របាយការណ៍ថ្មីមួយទម្លាយអំពីលក្ខណៈសម្បត្តិស្មាតហ្វូនអេក្រង់បត់បាន 3 តង់ Samsung Tri-Fold

យោងតាមរបាយការណ៍ថ្មីៗនេះ គឺមានការបញ្ជាក់ថា ក្រុមហ៊ុន Samsung អាចនឹងបង្ហាញស្មាតហ្វូន Samsung Tri-Fold ស្មាតហ្វូន បត់បាន 3 តង់របស់ខ្លួន ជាលើកដំបូងបំផុតនៅក្នុងព្រឹត្តិការណ៍ Galaxy Unpacked ដែលនឹងមកដល់នៅសប្តាហ៍ក្រោយនេះ នៅក្នុងនោះក៏មានដំនឹងថា ក្រុមហ៊ុននេះ ក៏នឹងចាប់ផ្តើមការផលិតទ្រង់ទ្រាយធំនៅក្នុងពេល 2 ខែទៀតផងដែរ។ តាមការបញ្ជាក់ចេញពី The Bell តាមរយៈអ្នកទម្លាយ @Jukanlosreve បានអោយដឹងថា Samsung នឹងបង្ហាញស្មាតហ្វូនបត់បាន 3 តង់នៅក្នុងព្រឹត្តិការណ៍ Galaxy Unpacked នៅថ្ងៃទី 9 ខែកក្កដានេះ ហើយការផលិតទ្រង់ទ្រាយធំ គឺចាប់ផ្តើមពីខែកញ្ញានេះហើយ។

ស្មាតហ្វូនបត់បាន 3 តង់ Samsung Tri-Fold នេះ នឹងដាក់លក់នៅក្នុងត្រីមាសទី 4 នៅក្នុងឆ្នាំនេះ។ គួរបញ្ជាក់ថា ដោយសារតែនេះ គឺជាស្មាតហ្វូនបត់បាន 3 តង់ដំបូងបំផុតរបស់ខ្លួននោះ ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះ ចង់មើលទៅលើការឆ្លើយតបនៃទីផ្សារសិនតាមរយៈការផលិតស្មាតហ្វូននេះនៅក្នុងចំនួនមានកំណត់ណាមួយនោះ។ 

នៅក្នុងព្រឹត្តិការណ៍មួយរបស់ខ្លួននៅថ្ងៃទី 9 ខែកញ្ញានេះ ក្រុមហ៊ុន Samsung មានគម្រោងក្នុងការទម្លាយនូវការឌីស្សាញ និងលក្ខណៈសម្បត្តិមួយចំនួនរបស់ស្មាតហ្វូនថ្មីនេះ។ ស្មាតហ្វូននេះ នឹងមានអេក្រង់ទំហំ 10-អ៊ីង OLED panel និងបន្ទះឈីបSnapdragon 8 Elite។ ថាមពលថ្មរបស់ស្មាតហ្វូននេះនឹងមានទំហំតូចជាងថាមពលថ្មនៅលើស្មាតហ្វូនបត់បាន 3 តង់របស់ Huawei នោះគឺ 5,600mAh ។ 

សម្រាប់កាមេរ៉ារបស់ស្មាតហ្វូនបត់បាន 3 តង់ Samsung Tri-Fold នេះ គឺស្រដៀងគ្នាទៅនឹងស្មាតហ្វូន Galaxy Z Fold 7ដែលមានន័យថា ស្មាតហ្វូននេះមានកាមេរ៉ាគោលទំហំ 200MP, 12MP ultrawide, 10MP telephoto camera (3x optical zoom) និងកាមេរ៉ាខាងមុខទំហំ 10MP selfie។ សម្រាប់តម្លៃរបស់ស្មាតហ្វូនបត់បាន 3 តង់នេះ គឺ KRW 4 million (~$2,941)។ ស្មាតហ្វូនបត់បាន 3 តង់ Samsung Tri-Fold នេះ នឹងលក់នៅក្នុងប្រទេសចិន និងកូរ៉េខាងត្បូងប៉ុណ្ណោះ។ 

សូមជំរាបថាថ្មីៗនេះ ក្រុមហ៊ុន Samsung នេះ ក៏បានចែករំលែកនូវផែនការនៃផលិតកម្មរបស់ខ្លួនជាមួយនឹងក្រុមហ៊ុនផ្គត់ផ្គង់ជាច្រើន ប៉ុន្តែមិនទាន់មានការបញ្ជាក់អំពីចំនួននៃការផលិតនៅឡើយទេ។ សម្រាប់អេក្រង់ OLED Panel នឹងធ្វើការផ្គត់ផ្គង់ដោយក្រុមហ៊ុន Samsung Display ហើយវានឹងផ្តោតទៅលើភាពធន់ អាចបត់បាន និងស្តើងបំផុត។ ការផលិតទ្រង់ទ្រាយធំទៅលើអេក្រង់នេះគឺចាប់ផ្តើមនៅក្នុងខែសីហានេះ។ ស្មាតហ្វូននេះនឹងធ្វើការផលិតនៅរោងចក្រផលិតស្មាតហ្វូនរបស់ក្រុមហ៊ុន Samsung នៅតំបន់ Gumi។

គួរបញ្ជាក់ផងដែរថា ក្រុមហ៊ុន Huawei បានបង្ហាញស្មាតហ្វូនបត់បានដំបូងបំផុតរបស់ខ្លួននៅក្នុងខែកញ្ញាឆ្នាំ 2024 នេះ និងលក់ច្រើនជាង 400,000 គ្រឿងនៅក្នុងពេល 2 ខែបន្ទាប់ពីការប្រកាសជាផ្លូវការ។ ក្រុមហ៊ុន Huawei ក៏មានគម្រោងក្នុងការបញ្ចេញនូវស្មាតហ្វូនបត់បាន 3 តង់របស់ខ្លួនក្នុងពេលឆាប់ៗនេះផងដែរ៕