ហាញរូបភាព-វីដេអូនៅលើផ្ទៃអេក្រង់ទទួលបានគុណភាពច្បាស់បំផុត និងជាមួយល្បឿនលឿនរហ័សដែលល្អបំផុតសម្រាប់ការលេងហ្គេម។បន្ថែមពីនេះ OnePlus ក៏បានបញ្ជាក់ទៀតថា សម្រាប់ម៉ូដែល OnePlus X27 គឺជាលំដាប់ផលិតផលកម្រិត Premium រីឯម៉ូដែល OnePlus E24 គឺស្ថិតក្នុងលំដាប់ផលិតផលថ្នាក់មធ្យម ឬ mid-range device។ OnePlus បានអះអាងថា ជាមួយម៉ូនីទ័រស៊េរីថ្មីទាំងពីរម៉ូដែលរបស់ខ្លួន គឺនឹងផ្តល់ឲ្យអ្នកប្រើប្រាស់ទទួលបានប្រសិទ្ធិភាពការងារដ៏រលូន និងការលេងហ្គេមដ៏អស្ចារ្យបំផុត។
បើតាមរូបភាព teaser មួយសន្លឹករបស់ OnePlus បានបង្ហាញថា Monitor ស៊េរីថ្មីចុងក្រោយនេះ គឺមានការរចនាឡើងជាមួយគែមអេក្រង់តូចស្តើងជាមួយកម្រាស់ស្តើងកម្រិត Premium តែម្តង។ ចំពោះគុណសម្បត្តិលម្អិតបន្ថែមទៀតរបស់ Monitor ស៊េរីថ្មីទាំងពីរនេះ OnePlus នឹងបង្ហាញជូនឥតលាក់លៀមនៅក្នុងថ្ងៃព្រឹត្តិការណ៍ខាងមុខនេះ។ ជាមួយនឹងវត្តមានរបស់ម៉ូនីទ័រស៊េរីថ្មី OnePlus X27 និង E24 ក្រុមហ៊ុនមួយបូក (1+/OnePlus) ក៏នឹងមានការដាក់បង្ហាញចេញនូវស្មាតធីវីស៊េរីថ្មីម៉ូដែល OnePlus TV Y1S Pro 55-inch ផងដែរ៕
