យោងតាមការចែកចាយព័ត៌មានថ្មីនៅថ្ងៃនេះ បានបញ្ជាក់ថា ស្មាតហ្វូនអេក្រង់បត់ 3 តង់ Huawei Mate XT នឹងមានការបំពាក់មកជាមួយនូវអេក្រង់ដែលមានភាពធន់រឹងមាំ ហើយនិងមានសមត្ថភាពខ្ពស់បំផុត។ អេក្រង់របស់ស្មាតហ្វូននេះ ត្រូវបានគេទម្លាយថា នឹងមានការផ្គត់ផ្គង់ដោយក្រុមហ៊ុន BOE។ ដូច្នេះប្រសិនព័ត៌មានខាងលើនេះ គឺជាការពិតមែននោះ អ្នកប្រើប្រាស់អាចមានជំនឿថា ស្មាតហ្វូនអេក្រង់បត់ 3 តង់ Huawei Mate XT មានភាពធន់ បើទោះបីជាបត់ 3 តង់ក៏ដោយ។
បើមើលទៅលើការបង្ហោះនៅលើ Weibo ដោយអ្នកទម្លាយ @DigitalChatStation គឺបានបង្ហាញក្រុមហ៊ុនដែលនឹងក្លាយជាអ្នកផ្គត់ផ្គង់អេក្រង់សម្រាប់ស្មាតហ្វូនអេក្រង់បត់បាន 3 តង់ Huawei Mate XT នេះហើយ។ ការបញ្ជាក់ខាងលើនេះ គឺតាមរយៈការដកស្រង់នូវ Commend របស់ហ្វេនៗ ដែលបានសួរទៅកាន់អ្នកទម្លាយខាងលើនេះទៅលើរឿងអេក្រង់នេះ ដោយក្នុងនោះអ្នកទម្លាយ @DigitalChatStation បានឆ្លើយថា អ្នកដែលទទួលបានសិទ្ធិផ្គត់ផ្គង់សម្រាប់ស្មាតហ្វូនអេក្រង់បត់បានថ្មីនេះ គឺជាក្រុមហ៊ុនផលិតអេក្រង់ដែលមានមូលដ្ឋាននៅក្នុងប្រទេសចិន។
ក្រុមហ៊ុនខាងលើនេះ គឺមានទំនាក់ទំនងល្អជាយូរមកហើយជាមួយ Huawei ហើយក៏មានរោងចក្រនៅចិនស្រាប់ទៀតផង ដូច្នេះមានការសន្និដ្ឋានថា ក្រុមហ៊ុននោះ គឺជាក្រុមហ៊ុន BOE។ សូមជំរាបថា ក្រុមហ៊ុន BOE គឺបានធ្វើផ្គត់ផ្គង់អេក្រង់បត់បានសម្រាប់ដៃគូរជាច្រើននៅក្នុងប្រទេសចិនដូច្នេះដំណឹងនេះគឺមិនអ្វីភ្ញាក់ផ្អើលនោះទេ។ សម្រាប់ Pura 70 និង Mate 60 series ក៏ប្រើប្រាស់អេក្រង់របស់ BOE ផងដែរ។
ប្រភពខាងលើនេះ បន្តថា ក្រុមហ៊ុន BOE display នៅពេលនេះ គឺមានគោលដៅធ្វើយ៉ាងណាអាចកាត់បន្ថយទៅលើការស៊ីថាមពលថ្ម និងចំណាំងផ្លាតលើអេក្រង់ ហើយនិងមាននាំមកនូវអេក្រង់ដែលមានគែមស្តើង បង្ហាញចេញបានច្បាស់ មានទម្ងន់ស្រាល ក៏ដូចជាមានកម្រ៉ាស់កាន់តែស្តើង។
ជាមួយនិងការបែកធ្លាយរូបភាពរបស់ Huawei Mate XT ក៏អាចមើលដឹងថា ស្មាតហ្វូនអេក្រង់បត់បាន 3 តង់នេះ មានកម្រ៉ាស់ស្តើង ទម្ងន់ស្រាល និងផ្តល់នូវភាពជឿជាក់បំផុតសម្រាប់អ្នកប្រើប្រាស់។ នៅពេលនេះ Huawei ក៏បានទម្លាយចេញនូវព័ត៌មានមួយចំនួនរបស់ស្មាតហ្វូននេះផងដែរ។ ស្មាតហ្វូននេះ អាចនឹងមានវត្តមាននៅថ្ងៃទី 10 ខែកញ្ញាខាងមុខនេះហើយ។
