ថ្មីៗនេះក្រុមហ៊ុនផលិតរថយន្ត Great Wall Motor ឬ GWM បានបញ្ចេញរថយន្ត off-road ស៊េរីថ្មីរបស់ខ្លួនជាផ្លូវការណ៍ដែលមានឈ្មោះថា Haval Raptor ដែលជាប្រភេទរថយន្តប្រើម៉ាស៊ីនសាំងសុទ្ធ។ រថយន្ត Compact off-road SUV ស៊េរីថ្មីនេះ មានការឌីស្សាញរូបរាងឡើងថ្មីមានភាពរឹងហាបជាងម៉ូដែល Plug-in-hybrid ដែលកំពុងដាក់លក់នៅល់ទីផ្សារប្រទេសចិនបច្ចុប្បន្ន។
Haval Raptor មានការឌីស្សាញរូបរាងបែបប្រអប់ដែលភាសាឌីស្សាញហៅថា Boxy-design ជាមួយផ្ទាំងប៉ាណាមុខរចនាបែបបញ្ឈរមានអក្សរ HAVAL នៅកណ្តាល អមសងខាងដោយចង្កៀងរចនាបែបជ្រុង និងមានកាងខាងក្រោមរចនារំលេចជាមួយពណ៌ទឹកប្រាក់ដែលបង្ហាញពីភាពប្រណិត និងភាពរឹងមាំបែបរថយន្ត off-road តែម្តង។
សម្រាប់ផ្នែកខាងក្រោយត្រូវបានរចនាជារាងជ្រុង ដែលរំលេចជាមួយចង្កៀងបំភ្លឺខាងក្រោយរចនាបែបបញ្ឈ ជាមួយទា្វរខាងក្រោយបើកទៅចំហៀងដែលមានភ្ជាប់នូវកង់ស៊ីគួផងដែរ។ ផ្នែកដំបូលត្រូវបានឌីស្សាញឡើងបែបទាលជាមួយដំបូលបើកពីរតង់ panoramic sunroof, ជើងសម្រាប់ជាប់ដាក់គ្រែ roof rack ហើយនៅផ្នែកចំហៀងប្រើប្រាស់ដៃទ្វារធម្មតា និងមានឈ្លាន់ជាន់ឡើងដំណើរការឡើងចុះស្វ័យប្រវត្តិផងដែរ។
Haval Raptor ICE ថ្មីនេះ មានប្រវែងតួរខ្លួន 4.8m/ ទទឹង 1.95m/ កំពស់ 1.8m និងគម្លាតចន្លោះកង់មុខទៅកង់ក្រោយ 2.7m។ រថយន្ត Compact off-road SUV ស៊េរីថ្មីនេះ មានជម្រើសប្រើសសម្បកកង់ និងយ៉ាន់កង់ខ្នាត 245/55 R19, 265/60 R18 និង 255/60 R19។
សម្រាប់កំលាំងអូសទាញវិញ Haval Raptor ICE របស់ GWM ត្រូវពឹងផ្អែកលើម៉ាស៊ីនទំហំ 2.0T Engine ដែលអាចផលិតកំលាំងបាន 235 សេះ និងផ្គួរផ្គងភ្ជាប់ដំណើរការដោយប្រព័ន្ធប្រអប់លេខ DCT ស្វ័យប្រវត្តិ 9 វគ្គ (9-speed DCT) និងដំណើរការដោយប្រព័ន្ធប៉ុងពីរ (AWD)។ បច្ចុប្បន្ន GWM មិនទាន់បញ្ជាក់ពីតម្លៃរបស់ Haval Raptor ដែលប្រើម៉ាស៊ីនសាំងសុទ្ធនៅឡើយទេ។
ដោយឡែកសម្រាប់ម៉ូដែល Haval Raptor Plug-in-Hybrid (PHEV) ត្រូវបានក្រុមហ៊ុនកំពុងដាក់លក់នៅទីផ្សារប្រទេសចិនក្នុងតម្លៃចាប់ពីខ្ទង់ $22,800 និងដល់ $26,500។ ក្នុងខែមីនា ការលក់រថយន្ត Haval Raptor PHEV គឺចំនួន 5,565 គ្រឿង កើនឡើងដល់ 166.1% បើធៀបនឹងឆ្នាំមុន និង 56.7% បើធៀបនឹងខែកុម្ភៈ។ ហើយការលក់សរុបក្នុងត្រីមាសទីមួយ (មករា-មីនា) ឆ្នាំ 2025 មានចំនួនសរុប14,159 គ្រឿង និងបានជាប់នៅចំណាត់ថ្នាក់ទី 60 ក្នុងបញ្ជីរថយន្តប្រភេទ SUV ដែលលក់ដាច់បំផុតនៅប្រទេសចិន៕
