គិតមកមកទល់នឹងពេលនេះ គឺមានរយៈពេលពីរឆ្នាំមកហើយ ដែលមានព័ត៌មានចុះផ្សាយថា រថយន្ត Pick-Up ស៊េរីថ្មី Hyundai Santa Cruz នឹងមានការបង្ហាញខ្លួននៅក្នុងហាងលក់នៅក្នុងសហរដ្ឋអាមេរិក។ ឥលូវនេះ ស្រាប់តែមាន ព័ត៌មានថ្មីបបង្ហាញថា នៅឆ្នាំ 2020 ខាងនេះ យើងនឹងឃើញនូវរថយន្តប្រភេទ Pick-Up ខ្នាតតូចរបស់ក្រុមហ៊ុន Hyundai បើកបរនៅលើដងផ្លូវនាពេលឆាប់ៗនេះហើយ។
នៅក្នុងព័ត៌មានខាងលើនេះ មានការបញ្ជាក់ថា Hyundai Santa Cruz ដែលជារថយន្តស៊េរីថ្មីនេះ នឹងមានការផលិតមួយឆ្នាំមុននេះ ហើយលោក Brian Smith ដែលជា COO របស់ក្រុមហ៊ុន Hyundai Motor America ក៏បានប្រាប់ទៅកាន់ Motor Trend ផងដែរថា ពួកគេស្រឡាញ់រថយន្តនេះ ហើយពួកគេនិយាយអំពីរថយន្តនេះ គ្រប់ពេលវេលាថែមទៀតផង។
លោក Kyung Soo “Ken” Lee ដែលជានាយកប្រតិបត្តិរបស់ក្រុមហ៊ុន Hyundai Motor America បានប្រសាសន៍បញ្ជាក់ទៅកាន់ Detroit Bureau ថា ក្រុមហ៊ុន Hyundai មានគម្រោងក្នុងការប្រកាសចេញនូវរថយន្ត Hyundai Santa Cruz ស៊េរីថ្មីនេះ នៅក្នុងទីផ្សាររបស់សហរដ្ឋអាមេរិកនៅក្នុងឆ្នាំ 2020 ឬឆាប់ៗនេះ។ លោក Lee នៅមិនទាន់ធ្វើការទម្លាយព័ត៌មានអ្វីអំពីការរចនាទៅលើរថយន្តនេះនោះទេ។
សំណួរដែលធំជាងគេដែលទាក់ទងនឹងព័ត៌មាននៃ Hyundai Santa Cruz នោះគឺថា តើរថយន្តនេះ នឹងមានទំហំធំប៉ុណ្ណា ហើយតើរូបរាងរបស់វាយ៉ាងម៉េចទៅ? តើក្រុមហ៊ុន Hyundai នឹងធ្វើការបញ្ចេញនូវរថយន្តដែលមានទំហំ Mid-Size នេះ សម្រាប់រថយន្ត SantaFe ផ្អែកទៅលើរថយន្ត Toyota Tacoma, Chevy Colorado និង Nissan Frontier នោះ? តើរថយន្តនេះ នឹងមានតម្លៃថោក និងទំហំតូចជាងមុនទេ?
សូមជំរាបថា កាលពីប៉ុន្មានឆ្នាំមុននេះ មានការប៉ាន់ស្មានថា រថយន្ត Hyundai Santa Cruz នេះ នឹងធ្វើការប្រកួតប្រជែងជាមួយនឹងរថយន្ត Ranger Raptor របស់ Ford ដែលពេលនេះ មិនទាន់បង្ហាញខ្លួននៅក្នុងអាមេរិកខាងជើងនៅឡើយទេ ស្របពេលដែលនៅក្នុងទ្វីបជាច្រើនទៀត រថយន្ត Ford Ranger Raptor កំពុងតែមានការពេញនិយមខ្លាំងណាស់៕