ស្មាតហ្វូនអេក្រង់បត់បាន Honor Magic V5 នឹងមកដល់ថ្ងៃទី 2 ខែកក្កដាខាងមុខ

នៅថ្ងៃនេះ Honor បានចេញមកបញ្ជាក់ជាផ្លូវការណ៌ពីការប្រកាសចេញនូវស្មាតហ្វូនអេក្រង់បត់បានជំនាន់ថ្មីរបស់ខ្លួនហើយ។ យោងតាមការបង្ហោះនៅលើបណ្តាញ Weibo អោយដឹងថា ក្រុមហ៊ុននេះ នឹងបង្ហាញចេញនូវស្មាតហ្វូនអេក្រង់បត់បាន Magic V5 នៅថ្ងៃទី 2 ខែកក្កដាខាងមុខនេះហើយ ដោយនៅក្នុងព្រឹត្តិការណ៌នោះក្រុមហ៊ុននេះក៏នឹងមានការបញ្ចេញនូវបច្ចេកវិទ្យា AI ដែលអភិវឌ្ឍដោយខ្លួនឯងផ្ទាល់ថែមទៀតផង។

ស្មាតហ្វូននេះត្រូវបានគេរាយការណ៌ថា មានកូដឈ្មោះ “Maybach,” ហើយនឹងមានការបំពាក់នូវបន្ទះឈីប Qualcomm Snapdragon 8 Elite Leading Edition ដែល prime core មានល្បឿនដល់ទៅ 4.47GHz។ 

ស្មាតហ្វូនថ្មីនេះ នឹងមានការបំពាក់នូវអេក្រង់ខាងក្នុងទំហំ 7.95-អ៊ីង និងអេក្រង់ខាងក្រៅទំហំ 6.45-អ៊ីង គាំទ្រដោយបច្ចេកវិទ្យា LTPO OLED កម្រិត 2K សម្រាប់អាក្រង់ខាងក្រៅ ហើយអេក្រង់ទាំងពីរនេះ ក៏មានការប្រើប្រាស់នូវល្បឿន 120Hz refresh rate ដួចគ្នាផងដែរ។ Magic V5 ក៏ត្រូវបានគេនិយាយថា មានទម្ងន់ស្រាល និងមានកម្រាស់ស្តើងទៀតផង។ សូមជំរាបថា សម្រាប់ម៉ូដែលមុននេះ គឺមានកម្រាស់ 4.35mm ហើយត្រូវបានគេចាត់ទុកថា ជាស្មាតហ្វូនស្តើងជាងគេបំផុតនៅលើពិភពលោកផងដែរ។ ប៉ុន្តែសម្រាប់ Vivo X Fold 5 អាចនឹងស្តើងជាងនេះទៀត គឺត្រឹមតែ 4.3mm ប៉ុណ្ណោះ។ 

នៅលើស្មាតហ្វូននេះត្រូវបានគេរាយការណ៌ថា អាចនឹងមានការបំពាក់នូវកាមេរ៉ាគោលទំហំ 50-Megapixel គាំទ្រដោយមុខងារទប់លំនឹង OIS និង Ultra-wide ហើយនិងមួយគ្រាប់ទៀតមានទំហំ 200-Megapixel Periscope Telephoto។ ស្មាតហ្វូនMagic V5 នឹងមានការប្រើប្រាស់ថ្មថ្មី silicon-based battery ទំហំចន្លោះពី 5950mAh ទៅ 6100mAh ហើយនឹងអាចប្រើប្រាស់នូវកម្លាំងសាក 66W។ នៅលើស្មាតហ្វូននេះក៏មានការប្រើប្រាស់សិនស័រស្កែននូវចំហៀង និងទ្រទ្រង់នូវសេវាកម្ម Beidou satellite SMS messaging ផងដែរ។

ជាមួយនិងការបង្ហាញខ្លួនឆាប់ៗនេះ ស្មាតហ្វូនអេក្រង់បត់បានថ្មីនេះត្រូវបានគេរំពឹងថា អាចនឹងមានពណ៌ Velvet Black, Warm White, Dawn Gold និង Silk Road Dunhuang finish។