ក្រុមហ៊ុន BYD កំពុងដាក់សំពាធខ្លាំងលើក្រុមហ៊ុន Tesla នៅក្នុងទីផ្សារលក់រថយន្តអគ្គិសនីបច្ចុប្បន្ន

ក្នុងពេលបច្ចុប្បន្នទីផ្សាររថយន្តអគ្គិសនីកំពុងមានការកើនសន្ទុះប្រគូតប្រជែងគ្នាខ្លាំង។ ហើយបច្ចុប្បន្ននេះ ក្រុមហ៊ុនផលិតរថយន្តបែបប្រពៃណី ឬផលិតរថយន្តប្រើម៉ាស៊ីនចំហេះក្នុងជាច្រើនបាននឹងកំពុងធ្វើការកែប្រែសង្វាក់ផលិតរបស់ពួកគេមកកាន់ការផលិតរថយន្តអគ្គិសនីជាបណ្តើរៗផងដែរ។ ហើយបើនិយាយពីក្រុមហ៊ុនផលិតរថយន្តអគ្គិសនីសុទ្ធដែលកំពុងឈានមុខគេនៅលើពិភពលោក គឺជាក្រុមហ៊ុនអាមេរិក Tesla របស់មហាសេដ្ឋីផុតលេខ Elon Musk ប៉ុន្តែ បើនិយាយពីភាពរីកចម្រើនខ្លាំងក្នុងការលក់រថយន្តអគ្គិសនីបច្ចុប្បន្ន គឺជា BYD របស់ប្រទេសចិន។

បើនិយាយពីគម្លាតចំនួននៃការលក់រថយន្តអគ្គិសនីរវាង Tesla និង BYD គឺមានគម្លាតគ្នាតិចតួចប៉ុណ្ណោះ ដោយក្នុងត្រីមាសទី 2 ឆ្នាំ 2024 កន្លងទៅការលក់រថយន្តអគ្គិសនីរបស់ BYD បានកើនឡើងដល់ 21% គិតជាចំនួនរថយន្តអគ្គិសនីដែលបានលក់ចេញមានចំនួន 426,039 គ្រឿង។ ដែលតួរលេខនេះ គឺមានចំនួនតិចជាងការលក់រថយន្តរបស់ Tesla ប្រមាណតែ 17,917 គ្រឿងតែប៉ុណ្ណោះ ដោយនៅត្រីមាសដូចគ្នាឆ្នាំនេះ Tesla បានលក់រថយន្តអគ្គិសនីបានចំនួន 443,956 គ្រឿង។ តួរលេខកើនឡើងនៃការលក់រថយន្តអគ្គិសនីរបស់ BYD ដោយសារក្រុមហ៊ុនបានផលិតរថយន្តអគ្គិសនីដែលមានតម្លៃធូរថ្លៃ ខុសពីក្រុមហ៊ុន Tesla ដែលផលិតរថយន្តអគ្គិសនីដែលមានតម្លៃថ្លៃដូចជាម៉ូដែល Tesla Cybertruck ជាដើម។

ទោះបីជា ការលក់រថយន្តរបស់ BYD មានការកើនឡើង និងលក់បានចំនួនច្រើនជាង Tesla ក៏ដោយចុះ ប៉ុន្តែ វាមិនធ្វើឲ្យមានផលប៉ះពាល់ដល់ប្រាក់ចំណូល និងចំណេញរបស់ Tesla នោះឡើយ។ បើតាមរបាយការណ៍លក់ក្នុងខែមិថុនា ឆ្នាំ 2024 នេះ ការលក់រថយន្តអគ្គិសនីរបស់ Tesla នៅទីផ្សារប្រទេសចិនបានធ្លាក់ចុះ 24.2% ធៀបនឹងរយះពេលដូចគ្នាពីឆ្នាំមុន ដោយធ្លាក់ចំនួននៃការលក់មកនៅត្រឹម 71,007 គ្រឿង ដែលនេះជាការធ្លាក់ចុះប្រចាំឆ្នាំទី 3 ជាប់ៗគ្នា។

ក្រុមហ៊ុន Tesla ផលិតរថយន្តដែលមានតម្លៃខ្ពស់ជាចម្បងដូចជា ម៉ូដែល Cybertruck ជាដើមនោះ ខណៈ BYD ត្រូវបានគេស្គាល់ថាជាក្រុមហ៊ុនផលិតរថយន្តអគ្គិសនីដែលមានតម្លៃសមរម្យជាងរបស់ Tesla។ ទោះបីជាប៉ះពាល់ដល់ការលក់ក៏ដោយ Tesla រក្សាបាននូវអត្ថប្រយោជន៍នៃការរកប្រាក់ចំណេញដ៏រឹងមាំ។

នៅក្នុងខែមិថុនា ការលក់រថយន្ត EV របស់ក្រុមហ៊ុន Tesla នៅក្នុងប្រទេសចិនបានធ្លាក់ចុះ 24.2% ពីឆ្នាំមុនមកត្រឹម 71,007 គ្រឿង ដែលនេះជាការធ្លាក់ចុះប្រចាំឆ្នាំទីបីជាប់ៗគ្នា។ បើតាមការបង្ហើបពីមេរបស់ Tesla លោក Elon Musk គឺក្រុមហ៊ុនលោកកំពុងមានគម្រោងក្នុងការផលិតរថយន្តអគ្គិសនីស៊េរីថ្មីដែលមានតម្លៃសមរម្យជាងម៉ូដែលបច្ចុប្បន្ន ប៉ុន្តែ មិនទាន់ច្បាស់ថារថយន្ត Tesla ដែលមានតម្លៃសមរម្យនឹងមានវត្តមាននៅលើទីផ្សារពេលណានោះទេ៕