កាលពីឆ្នាំមុននេះ ក្រុមហ៊ុន OPPO បានប្រកាសចេញនូវស្មាតហ្វូនអេក្រង់បត់បាន OPPO Find N3 នៅលើទីផ្សារប្រទេសចិន។ យោងតាមការប្រកាសព័ត៌មានកន្លងមក បាននិយាយថា ឆ្នាំនេះ ក្រុមហ៊ុនបច្ចេកវិទ្យាយក្សចិនមួយនេះ នឹងមានការប្រកាសចេញនូវស្មាតហ្វូនអេក្រង់បត់ជំនាន់បន្ទាប់របស់ OPPO Find N3 នោះទេ ហើយក៏មិនមានការបញ្ជាក់ពីមូលហេតុច្បាស់លាស់ផងដែរ។ ថ្មីៗនេះមានរបាយការណ៌ថ្មី បានបញ្ជាក់ថា ក្រុមហ៊ុន OPPO ទំនងជានឹងមានការបង្ហាញចេញនូវស្មាតហ្វូនអេក្រង់បត់ជំនាន់ថ្មីរបស់ខ្លួនម៉ូដែល OPPO Find N5 នៅក្នុងត្រីមាសទី 1 ឆ្នាំ 2025 ខាងមុខនេះហើយ។
ការបែកធ្លាយនូវរបាយការណ៌ខាងលើនេះ គឺត្រូវបានចែកចាយដោយប្រភពជឿជាក់បាន Digital Chat Station នៅក្នុងនោក៏មានការបញ្ចេញនូវព័ត៌មានលំអិតពីលក្ខណៈសម្បត្តិជាច្រើនរបស់ស្មាតហ្វូនអេក្រង់បត់បានម៉ូដែលថ្មីរបស់ក្រុមហ៊ុន OPPO នេះផងដែរ។ សូមជំរាបថា ឆ្នាំនេះ មានស្មាតហ្វូនអេក្រង់បត់បានជាច្រើន ត្រូវបានគេមើលឃើញថា បានបង្ហាញវត្តមាននៅលើទីផ្សារ ក្នុងនោះមានដូចជា Vivo X Fold 3 Pro, Honor Magic V3 និង Samsung Galaxy Z Fold 6 ជាដើម។ ស្មាតហ្វូនទាំងនេះ គឺមានការបំពាក់នូវបន្ទះឈីប Snapdragon 8 Gen 3 ដូចៗគ្នា។
ប៉ុន្តែសម្រាប់ OPPO Find N5 វិញ ត្រូវបាន Digital Chat Station បញ្ជាក់ថា នឹងមានការបំពាក់នូវបន្ទះឈីប SM8750 ដែលលេខម៉ូដែលនេះ ត្រូវបានគេច្បាស់ដឹងថា គឺជាបន្ទះឈីបជំនាន់ថ្មី Snapdragon 8 Gen 4 SoC ដែលក្រុមហ៊ុន Qualcomm គ្រោងនឹងមានការប្រកាសចេញនៅខែក្រោយនេះហើយ។ បន្ថែមពីនេះក៏មានការព្យាករណ៌ថា ស្មាតហ្វូនអេក្រង់បត់បាន Find N5 អាចនឹងក្លាយជាម៉ូដែលដំបូងគេ ដែលបំពាក់នូវបន្ទះឈីប Snapdragon 8 Gen 4 ថែមទៀតផង។
ជាមួយគ្នានេះ នៅក្នុងការបែកធ្លាយនេះក៏មានការបញ្ជាក់ថា អេក្រង់ខាងក្រៅរបស់ស្មាតហ្វូនបត់បានថ្មីនេះ នឹងមានសមត្ថភាពអាចបង្ហញាចេញបានកម្រិត 2K ខណៈដែលកាមេរ៉ាក្រោយចំនួន 3 គ្រាប់ នឹងមានទំហំ 50-Megapixel ដែលគាំទ្រដោយសិនស័ររបស់ Sony ទៀតផង។ កាមេរ៉ានេះ ក៏មានការដាក់បញ្ចូលនូវឡែនPeriscope Telephoto និង Ultra-wide ផងដែរ។ សម្រាប់ការឌីស្សាញម៉ូឌុលកាមេរ៉ាវិញ ត្រូវបានគេទម្លាយថា នឹងមានរាងមូលដូចជំនាន់មុនអញ្ចឹង។ Find N5 នឹងមានទម្ងន់ស្រាល ហើយនិងមានកម្រ៉ាស់ប្រហែលជា 9.x mm។
