ការលក់រថយន្តអគ្គិសនីនៅលើទីផ្សារសលកលោកមានការកើនឡើង 71% ធៀបពីមួយឆ្នាំទៅមួយឆ្នាំនៅក្នុងត្រីមាសទី 3 នៃឆ្នាំ 2022
នេះបើយោងទៅលើរបាយការណ៍ស្រាវជ្រាវផ្នែកទីផ្សាររថយន្តអគ្គិសនីសកលរបស់ក្រុមហ៊ុន Counterpoint (Global Passenger Electronic Vehicle Model Sales Tracker)។ បើតាមរបាយការណ៍បានបង្ហាញថា ប្រទេសចិនគឺបាននាំមុខគេក្នុងការលក់រថយន្តអគ្គិសនីក្នុងពិភពលោក បន្ទាបើមគឺអឺរ៉ុប ហើយនិងសហរដ្ឋអាមេរិក។ ក្នុងត្រីមាសទីបីឆ្នាំនេះ ការលក់រថយន្តអគ្គិសនីសរុបរបស់ប្រទេសចិនមានការកើនឡើងជាង 100% ដែលសរុបចំនួននៃការលក់ គឺបានចំនួន 1.7 លានគ្រឿង កើនពី 0.88 លានគ្រឿងដែលលក់បានកាលពីអំឡុងត្រីមាសទី 3 ក្នុងឆ្នាំ 2021។
BYD ដែលជាក្រុមហ៊ុនផលិតរថយន្តអគ្គិសនីល្បីឈ្មោះរបស់ប្រទេចិនបានបន្តនាំមុខគេក្នុងការលក់នៅត្រីមាសទីបីឆ្នាំនេះ ខណៈដែលក្រុមហ៊ុនផលិតរថយន្តអគ្គិសនីល្បីឈ្មោះបំផុតរបស់អាមេរិក គឺ Tesla ស្ថិតនៅលេខរៀងទី 2។ ការនាំចេញរថយន្តអគ្គិសនីរបស់ BYD នៅត្រីមាសទី 3 ក្នុងឆ្នាំ 2022 គឺមានចំនួន 537,000 គ្រឿងដែលកើនឡើងដល់ទៅ 197% YoY (ពីមួយឆ្នាំទៅមួយឆ្នាំ) ក្នុងនោះរថយន្ត 3 ម៉ូដែលរបស់ BYD ទទួលបានប្រជាប្រិយភាពខ្លាំងជាងគេ គឺម៉ូដែល BYD Song, BYD Qin និង BYD Han ដោយទាំង 3 ម៉ូដែលនេះបានបង្កើនចំនួនលក់បានជាង 56% ក្នុងចំនួននៃការលក់សរុបរបស់ BYD។
ចំពោះការលក់របស់ Tesla របស់លោក Elon Musk វិញមានកំណើន 43% នៅត្រីមាសទី 3 ឆ្នាំនេះជាមួយចំនួននាំចេញសរុបបាន 343,000 គ្រឿង។ រថយន្ត Tesla មានកំណើនតម្រូវការកើនឡើងខ្លាំងនៅទីផ្សារអឺរ៉ុបក្នុងត្រីមាសទី 3 ឆ្នាំ 2022។ Tesla មានដំណើរការផលិតរលូននៅក្នុងរោងចក្រទីក្រុងប៊ែកឡាំងរបស់ខ្លួន ដែលបានជួយឲ្យការនាំចេញសម្រាប់ Tesla Model Ys នៅក្នុងប្រទេសអាល្លឺម៉ង់ក្នុងត្រីមាសនេះមានការកើនឡើងខ្ពស់។ ទោះជាយ៉ាងណាក៏ដោយ ការនាំចេញរបស់ Tesla បានធ្លាក់ចុះតិចជាងការរំពឹងទុក ដោយសារតែបញ្ហារាំងស្ទះផ្នែកដំណើរការដឹកជញ្ជូន។
ជាមួយគ្នាក្រុមហ៊ុនផលិតរថយន្តអគ្គិសនីក្នុងប្រទេសចិនដូចជា Wuling ក៏មានកំណើនក្នុងការនាំចេញរថយន្តអគ្គិសនីរបស់ខ្លួនផងដែរដោយការនាំចេញរបស់ក្រុមហ៊ុននេះមានកំណើន 31% YoY ឈរនៅលេខរៀងទី 3 ក្នុងទីផ្សារសកលបន្ទាប់ពី Tesla។ German Auto ដែលជាក្រុមហ៊ុនផលិតរថយន្តអគ្គិសនីស្ថិតក្នុងបក្សសម័្ពន្ធរបស់ Volkswagen មានកំណើនការលក់រថយន្តអគ្គិសនី 28% YoY ឈរនៅលេខរៀងទី 4 ហើយរថយន្ត EV ដែលមានធ្វើទីផ្សារល្អខ្លាំង “Top Selling” របស់ German Auto គឺមានម៉ូដែល ID.4, ID.3 និង ID.6។
របាយការណ៍ Counterpoint បានបង្ហាញថា ទីផ្សារលក់រថយន្តអគ្គិសនីរបស់ក្រុមហ៊ុនក្នុងប្រទេសចិនមានកំណើនប្រចាំឆ្នាំ 79% YoY និងប្រចាំត្រីមាស 35% QoQ។ ហើយទោះបីជាការលក់ម៉ាកយីហោរថយន្តអគ្គិសនៅនៅក្នុងតំបន់អឺរ៉ុប និងសហរដ្ឋអាមេរិកបានងើបឡើងវិញជាបន្តបន្ទាប់ក៏ដោយ ក៏ទីផ្សារក្នុងតំបន់ទាំងពីរមិនបានជាប់ក្នុងបញ្ជីកំណើនប្រចាំឆ្នាំ YoY របស់ Counterpoint នោះទេ៕