គិតរហូតមកដល់នឹងពេលនេះ គឺនៅមិនទាន់មានសំណួរចោទឡើងនោះទេ សម្រាប់ការរចនារូបរាងរបស់រថយន្ត Hyundai អស់រយៈពេលជាយូរមកហើយចាប់តាំងពីរថយន្តដំបូងបានបង្ហាញខ្លួននៅក្នុងសហរដ្ឋអាមេរិកនៅក្នុងឆ្នាំ 1986 នោះ។ ក្រុមហ៊ុន Hyundai ក៏បានចាប់ផ្តើមផ្តោតទៅលើរចនាម៉ូដសម្រាប់រថយន្តរបស់ខ្លួន។ នៅថ្ងៃនេះ ក្រុមហ៊ុន Hyundai ក៏មានអ្វីថ្មីដែលបង្ហាញសម្រាប់អ្នកគ្រប់គ្នាអោយបានឃើញអំពីការរចនាម៉ូដដ៏ប្រណិតរបស់រថយន្តខ្លួនផងដែរ។
នៅក្នុងបទសម្ភាសន៍ជាមួយនឹង Automotive News លោក SangYup Lee ដែលជាអនុប្រធានផ្នែករចនាម៉ូដរបស់ក្រុមហ៊ុន Hyundai បានបង្ហាញជំហរថាសម្រាប់ការរចនារថយន្ត Hyundai នាពេលអនាគតនឹងស៊ិចស៊ីដូចគ្នាទៅនឹងរថយន្ត Alfa Romeo។ នេះពិតជាការរចនាម៉ូដដ៏អស្ចារ្យ ហើយលោក Lee ក៏បានបង្ហាញនូវការងាររបស់គាត់ផងដែលធ្លាប់ធ្វើកន្លងមកផងដែរ។
ការងារពីមុនរបស់គាត់មានដូចជាគំនិតនៃការរចនាទៅលើរថយន្តជំនាន់ទី 5 របស់ Chevrolet Camaro រថយន្ត C6 Corvette Stingray និងរថយន្ត Bentley’s EXP 10 Speed 6។ មួយនៅក្នុងចំណោមគម្រោងជាច្រើនរបស់លោកនៅក្នុងក្រុមហ៊ុន Hyundai គឺគំនិតនៃការរចនារថយន្ត Le Fil Rouge ដែលយកមកតាំងបង្ហាញនៅក្នុងព្រឹត្តិការណ៍ Geneva កាលពីខែមីនាឆ្នាំមុននេះ។ គំនិតនេះ បានបង្ហាញអំពីការរចនារូបរាងដ៏ប្រណិតសម្រាប់រថយន្តជាច្រើនទៀតរបស់ក្រុមហ៊ុន Hyundai នោះ។
លោក Lee បានពន្យល់ថា “រថយន្តនេះ គឺជាផលិតផលដ៏អស្ចារ្យ។ យើងចង់ផ្តល់នូវគុណតម្លៃសម្រាប់អ្នកប្រើប្រាស់។ រថយន្ត Alfa Romeo និង Maserati គឺជារថយន្តដ៏ស៊ិចស៊ី ហើយក្រុមហ៊ុនអាល្លឺម៉ង់ ជាច្រើនក៏ចាប់អារម្មណ៍ខ្លាំងពីរថយន្តរបស់អ៊ីតាលីផងដែរ។ នេះគឺដោយសារតែភាពស្រស់ស្អាតរបស់វា។ សម្រាប់ក្រុមហ៊ុន Hyundai នឹងផ្តល់នូវការរចនាកាន់តែស៊ិចស៊ីជាងរថយន្ត Alfa Romeo ហើយនេះ គឺជាបេសកកម្មដែលយើងចង់សម្រេចបាន។ ក្រុមហ៊ុន Hyundai មានរថយន្តស៊ិចស៊ីជាច្រើនស៊េរី ហើយវាស៊ិចស៊ីជាងរថយន្ត Alfa Romeo។ នេះគឺជាសារដែលខ្ញុំចង់ប្រាប់ទៅកាន់ពិភពលោក៕”
