ព្រឹត្តិការណ៍ IFA ឬ Industriale Funkausstellung Berlin ត្រូវបានគេបញ្ជាក់ថា នឹងមានការរៀបចំធ្វើឡើង ចាប់ពីថ្ងៃទី 6-10 ខែកញ្ញាខាងមុខនេះ ហើយនៅថ្ងៃនេះ ក្រុមហ៊ុន Tecno ក៏បានប្រកាសអំពីការចូលរួមរបស់ខ្លួននៅក្នុងព្រឹត្តិការណ៍ពិពរណ៍នេះផង ដែរ។ ក្រុមហ៊ុននេះ នឹងមានការបង្ហាញនូវយុទ្ធសាស្រ្ត AI ថ្មីនិងផលិតផល AIoT ជាច្រើនទៀតផងដែរ។
បើតាមការបញ្ជាក់ក្នុងប្រភពខាងលើនេះ បាននិយាយថា ភាគច្រើននៃផលិតផលដែលនឹងដាក់តាំងបង្ហាញនេះ គឺធ្លាប់បានប្រកាសនៅក្នុងព្រឹត្តិការណ៍ MWC 2024 នៅក្នុងទីក្រុងបាសេឡូណាដូចជា Pocket Go handheld console ដំណើរការនូវ Windows និងរ៉ូបូតឆ្កែយន្ត Dynamic 1 ផងដែរ។
លោក Jack Guo ដែលជាប្រធានផ្នែកគ្រប់គ្រងរបស់ក្រុមហ៊ុន Tecno បាននិយាយថា ការអភិវឌ្ឍទៅលើប្រព័ន្ធ AI ecosystem គឺជាផ្នែកមួយដ៏សំខាន់នៃយុទ្ធសាស្រ្តរបស់ក្រុមហ៊ុន។ យើងបានដឹងថាក្រុមហ៊ុន Tecno ចង់បញ្ចូលនូវកំណែ HiOS versions របស់ខ្លួនដែលមានសមត្ថភាពសម្រាប់ការងារ AI ប៉ុន្តែយើងនៅមិនទាន់ច្បាស់ថាឧបករណ៍ណាខ្លះដែលនឹងមានមុខងារនេះទេ។
សម្រាប់ស្មាតហ្វូន Phantom V Fold2 និង Phantom V Flip2 វិញ គឺប្រហែលជាមិនមានវត្តមាននៅក្នុងព្រឹត្តិការណ៍ IFA 2024 នោះទេ។ ស្មាតហ្វូននេះ អាចនឹងបង្ហាញខ្លួននៅក្នុងព្រឹត្តិការណ៍ដាច់ដោយឡែកមួយទៀតនៅក្នុងខែកញ្ញានេះ។ សម្រាប់ព្រឹត្តិការណ៌នេះ យើងអាចនឹងឃើញវត្តមានរបស់ Megabook K16S, Megabook S1 13" និង Megabook T1 14" រួមជាមួយនឹង Megabook T16 Pro 2024 Ultra-laptops,កាសស្តាប់ True Air 1 និង Sonic 2 TWS earphones ក៏ដូចជា FreeHear 1 ដែលជាប្រភេទកាស OWS earbudsដំបូងបំផុតរបស់ក្រុមហ៊ុន Tecno ផងដែរ៕
