គិតមកដល់ពេលនេះ ស្មាតហ្វូនស៊េរីថ្មី OPPO Find X9 Pro នៅមិនទាន់ប្រកាសជាផ្លូវការនៅឡើយទេ ប៉ុន្តែក្រុមហ៊ុននេះ ក៏បានចាប់ផ្តើមទម្លាយនូវកម្លាំងម៉ាស៊ីនរបស់ស្មាតហ្វូននេះហើយ។ យោងតាមលោក Zhou Yibao ដែលជាប្រធានផ្នែកស្មាតហ្វូន OPPO Find Series នៅពេលនេះ បានទម្លាយថា ស្មាតហ្វូនស៊េរីថ្មី Find X9 Pro Satellite Communication Edition មានពិន្ទុខ្ពស់ដល់ទៅ 4.04 លានគ្រឿងនៅលើ AnTuTub ខណៈដែលពិន្ទុជាក់លាក់គឺ 4,045,997។
ស្មាតហ្វូនជំនាន់ថ្មី Find X9 series ដែលគ្រោងនឹងបង្ហាញខ្លួនឆាប់ៗនេះ គឺនឹងប្រើប្រាស់នូវបន្ទះឈីបជំនាន់ថ្មី Dimensity 9500 របស់ក្រុមហ៊ុន MediaTek ដែលនឹងមានការបំពាក់នូវ 1x Cortex-X930 core ល្បឿន 4.21GHz, 3x Cortex-X930 Cores ល្បឿន 3.5GHz និង 4x Cortex-A730 Cores ល្បឿន 2.7GHz។
គួរបញ្ជាក់ថា កាលពីដើមសប្តាហ៍នេះ លោក Liu Zuohu ដែលជាប្រធានផ្នែកផលិតផលរបស់ OPPO រូបេនះ ធ្លាប់បានបង្ហោះថា ស្មាតហ្វូនជំនាន់ថ្មី Find X9 series នេះ នឹងមានការបដិវត្តន៍ថ្មីទៅលើគុណភាពរូបភាពកាន់តែប្រសើរ។ ស្មាតហ្វូនថ្មីនេះ នឹងបង្ហាញខ្លួនជាផ្លូវការនៅខែក្រោយនេះ។
ស្មាតហ្វូនជំនាន់ថ្មី Find X9 Pro មានការទ្រទ្រង់នូវ Dynamic Triple Exposure ដែលក្រុមហ៊ុន OPPO បានប្រើប្រាស់នៅលើសិនស័រកាមេរ៉ាទំហំ 200MP Ultra-Clear Telephoto ដែលសមត្ថភាពខ្លាំងក្លាបំផុត។ បន្ថែមពីនេះ ក្រុមហ៊ុន OPPO ក៏បានបន្ថែមនូវបច្ចេកវិទ្យា Ultra-level Danxia នៅលើស្មាតហ្វូន Find X9 ជាលើកដំបូងបំផុតផងដែរ បន្ទាប់ពីការ Upgrade ទៅលើប្រព័ន្ធនេះជាមួយនឹងកាមេរ៉ាខាងក្រោយ 3 គ្រាប់។ បើមើលទៅលើបច្ចេកវិទ្យារូបភាពនេះ ក្រុមហ៊ុន OPPO នៅតែបន្តក្នុងការធ្វើការជាមួយនឹងក្រុមហ៊ុន Hasselblad ទៅលើប្រព័ន្ធកាមេរ៉ារបស់ស្មាតហ្វូនថ្មីនេះផងដែរ៕
