ថេប្លេតស៊េរីថ្មី Redmi K Pad នឹងបង្ហាញខ្លួន ជាមួយអេក្រង់ 3K ទំហំ 8.8-អ៊ីងល្បឿន 165Hz

ក្រុមហ៊ុន Xiaomi ត្រូវបានគេមើលឃើញថា បានត្រៀមខ្លួននៅក្នុងការពង្រីកទៅលើថេប្លេតរបស់ខ្លួននៅក្នុងត្រកូល Redmi ទៅលើទីផ្សារថែមទៀតហើយ។ សម្រាប់ថេប្លេត Flagship ដែលមានរូបរាងតូចនេះ នឹងបង្ហាញខ្លួនឆាប់ៗនេះ ហើយនៅក្នុងព័ត៌មានថ្មីនេះ ក៏មានការបង្ហាញនូវទំហំអេក្រង់របស់ថេប្លេត Redmi K Pad ផងដែរ។ នៅពេលនេះ ការឌីស្សាញ និងពណ៌ថ្មីរបស់ថេប្លេតនេះត្រូវបានគេទម្លាយចេញថែមទៀតហើយ។

តាមការបែកធ្លាយខាងលើនេះ បានបង្ហាញថា ថេប្លេតជំនាន់ថ្មីរបស់ក្រុមហ៊ុនបច្ចេកវិទ្យាយក្សចិននេះ គឺមានឈ្មោះហៅថា Redmi K Pad មានអេក្រង់ទំហំ 8.8-អ៊ីងជាប្រភេទកញ្ចក់ LCD ហើយអេក្រង់នេះ គឺមានកម្រិតបង្ហាញចេញនូវភាពច្បាស់ 3K resolution នៅលើខ្នាត 16:10 aspect ratio ហើយនិងមានល្បឿនអេក្រង់ 165Hz refresh rate។ ទំហំអេក្រង់នេះ គឺសមល្មមសម្រាប់ការប្រើប្រាស់ ប្រសិនបើមើលទៅលើថេប្លេតភាគច្រើន គឺសុទ្ធតែមានអេក្រង់ធំជាងនេះ។ ក្រឡេកមកមើលការថតរូបនៅលើថេប្លេត Redmi K Pad វិញ គឺនឹងមានកាមេរ៉ាមួយគ្រាប់នៅខាងក្រោយជាមួយនឹងភ្លើង LED Flash។ 

ថេប្លេតនេះ ក៏នឹងមានពណ៌បៃតងយ៉ាងស្រស់ស្អាតផងដែរ ហើយថ្មីៗនេះ ក៏មានការបង្ហាញថេប្លេតថ្មីនេះ ជាមួយនឹងពណ៌ស្វាយស្រាលថែមទៀតហើយ។ គួរបញ្ជាក់ថា បើមើលនៅក្នុងបញ្ជី Geekbench មុននេះ ក៏មានការបង្ហាញអំពីលក្ខណៈសម្បត្តិមួយចំនួនរបស់ថេប្លេតនេះផងដែរ។ ថេប្លេតនេះ នឹងមានបន្ទះឈីប MediaTek Dimensity 9400+ SoC, 16GB RAM និងប្រព័ន្ធប្រតិបត្តិការ Android 15 OS ថែមទៀត។

ចំពោះការបង្ហាញនូវនៅក្នុងវិញ្ញាបនបត្រ 3C និង CMIIT វិញ គឺបង្ហាញថា ថេប្លេត Redmi K Pad នេះនឹងមានបច្ចេកវិទ្យាសាកថ្មល្បឿនលឿន 67W wired fast charging ផងដែរ។ ថេប្លេតនេះ អាចនឹងបង្ហាញខ្លួននៅថ្ងៃទី 18 ខែមិថុនាខាងមុខនេះជាមួយនឹងស្មាតហ្វូន Redmi K80 Ultra ៕