ដើមឡើយ, ក្រុមហ៊ុន Ford គ្រោងនឹងផលិតរថយន្តទំនើបម៉ាក GT របស់ខ្លួនប្រមាណតែ 500 គ្រឿងប៉ុណ្ណោះ ប៉ុន្តែបន្ទាប់មកចំនួននេះ ត្រូវបានកើនឡើងរហូតដល់ជិត 1000 គ្រឿង។ នៅក្នុងព្រឹត្តិការណ៍មួយនៅឯទីស្នាក់ការក្រុមហ៊ុន Dearborn របស់ក្រុមហ៊ុន Michigan ក្រុមហ៊ុន Ford បានប្រកាសថា ខ្លួននឹងផលិតរថយន្តស្ព័រដ៏ទំនើបម៉ាក GT SuperCar របស់ខ្លួនចំនួនប្រមាណ 350 បន្ថែមទៀត ព្រោះថា ក្រុមហ៊ុនទទួលបានការចុះឈ្មោះក្នុងបញ្ជីកក់មុនរបស់អតិថិជនមានចំនួនច្រើនលើសលប់លើសពីការរំពឹងទុករបស់ក្រុមហ៊ុន។
Ford នឹងបើកអោយអតិថិជន ដែលមានបំណងចង់ក្លាយជាម្ចាស់រថយន្ត GT ធ្វើការបំពេញបែបបទដើម្បីធ្វើការកក់ទុកមុនជាលើកទីពីរនៅលើបណ្តាញវ៉ិបសាយផ្លូវការណ៍ fordgt.com ដែលនឹងចាប់ផ្តើមពីថ្ងៃទី 08 នាខែវិច្ឆិកាទៅដោយមានរយះពេល 30 ថ្ងៃ។ កំឡុងឆ្នាំ 2016 ក្រុមហ៊ុន Ford ទទួលបានការចុះឈ្មោះបញ្ជាទិញមុនពីអតិថិជនប្រមាណ 7000 នាក់សម្រាប់គំរូរថយន្ត GT ដែលក្រុមហ៊ុនបានប្រកាសថា នឹងត្រូវផលិតដំបូងប្រមាណតែ 500 គ្រឿងប៉ុណ្ណោះ។ អតិថិជនដែលទទួលបានជោគជ័យពីការដាក់ពាក្យទិញរថយន្តស័្ពរ GT នឹងត្រូវបានជ្រើសរើសអោយធ្វើការជាមួយនឹងសេវាកម្មរថយន្ត Ford GT ដើម្បីទទួលបានបទពិសោធន៍សម្រាប់ការទិញរថយន្តផ្ទាល់ខ្លួន។
Ford បានបញ្ជាក់ថា សម្រាប់រថយន្ត Ford GT នេះ ក្រុមហ៊ុនគ្រោងផលិតដំបូងប្រមាណ 500 គ្រឿង វានឹងត្រូវបញ្ចប់នៅខែតុលាឆ្នាំ 2020 ហើយសម្រាប់ដំណាក់កាលចង្វាក់ផលិតកម្ម GT លើកទីពីរដែលមានចំនួន 350 គ្រឿងបន្ថែមទៀតនោះនឹងត្រូវបន្តរហូតដល់ឆ្នាំ 2022។ Ford GT គឺជាគំរូរថយន្តស័្ពរដ៏ទំនើបមួយរបស់ក្រុមហ៊ុន Ford ដែលទទួលបានការចាប់អារម្មណ៍ខ្លាំងក្រោយពេលដែលក្រុមហ៊ុនបានយកទៅដាក់តាំងបង្ហាញនៅក្នុងព្រឹត្តិការណ៍ពិពណ៌រថយន្ត Detroit Auto Show កាលពីខែមករា ឆ្នាំ 2015។
រថយន្តស្ព័រដ៏ទំនើបនេះ នឹងត្រូវផលិតឡើងដោយមានការបំពាក់នូវម៉ាស៊ីនកំលាំងខ្លាំងប្រភេទ twin-turbocharged, 3.5-liter EcoBoost V6 engine ដែលភ្ជាប់នូវមុខងារបង្កើនសន្ទុះម៉ាស៊ីនខ្លាំងបំផុត carbon fiber architecture និង active aerodynamics ដែលធ្វើអោយសន្ទុះល្បឿនរបស់វាលឿនបំផុតដល់ទៅ 216 គីឡូម៉ែត្រក្នុងមួយម៉ោង។ សម្រាប់តម្លៃរបស់រថយន្ត Ford GT ដំបូងត្រូវបានគេប៉ាន់ប្រមាណថាខ្ទង់ប្រហែល $450,000 អាមេរិក ប៉ុន្តែក្រុមហ៊ុន Ford ផ្ទាល់បានបង្ហើបថាតម្លៃនេះនឹងកើនឡើងដល់ $500,000 អាមេរិកសម្រាប់ម៉ូដែល GT ឆ្នាំ 2019៕
