រហូតមកដល់ពេលនេះ ក្រុមហ៊ុនផលិតរថយន្ត Tesla ត្រូវបានគេមើលឃើញថា នៅតែមានឧបសគ្គជាច្រើនរាប់រយមុនពេលដែលអាចបំពេញនូវគោលដៅរបស់ខ្លួនបាន ដែលបានធ្វើអោយវាក្លាយជាផលចំណេញសម្រាប់ក្រុមហ៊ុនដៃគូប្រកួតប្រជែងនៅក្នុងការដណ្តើមយកនូវចំណែកទីផ្សានេះ ពិសេស នឹងធ្វើអោយដំណើរការរបស់ក្រុមហ៊ុននេះ កាន់តែពិបាកជាមុនផងដែរ។ ថ្មីៗនេះ ក្រុមហ៊ុន Mercedes-Benz ត្រូវបានគេមើលឃើញថា គឺបានក្លាយជាក្រុមហ៊ុនផលិតរថយន្តចុងក្រោយបំផុត ដែលបានបង្ហាញចេញនូវរថយន្តអគ្គិសនីរបស់ខ្លួនគឺ Mercedes-Benz EQC ។
រថយន្តអេឡិចត្រូនិក SUV ដែលក្រុមហ៊ុន Mercedes-Benz បានប្រកាសចេញនៅ Stockholm នេះ នឹងចាប់ផ្តើមផលិតនៅក្នុងឆ្នាំ 2019 នេះបើតាមការបញ្ជាក់របស់ក្រុមហ៊ុន CNBC។ ក្រុមហ៊ុនអល្លឺម៉ង់មួយនេះ នឹងចាប់ផ្តើមនូវការផលិតដំបូងបំផុតនៅក្នុងរោងចក្រ Bremen នៅក្នុងប្រទេសអាល្លឺម៉ង់។ លោក Markus Schafer ក្រុមប្រឹក្សារបស់ក្រុមហ៊ុន Mercedes-Benz បាននិយាយថា វិធីសាស្រ្តនេះ នឹងជួយបង្កើនទៅលើប្រសិទ្ធិភាពនៃផលិតកម្មផងដែរ។
លោក Schafer បានប្រាប់ទៅកាន់ CNBC ថា “ការសម្រេចចិត្តរបស់យើងនៅក្នុងការផលិតរថយន្តអគ្គិសនី នៅក្នុងរបៀបដូចគ្នាទៅនឹងរថយន្តជាច្រើនជាមួយនឹងការពង្រឹងទៅលើកម្លាំងម៉ាស៊ីន គឺត្រូវការប្រសិទ្ធិភាពល្អបំផុត ដើម្បីអាចធ្វើការបន្តការធានាទៅលើប្រសិទ្ធិភាពកម្រិតខ្ពស់ និងគុណភាពខ្ពស់នៅក្នុងដំណើរការនៃការផលិត។” ការធ្វើអធិប្បាយជាច្រើន របស់លោក Schafer គឺបានរំលឹកទៅដល់បញ្ហាខ្លះនៃការផលិតរបស់ក្រុមហ៊ុន Tesla ជាមួយនឹងរថយន្ត Model 3 នៅដើមឆ្នាំនេះ។
សម្រាប់ថាមពលថ្មរបស់រថយន្ត Mercedes-Benz EQC ត្រូវបានគេរាយការណ៍ថា អាចធ្វើដំណើរបានចម្ងាយដល់ទៅ 450 គីឡូម៉ែត្រ ឬប្រហែលជា 280 ម៉ាយ៍។ បើធៀបជាមួយនឹងរថយន្ត Tesla Model 3 គឺអាចធ្វើដំណើរបានចម្ងាយ 220 ម៉ាយ៍ប៉ុណ្ណោះ។ សម្រាប់ការប្រកួតប្រជែងកាន់តែច្រើនពីក្រុមហ៊ុនផលិតរថយន្តនានានៅពេលនេះ គឺអាចជាផលល្អសម្រាប់អតិថិជនរបស់ខ្លួន ប៉ុន្តែក្រុមហ៊ុន Tesla វិញ គឺជាឧបសគ្គដ៏អាក្រក់បំផុត៕
