ក្រុមហ៊ុន Xiaomi ត្រូវបានគេរំពឹងថា នឹងមានការបង្ហាញចេញស្មាតហ្វូនបត់បានជំនាន់ថ្មី Xiaomi Mix Flip 2 ដែលជាប្រភេទ Clamshell របស់ខ្លួននៅក្នុងប្រទេសចិន នាចុងខែនេះហើយ។ ប៉ុន្តែបើមើលទៅលើស្មាតហ្វូនជំនាន់ថ្មីត្រកូល Xiaomi Mix Fold 4 វិញ ក្រុមហ៊ុនបច្ចេកវិទ្យាយក្សចិនមួយនេះ ហាក់បីដូចជាមិនមានគម្រោងនៅក្នុងការប្រកាសចេញនៅឡើយទេ។ យោងតាមអ្នកទម្លាយ Smart Pikachu នៅថ្ងៃនេះ បានអះអាងថា ក្រុមហ៊ុន Xiaomi នឹងមានការបញ្ចេញនូវស្មាតហ្វូនបត់បានជំនាន់ថ្មី Mix Fold របស់ខ្លួន ដែលមានការ Upgrade កាន់តែខ្លាំងក្លា នៅឆ្នាំក្រោយនេះហើយ។
ផ្អែកតាមការទម្លាយចុងក្រោយនេះ គេនៅមិនទាន់ច្បាស់នោះទេថា ស្មាតហ្វូនជំនាន់ថ្មី ដែលបានបង្ហាញខ្លួននៅឆ្នាំក្រោយនេះនឹងមានឈ្មោះហៅថា Xiaomi Mix Fold 6 ឬ ឈ្មោះផ្សេងនោះទេ ប៉ុន្តែការបែកធ្លាយនេះ បានទម្លាយថា ស្មាតហ្វូនអេក្រង់បត់បាននេះ នឹងប្រើប្រាស់នូវខ្នាតអេក្រង់ Aspect ratio ថ្មី ហើយនិងមានការ Upgrade ទៅលើផ្នែកជាច្រើនផងដែរ។ អ្នកទម្លាយ Smart Pikachu បានបន្តទម្លាយថា ស្មាតហ្វូនអេក្រង់បត់បាននេះ នឹងប្រើប្រាស់នូវបន្ទះឈី Snapdragon ជំនាន់ថ្មី។
ជាមួយគ្នានេះ ក៏មានរបាយការណ៍ជាច្រើនបានទម្លាយថា ក្រុមហ៊ុន Xiaomi ក៏នឹងធ្វើការនៅលើស្មាតហ្វូនបត់បាន 3 តង់ដំបូងបំផុត របស់ខ្លួន ដែលស្រដៀងគ្នាទៅនឹងស្មាតហ្វូន Huawei Mate XT ផងដែរ។ ស្មាតហ្វូននេះ អាចនឹងបង្ហាញខ្លួននៅក្នុងត្រីមាសទី 1 ឆ្នាំ 2026 ខាងមុខនេះជាមួយលេខកូដឈ្មោះហៅថា “zhuque” ហើយនិងលេខម៉ូដែល 26013VP46C។ មកដល់ពេលនេះ គេនៅមិនទាន់ច្បាស់នោះទេថា ស្មាតហ្វូនអេក្រង់បត់បាន 3 តង់នេះ នឹងក្លាយជាជំនាន់ថ្មីរបស់ស្មាតហ្វូន Xiaomi Mix Fold 4 ឬក្រុមហ៊ុន Xiaomi មានគម្រោងនៅក្នុងការបង្ហាញនូវស្មាតហ្វូនបត់បានចំនួន 2 ម៉ូដែលនៅឆ្នាំក្រោយនេះ នោះគឺស្មាតហ្វូនប្រភេទអេក្រង់ផ្តេក (Horizon Foldable) និងស្មាតហ្វូនបត់បាន 3 តង់។
នៅក្នុងរបាយការណ៍ខាងលើបានអោយដឹងបន្ថែមទៀតថា ក្រុមហ៊ុន Xiaomi នឹងបង្ហាញនូវស្មាតហ្វូនជាច្រើននៅខែនេះ (ខែមិថុនា) នៅក្នុងប្រទេសចិន។ ខណៈពេលដែលស្មាតហ្វូន Mix Flip 2 នឹងប្រើប្រាស់នូវបន្ទះឈីប Snapdragon 8 Elite នោះ ក្រុមហ៊ុន Xiaomi នឹងបញ្ចេញនូវស្មាតហ្វូន Redmi K80 Ultra ជាមួយនឹងបន្ទះឈីប Dimensity 9400+ ដែលនេះ គឺជាថេប្លេតដែលផ្តោតទៅលើការលេងហ្គេម។ ថេប្លេតថ្មីនេះ នឹងអាចប្រជែងជាមួយនឹងថេប្លេតលេងហ្គេមជំនាន់ថ្មីរបស់ Red Magic និងថេប្លេត Lenovo Legion Y700 (Gen 4) ផងដែរ៕
