ក្រុមហ៊ុន Xiaomi ត្រូវបានគេរាយការណ៍ថា នឹងមានការដាក់បង្ហាញចេញស្មាតហ្វូនកំពូលជំនាន់ថ្មីក្នុងគ្រួសារ Xiaomi 15 និង 15 Pro ឆាប់ៗខាងមុខនេះ។ ដោយថ្មីៗនេះ ស្មាតហ្វូនជំនាន់ថ្មីនេះ ត្រូវបានគេទម្លាយចេញនៅលើទិន្នន័យ IMEI Database ជាមួយគុណសម្បត្តិមួយចំនួន។ បើតាមប្រភពបាននិយាយថា Xiaomi 15 នឹងមានលក់នៅលើទីផ្សារសកល លើកឡែងតែម៉ូដែល Xiaomi 15 Pro ប៉ុណ្ណោះដែលមានលក់ផ្តាច់មុននៅក្នុងទីផ្សារប្រទេសចិន។ ស្មាតហ្វូនជំនាន់ថ្មី Xiaomi 15 Series នឹងមានតម្លៃថ្លៃជាងជំនាន់មុនរបស់ពួកវាបន្តិចផងដែរ។
បើតាមការទម្លាយនៅកាលពីពេលថ្មីៗនេះបានឲ្យដឹងថា Xiaomi 15 Pro គឺមានលេខកូដសំគាល់ម៉ូដែលល 24101PNB7C។ យ៉ាងណាមិញ បើតាមការបង្ហាញនៅលើ Source Code នៃប្រតិបត្តិការណ៍៍ HyperOS 15 បានបង្ហាញកូដម៉ូដែលនៃស្មាតហ្វូនជំនាន់ថ្មីនេះថា “Haotian”។ ពាក្យថា Haotian គឺជាពាក្យដែលត្រូវបានគេប្រើក្នុងតួរអង្គនៃទេវកថាចិន។ ហើយនៅក្នុងភាសាចិន ហាវធៀន សំដៅលើ ហាវធាន សានឌី ដែលបកប្រែថា អធិរាជកំពូលមេឃ (浩天)។ អាទិទេពនេះ គឺជាព្រះដ៏សំខាន់នៅក្នុងសាសនាតាវ និងទេវកថាចិនបុរាណផ្សេងៗ ដែលតំណាងឱ្យព្រះដ៏ខ្ពង់ខ្ពស់បំផុតដែលគ្រប់គ្រងគ្រប់បាតុភូតមេឃ និងលំដាប់ឋានសួគ៌។
ទោះជាយ៉ាងណាសម្រាប់លក្ខណៈសម្បត្តិរបស់ស្មាតហ្វូនកំពូលជំនាន់ថ្មី Xiaomi 15 series មិនទាន់មានការទម្លាយចេញច្រើននៅឡើយទេ។ ដោយគ្រាន់តែគេមានភាពជឿជាក់ថា Xiaomi 15 Series នឹងមានគុណសម្បត្តិកាន់តែល្អប្រសើរជាងជំនាន់ Xiaomi 14 ដែលបានប្រកាសចេញកាលពីឆ្នាំមុន។ Xiaomi 15 Pro ត្រូវបានគេរំពឹងថា នឹងបង្ហាញខ្លួននៅប្រទេសចិនក្នុងខែតុលា ឆ្នាំ 2024។
ស្របពេលដែលក្រុមហ៊ុនផលិតបន្ទះឈីបស្មាតហ្វូន Qualcomm ក៏នឹងមានការដាក់បង្ហាញចេញនូវកំពូលឈីបជំនាន់ថ្មី Snapdragon 8 Gen 4 នៅក្នុងខែតុលាផងដែរ។ ហើយ Xiaomi តែងតែជាក្រុមហ៊ុនផលិតស្មាតហ្វូនដំបូងគេដែលបានប្រើបន្ទះឈីបជំនាន់ថ្មីរបស់ Qualcomm នៅលើស្មាតហ្វូបកំពូលជំនាន់ថ្មីរបស់ខ្លួន។ ដូច្នេះ Xiaomi 15 series ក៏នឹងក្លាយជាត្រកូលស្មាតហ្វូនដំបូងគេដែលបំពាក់នូវ Snapdragon 8 Gen 4 ផងដែរ៕
