នៅថ្ងៃនេះ ក្រុមហ៊ុនហ៊ីយ៉ាន់ដាយ និងទីភ្នាក់ងារសហប្រតិបត្តិការអន្តរជាតិកូរ៉េ KOICA រួមនិងក្រសួងសាធារណការនិងដឹកជញ្ជូននៃព្រះរាជាណាចក្រកម្ពុជា បានរៀបចំពិធីផ្សព្វផ្សាយនូវយុទ្ធនាការសុវត្ថិភាពចរាចរណ៍ផ្លូវគោកសម្រាប់កុមារកម្ពុជា បានផ្តល់នូវមួកសុវត្ថិភាព និងរនាំងការពារ ជូនដល់លោកគ្រូ អ្នកគ្រូ និងសិស្សានុសិស្ស នៃសាលាបឋមសិក្សាកុលាប 1។
ពិធីនេះ បានប្រព្រឹត្តិទៅនៅសាលាបឋមសិក្សាកុលាប ទី1 ក្រោមវត្តមានលោក Brian Ko ដែលជានាយកប្រតិបត្តិ និងជាប្រធានក្រុមហ៊ុន ហ៊ីយ៉ាន់ដាយខេមកូម៉ូ ធ័រ និងលោកជំទាវ មឹន មាណវី រដ្ឋលេខាធិការក្រសួងសាធារណការនិងដឹកជញ្ជូន និងជាអគ្គលេខានៃអគ្គលេខាធិការដ្ឋាននៃ គណកម្មការជាតិសុវត្ថិភាពចរាចរណ៍ផ្លូវគោក ហើយនិង លោក ញ៉ែម សារ៉ន នាយកសាលាបឋមសិក្សាកូលាប 1 ក៏ដូចជាតំណាងទីភ្នាក់ងារសហប្រតិបត្តិការអន្តរជាតិកូរ៉េ KOICA នឹងលោកគ្រូ អ្នកគ្រូ ព្រមទាំងសិស្សានុសិស្សនៅសាលានេះជាច្រើនរូប។
លោក Brian Ko ដែលជានាយកប្រតិបត្តិ និងជាប្រធានក្រុមហ៊ុន ហ៊ីយ៉ាន់ដាយ ខេមកូម៉ូធ័រ បានមានប្រសាសន៍ ថា កាលពីខែវិច្ឆិកា ឆ្នាំ 2011 កន្លងទៅ មានរឿងមួយដែលលោកមិនអាចបំភ្លេចបាន គឺនៅពេលដែលលោកបានបើកបរឆ្លងកាត់ផ្លូវសហព័ន្ធរូស្ស៊ី មុខព្រលានយន្តហោះអន្តរជាតិភ្នំពេញ ហើយក៏បានប្រទះឃើញគ្រោះថ្នាក់ចរាចរណ៍មួយ ដែលបានបណ្តាលអោយក្មេងពីរនាក់ រងគ្រោះនៅក្នុងថ្លុកឈាម ជាមួយម៉ូតូខ្ទេចខ្ទី ដែលត្រូវបានឡានកិន ស្របពេលម្តាយរបស់ពួកគេ បានត្រឹមតែទ្រហោយំអាណិតកូនប៉ុណ្ណោៈ ដោយគ្មាននរណាម្នាក់អាចជួយកូនគាត់បានឡើយ។ លោកបានមើលឃើញថា ប្រសិនបើពាក់មួកសុវត្ថិភាព ក្មេងទាំងពីរនោះ នឹងគ្មានគ្រោះថ្នាក់ឡើយ។
ហេតុដូច្នេះហើយ គោលដៅរបស់ក្រុមហ៊ុនហ៊ីយ៉ាន់ដាយ និងទីភ្នាក់ងារសហប្រតិបត្តិការអន្តរជាតិកូរ៉េ KOICA រួមនិងក្រសួងសាធារណការនិងដឹកជញ្ជូននៃព្រះរាជាណាចក្រកម្ពុជា នៅថ្ងៃនេះ គឺធ្វើយ៉ាងណាចូលរួមកាត់បន្ថយការស្លាប់ និងរបួសដោយគ្រោះថ្នាក់ចរាចរណ៍ផ្លូវគោក ក្នុងចំណោមកុមារទំាងឡាយ តាមរយៈការយល់ដឹងនិងយុទ្ធនាការសុវត្ថិភាពចរាចរណ៍ផ្លូវគោក។
គោលដៅផ្សេងទៀត គឺចូលរួមកែលំអអាកប្បកិរិយារបស់អ្នកប្រើប្រាស់ផ្លូវគោក ដើម្បីកែលំអកន្លែងសម្រាប់ថ្មើរជើងឆ្លងកាត់សម្រាប់កុមារ និងដើម្បីលើកកម្ពស់ចំណេះដឹងក្នុងចំណោមកុមារនៅពេលធ្វើដំណើរតាមផ្លូវ។ អ្វីដែលពិសេស គឺចូលរួមគាំទ្រដល់រាជរដ្ឋាភិបាលនៃប្រទេសកម្ពុជា នៅក្នុងការលើកកម្ពស់ការយល់ដឹង អំពីសុវត្ថិភាព ចរាចរណ៍ផ្លូវគោក នៅក្នុងចំណោមកុមារ ដែលជាអ្នកប្រើប្រាស់ផ្លូវ និងជាជនងាយរងគ្រោះដោយគ្រោះថ្នាក់ចរាចរណ៍ ហើយនិងដើម្បីកាត់បន្ថយការស្លាប់និងរបួសដោយសារគ្រោះថ្នាក់ចរាចរណ៍។
ជាមួយនឹងយុទ្ធនាការនៅថ្ងៃនេះ ក្រុមហ៊ុន ហ៊ីយ៉ាន់ដាយ បានធ្វើការឧបត្ថម្ភប្រគល់មួកសុវត្ថិភាព និងរនាំងសុវត្ថិភាព ជូនទៅសាលាបឋមសិក្សាកុលាបទី 1 ដើម្បីចែកជូនជូនលោកគ្រូ អ្នកគ្រូនៅសាលានេះ នៅក្នុងគោលបំណងចូលរូមចំណែកក្នុងសកម្មភាពសង្គមលើសុវត្ថិភាពចរាចរណ៍ផ្លូវគោក។
គួររំលឹកផងដែរថា កាលពីថ្ងៃទី 29 ខែកក្កដា ឆ្នាំ 2018 កន្លងទៅនេះ ក្រុមហ៊ុនហ៊ីយ៉ាន់ដាយ ខេមកូម៉ូធ័រ រួមជាមួយទីភ្នាក់ងារសហប្រតិបត្តិការណ៍អន្តរជាតិកូរ៉េ (KOICA) ក៏បានផ្ដល់មួកសុវត្ថិភាពចំនួន 894 មួក ស្លាកចំណាំងផ្លាតសម្រាប់កង់ និងម៉ូតូចំនួន 10000 ផ្ទាំង, ផ្លិតអប់រំសុវត្ថិភាពចំនួន 21600 ផងដែរ ជូនទៅក្រសួងសាធារណការនិងដឹកជញ្ជួន។ ហើយសម្ភារៈមួយចំនួន ក៏ត្រូវបានប្រគល់ជូនសិស្សានុសុស្សនៃសាលាបឋមសិក្សាកុលាបទី1 ផងដែរ។