យោងតាមព័ត៌មានថ្មីនៅថ្ងៃនេះ បានបង្ហាញថា ក្រុមហ៊ុន Huawei បានយកឈ្នះក្រុមហ៊ុន Apple នៅក្នុងការនាំចេញថេប្លេតនៅក្នុងប្រទេសចិន សម្រាប់រយៈពេល 2 ត្រីមាសជាប់គ្នារួចមកហើយ។ នៅពេលនេះ ក្រុមហ៊ុននេះ ក៏បាននឹងបន្តក្នុងការយកឈ្នះទៀតនៅក្នុងត្រីមាសទី 2 ឆ្នាំ 2024 កន្លងទៅ។ យោងតាមរបាយការណ៍ថ្មីមួយ បាននិយាយថា ក្រុមហ៊ុនផលិតថេប្លេត MatePad នេះ បាននាំចេញថេប្លេតដល់ទៅ 20.5 លានគ្រឿងនៅក្នុងត្រីមាសទី 2 នៅក្នុងឆ្នាំនេះ។
របាយការណ៍ដែលដកស្រង់ចេញពី IDC មុននេះ បានបញ្ជាក់ថា ការនាំចេញថេប្លេត Huawei នៅក្នុងទីផ្សាររបស់ចិន គឺមានការកើនឡើង 46.9% នៅក្នុងត្រីមាសទី 2 ឆ្នាំ 2024។ នៅពេលនេះ Canalys បានបន្តបង្ហាញនូវចំនួនលក់ជាក់ស្តែងទៅលើថេប្លេតរបស់ក្រុមហ៊ុននេះហើយ។ យោងតាមរបាយការណ៍របស់ក្រុមហ៊ុនស្រាវជ្រាវទីផ្សារនេះ បញ្ជាក់ថា ក្រុមហ៊ុន Huawei បាននាំចេញថេប្លេតបានចំនួន 20.5 លានគ្រឿងនៅក្នុងទីផ្សាររបស់ចិនសម្រាប់ត្រីមាសទី 2 ឆ្នាំ 2024 នេះ។ ក្រុមហ៊ុននេះ បានជាប់ចំណាត់ថ្នាក់លេខ 1 ដែលយកឈ្នះក្រុមហ៊ុន Apple, Xiaomi និង Honor ។ ក្រុមហ៊ុននេះមានចំណែកទីផ្សារចំនួន 26% ។
ក្រុមហ៊ុនបច្ចេកវិទ្យាយក្សនេះ ទទួលបានជោគជ័យនៅក្នុងការនាំចេញ និងចំណែកទីផ្សារបើធៀបទៅនឹងឆ្នាំមុននេះ។ ចំនួននៃការនាំចេញថ្មីនេះ ក៏បានជម្រុញអោយកំណើនប្រចាំឆ្នាំរបស់ក្រុមហ៊ុននេះ កើនឡើងដល់ទៅ 66% ផងដែរ។ Canalys បានបញ្ជាក់ទៀតថា ទីផ្សារថេប្លេតរបស់ចិន ក៏មានការប្រកួតប្រជែងខ្លាំងជាមួយនឹងក្រុមហ៊ុនជាច្រើនក្នុងស្រុកដូចជា Huawei ជាដើម។ ក្រុមហ៊ុននេះ ក៏បង្ហាញនូវថេប្លេត Matepad ជាច្រើនម៉ូដែលនៅក្នុងឆ្នាំនេះ។ ថេប្លេតចុងក្រោយបំផុតនោះគឺ MatePad Pro 12.2 ដែលមានអេក្រង់ Dual-layer OLED ថែមទៀតផង។
ក្រឡេកមកមើលក្រុមហ៊ុន Apple វិញ គឺមានការតាមពីក្រោយក្រុមហ៊ុន Huawei ដែលមានការនាំចេញថេប្លេតនៅក្នុងប្រទេសចិនបានចំនួន 20.1 លានគ្រឿង។ ខណៈពេលដែលចំនែកទីផ្សាររបស់ក្រុមហ៊ុននេះប្រហែលទៅនឹងក្រុមហ៊ុន Huawei ផងដែរ iPad មានការធ្លាក់ចុះចំនួន 14% នៅក្នុងកំនើនប្រចាំឆ្នាំ។ ក្រុមហ៊ុន Xiaomi គឺជាប់ចំណាត់ថ្នាក់លេខ 3 ជាមួយនឹងការនាំចេញថេប្លេតចំនួន 9.25 និងចំនែកទីផ្សារចំនួន12%។
ក្រុមហ៊ុន Honor ជាប់ចំណាត់ថ្នាក់លេខ 4 ដែលមានការនាំចេញថេប្លេតចំនួន 6.5 លានគ្រឿង និងចំណែកទីផ្សារនៅក្នុងទីផ្សារថេប្លេតរបស់ចិន ចំនួន 8% ជាមួយកំណើនដល់ទៅ 63% បើធៀបទៅនឹងឆ្នាំមុននេះ។ ក្រុមហ៊ុន Lenovo គឺជាប់ចំណាត់ថ្នាក់លេខ 5 ជាមួយនឹងប្រាក់កំណើនប្រចាំឆ្នាំ 12%។ ក្រុមហ៊ុននេះ នាំចេញថេប្លេតបានចំនួនត្រឹនតែ 4.9 លានគ្រឿង និងចំណែកទីផ្សារចំនួន 6%៕
