កាលពីឆ្នាំ 2023 ក្រុមហ៊ុន OPPO បានធ្វើការប្រកាសចេញស្មាតហ្វូនអេក្រង់បត់ម៉ូដែល Find N3 នៅទីផ្សារប្រទេសចិន ដោយឡែកក្នុងឆ្នាំនេះ OPPO នឹងមិនធ្វើការប្រកាសចេញស្មាតហ្វូនបន្តជំនាន់ពី Find N3 គឺ Find N4 នោះទេ។ ដោយឡែកបើតាមប្រភពព័ត៌មានថ្មីៗនេះ បានបញ្ជាក់ថា OPPO នឹងធ្វើការប្រកាសចេញស្មាតហ្វូនអេក្រង់បត់ជំនាន់ថ្មីរបស់ខ្លួន គឺ Find N5 នៅក្នុងត្រីមាសដំបូងនៃឆ្នាំ 2025។
ក្នុងពេលនេះប្រភពចេញពី Digital Chat Station បានទម្លាយចេញពីលក្ខណៈសម្បតិ្តដែលនឹងមានបំពាក់នូវលើ OPPO Find N5។ ស្មាតហ្វូនអេក្រង់បត់ស៊េរីថ្មីដូចជា Vivo X Fold 3 Pro, Honor Magic V3 និង Samsung Galaxy Z Fold 6 ដែលបានបង្ហាញវត្តមានក្នុងឆ្នាំនេះ គឺបំពាក់បន្ទះឈីប Qualcomm Snapdragon 8 Gen 3។
ដោយឡែកបើតាមប្រភពបញ្ជាក់ពី Digital Chat Station បានបង្ហាញថា Oppo Find N5 នឹងបង្ហាញវត្តមានជាមួយការប្រើប្រាស់បន្ទះឈីបស៊េរី SM8750 ដែលត្រូវបានគេដឹងថាជាលេខកូដសំគាល់បន្ទះឈីបជំនាន់ថ្មី Snapdragon 8 Gen 4 របស់ Qualcomm ដែលនឹងមកដល់នៅខែតុលា ឬខែវិច្ឆិកាឆ្នាំនេះ។ ដូចនេះ អាចបញ្ជាក់បានថា Oppo Find N5 នឹងក្លាយជាស្មាតហ្វូនអេក្រង់បត់ដំបូងគេក្នុងលោកដែលប្រើបន្ទះឈីបកំពូលជំនាន់ថ្មីចុងក្រោយរបស់ Qualcomm មួយនេះ។
ប្រភពដដែលក៏បានបញ្ជាកបន្ថែមទៀតថា OPPO Find N5 នឹងបំពាក់បច្ចេកវិទ្យាអេក្រង់បត់ខាងក្នុង និងអេក្រង់ខាងក្រៅដែលគាំទ្រកម្រិតបង្ហាញ 2K+ រួមនឹងប្រព័ន្ធកាមេរ៉ាក្រោយទំហំ 50MP ជាសែនស័រ Sony ចំនួន 3 គ្រាប់ ដោយក្នុងមានដូចជាសែនស័រគោល សែនស័រ Periscope និង Ultrawide ជាមួយការឌីស្សាញកញ្ចប់កាមេរ៉ារាងរង្វង់ធំដូចគ្នានឹង Find N3 បច្ចុប្បន្នដែរ។
ទោះជាយ៉ាងណាប្រភពមិនបានបង្ហើបពីកម្រាស់ និងទំងន់របស់ Find N5 នោះទេ គ្រាន់តែដឹងថា ស្មាតហ្វូនអេក្រង់បត់ជំនាន់ថ្មីនេះអាចមានកម្រាស់ប្រមាណ 9.0mm នៅពេលបត់។ ជាមួយគ្នានេះ OPPO Find N5 អាចនឹងបង្កើនទំហំថ្មធំជាងជំនាន់ Find N3 ដែលមានថ្មទំហំ 4,800mAh ផងដែរ៕
