Red Magic 9 Pro ដែលជាស្មាតហ្វូនជំនាន់ថ្មីលំដាប់ថ្នាក់ប្រណិតរបស់ក្រុមហ៊ុន Nubia ម៉ូដែល Red Magic 9 Pro ត្រូវបានគេរាយការណ៌ថា នឹងសម្ពោធជាផ្លូវការនៅថ្ងៃទី 23 ខែវិច្ឆិកាខានស្អែកនេះហើយ។ ស្មាតហ្វូន Red Magic 9 Pro ត្រូវបានគេបញ្ជាក់ច្បាស់ហើយថា នឹងប្រើប្រាស់នូវបច្ចេកវិទ្យាសាកកម្លាំងសាក 165W រួមនិងបន្ទះឈីបជំនាន់ថ្មី Snapdragon 8 Gen 3។ បច្ចេកវិទ្យា ‘Magic Flash Fast Charging’ ថ្មីនេះ មានសមត្ថភាពខ្ពស់ដោយភ្ជាប់ជាមួយនិងការប្រើប្រាស់នូវកម្លាំងសាកលឿនអាចសាកបញ្ចូលថាមពលបានលឿនដោយចំណាយត្រឹម 16 នាទីប៉ុណ្ណោះ។
ដើម្បីធានាបាននូវសុវត្ថិភាពនៅក្នុងពេលសាកថ្មជាមួយល្បឿននោះ ក្រុមការងាររបស់ Red Magic បានប្រើប្រាស់នូវវិធីសាស្រ្តថ្មី ក្នុងការសាក ដោយបំបែកថ្មទៅជា 3 ដំណាក់កាលសម្រាប់ការសាកបញ្ចូលថ្ម។ បច្ចេកវិទ្យាថ្មីនេះ ត្រូវបានក្រុមហ៊ុនទទួលបានជោគជ័យនៅលើស្មាតហ្វូនជំនាន់ថ្មី Red Magic 8 Pro រួចមកហើយ។ ដូច្នេះមានការរំពឹងថា ការបន្តប្រើប្រាស់នូវបច្ចេកវិទ្យានេះនៅលើ Red Magic 9 Pro នឹងធ្វើអោយការសាកជាមួយកម្លាំងសាក 165W កាន់តែមានសុវត្ថិភាពជាងមុន។
Red Magic 9 Pro ត្រូវបានគេរាយការណ៌ថា នឹងមានថ្មទំហំ 6500mAh និងមានស៊ុមជុំវិញកម្រ៉ាស 8.9mm។ បើតាតមការធ្វើតេស្តបានបញ្ជាក់ថា ថាមពលថ្មនៅលើស្មាតហ្វូននេះអាចប្រើប្រាស់បាន 2 យប់ 2 ថ្ងៃ។ និយាយពីការឌីស្សាញរូបរាងទៅលើស្មាតហ្វូននេះវិញ គឺខ្នងក្រោយមានការរចនាពីកញ្ចក់ ដែលមានការច្នៃប្រឌិតជាពិសេសដោយឆ្លងកាត់ការរួមបញ្ចូលគ្នានូវកញ្ចក់ 15 ដំណាក់កាលទំរាំទទួលបាននូវរូបរាងថ្មីនេះ ហើយសម្រាប់ផ្ទៃខាងមុខ គឺមានបច្ចេកវិទ្យាកាមេរ៉ាក្រោមអេក្រង់សម្រាប់កាមេរ៉ាសែលហ្វី និងការលេងហ្គេមដោយអេក្រង់ពេញគ្មានការរំខាន។ Red Magic 9 Pro series គឺជាស្តង់ដារថ្មីនៃស្មាតហ្វូន gaming នៅលើពិភពលោក។
