បើក្រឡេកទៅមើលលើទីផ្សាររថយន្ត ឃើញថា បដិវត្តន៍នៃរថយន្តអគ្គិសនី EV របស់ក្រុមហ៊ុន Volkswagen នឹងបង្ហាញខ្លួននៅក្នុងពេលឆាប់ៗនេះ។ ស្របពេលដែលការផលិតរថយន្តគ្រឿងអេឡិចត្រូនិក នៅក្នុងសហរដ្ឋអាមេរិក ត្រូវគេរំពឹងថា នឹងធ្វើឡើងនៅក្នុងរោងចក្រ Chattanooga នៅ Tennessee។ ពេលនេះ ក្រុមហ៊ុនផលិតរថយន្តនេះ បានបញ្ជាក់ថា ខ្លួននឹងធ្វើការបង្កើតនូវរោងចក្រថ្មីមួយនៅក្នុងអាមេរិកខាងជើង ដើម្បីធ្វើការផលិតរថយន្តអេឡិចត្រូនិច។ ក្រុមហ៊ុន Volkswagen បាននិយាយថា រោងចក្ររបស់ខ្លួននឹងចាប់ផ្តើមបើកដំណើរការនៅឆ្នាំ 2022 ប៉ុន្តែសម្រាប់ទីតាំងជាក់លាក់របស់វានៅមិនទាន់បញ្ជាក់នៅឡើយទេ។
លោក Thomas Ulbrich សមាជិកក្រុមប្រឹក្សាភិបាលរបស់ក្រុមហ៊ុន Volkswagen បាននិយាយថា “ក្រុមហ៊ុននៅមិនទាន់មានការសម្រេចចិត្តណាមួយកើតឡើងរហូតមកទល់ពេលនេះទេ។ យើងគិតថា រោងចក្រថ្មីនេះ សាកសមសម្រាប់រោងចក្រនៅក្នុង Chattanooga ប៉ុន្តែនៅមិនទាន់មានគម្រោងច្រើនជាងនេះទៀតនោះទេ។ ” ផ្អែកទៅលើសម្តីរបស់គាត់នោះ ហាក់ដូចជារោងចក្រ Chattanooga នឹងធ្វើការពង្រីកទៅលើការផលិតរថយន្តអគ្គិសនី ជាពិសេសគឺការផលិតទៅលើរថយន្ត Atlas SUV និងរថយន្ត Passat sedan ។
រោងចក្រថ្មីនៅក្នុងសហរដ្ឋអាមេរិកខាងជើងនេះនឹងក្លាយជារោងចក្រមួយនៅក្នុងការផលិតរថយន្តមួយក្នុងចំណោមរថយន្តអគ្គិសនីចំនួន 16 គ្រឿងដែលក្រុមហ៊ុនបច្ចេកវិទ្យា VW នឹងធ្វើការផលិតនៅក្នុងឆ្នាំ 2022 ដែលជាផ្នែកមួយនៃការវិនិយោគទឹកប្រាក់ 40 ពាន់លានដុល្លារអាមេរិក។ ភាគច្រើននៃរថយន្តនេះគឺសិ្ថតនៅក្នុងប្រទេសចិន ដែលពីរម៉ូដែលនឹងជួយក្រុមហ៊ុន Volkswagen ក្នុងការជៀសវាងទៅលើការបង់ពន្ធទៅលើការលក់រថយន្តអគ្គិសនីនៅទីនេះ។ សម្រាប់រថយន្តផ្សេងទៀតគឺសិ្ថតនៅក្នុងអ៊ឺរ៉ុប។
ថ្មីៗនេះ រថយន្តអគ្គិសនី e-Golf EV នឹងធ្វើការផលិតនៅក្នុងរោងចក្រជាច្រើននៅក្នុង Wolfsburg និង Dresden នៅក្នុងប្រទេស អាល្លឺម៉ង់។ នៅឆ្នាំក្រោយនេះ រោងចក្រ Zwickau របស់ក្រុមហ៊ុន Volkswagen រួមទាំងនៅក្នុងអាល្លឺម៉ង់នឹងត្រូវផ្លាស់ប្តូរទៅជារោងចក្រផលិតរថយន្តអគ្គិសនីដែលមានសមត្ថភាពនៅក្នុងការផលិតរថយន្តចំនួន 330,000 គ្រឿងនៅក្នុងរយៈពេលមួយឆ្នាំជាមួយនឹងការចាប់ផ្តើមទៅលើរថយន្ត I.D. hatchback និង I.D. Crozz Crossover ៕