លោក Carlos Ghosn ដែលជាអគ្គនាយករបស់ក្រុមហ៊ុន Nissan ត្រូវបានចាប់ខ្លួនបន្ទាប់ពីក្រុមហ៊ុនផលិតរថយន្តនេះ បានរកឃើញនូវរបាយការណ៍ ហិរញ្ញវត្ថុប្រចាំឆ្នាំ ដែលមានភាពខុសឆ្គងយ៉ាងខ្លាំង។ លោក Ghosn ត្រូវបានចោទប្រកាន់ថា ប្រើបានប្រាស់នូវទ្រព្យសកម្មរបស់ក្រុមហ៊ុនសម្រាប់ការប្រើប្រាស់ផ្ទាល់ខ្លួន។ នេះគឺជាការប្រកាសមួយ ដែលពិតជាមានការភ្ញាក់ផ្អើលមែនទែនសម្រាប់អ្វីដែលត្រូវគេមើលឃើញថា លោក គឺជាមនុស្សដ៏សំខាន់ម្នាក់របស់ក្រុមហ៊ុន Nissan និងនាំមកនូវភាពជោគជ័យដល់សម្ព័ន្ធ Renault-Nissan-Mitsubishi Alliance ផងដែរ។
បុរសជនជាតិបារាំង-ប្រេស៊ីលនេះ គឺជាមនុស្សម្នាក់ ដែលទទួលខុសត្រូវទៅលើគម្រោងមួយដែលមានឈ្មោះហៅថា Nissan Revival Plan នៅក្នុងឆ្នាំ 1999 ហើយនៅពេលនោះ ក្រុមហ៊ុននេះ ក៏មានការខាតបង់ទឹកប្រាក់ច្រើនជាង 20 ពាន់លានដុល្លារអាមេរិកនៅក្នុងបំណុលផងដែរ។ លោក Ghosn ក៏បានធ្វើការសម្រេចចិត្ត ដ៏តានតឹងនៅក្នុងការបិទរោងចក្ររបស់ក្រុមហ៊ុន Nissan និងការកាត់បន្ថយបុគ្គលិកដល់ទៅ 14% ថែមទៀត។ យុទ្ធសាស្រ្តនេះ គឺមានប្រសិទ្ធិភាព ប៉ុន្តែនៅក្នុងសកម្មភាពជាច្រើនរបស់លោក Ghosn ត្រូវបាន គេចោទជាសំណួរ។ នៅក្នុងសេចក្តីថ្លែងការណ៍នៅថ្ងៃនេះ ក្រុមហ៊ុន Nissan ក៏បានទម្លាយថា ខ្លួនក៏ធ្វើការជាមួយនឹងការិយាល័យព្រះរាជអាជ្ញាសាធារណៈរបស់ជប៉ុន (Japanese Public Prosecutors Office) នៅក្នុងការស៊ើបអង្កេតទៅលើលោក Ghosn និងអ្នកតំណាងលោក Greg Kelly ផងដែរ។
ក្រុមហ៊ុនផលិតរថយន្តនេះនិយាយថា “ការស៊ើបអង្កេតនេះបង្ហាញថា នៅក្នុងរយៈពេលជាច្រើនឆ្នាំនេះលោក Ghosn និង Kelly ធ្វើរបាយការណ៍នៅក្នុងស្តុកនៃ Tokyo Stock Exchange ដែលមានចំនួនតិចជាងទឹកប្រាក់សរុបជាក់ស្តែង។ លោក Ghosn ក៏មានការប្រព្រឹត្តិមិនត្រឹមត្រូវជាច្រើនទៀតដូចជាការប្រើប្រាស់នូវទឹកប្រាក់ផ្ទាល់ខ្លួនដែលយកចេញពីទ្រព្យសកម្មរបស់ក្រុមហ៊ុន ហើយវាពិតជាមានការពាក់ព័ន្ធជាមួយនឹងលោក Kelly ផងដែរ។” CEO របស់ក្រុមហ៊ុន Nissan លោក Hiroto Saikawa ពេលនេះក៏ស្នើរទៅកាន់ក្រុមប្រឹក្សាភិបាលរបស់ក្រុមហ៊ុនអោយដកតំណែងរបស់លោក Ghosn និង Kelly ផងដែរ។ នៅក្នុងការបន្ថែមនូវភាពស្មុគស្មាញនេះ គឺជារចនាសម្ព័ន្ធនៅក្នុងក្រុមហ៊ុន Renault-Nissan-Mitsubishi Alliance តែម្តង។ នៅក្នុងការបង្កើតឡើងជាងពីរទសវត្សន៍នេះ យុទ្ធសាស្រ្តនៅក្នុងភាពជាដៃគូរួមគ្នាអាចធ្វើការគ្រប់គ្រងទៅលើម៉ាកយីហោដល់ទៅ 10 ។
Nissan គ្រប់គ្រង 34% របស់ Mitsubishi ។ ទន្ទឹមនឹងនេះផងដែរ Nissan និង Renault ក៏មានការគ្រប់គ្រងកាន់កាប់រៀងៗខ្លួនផងដែរ។ Renault មានការកាន់កាប់ភាគហ៊ុនបោះឆ្នោតច្រើនជាង Nissan ដល់ទៅ 43% ខណៈពេលដែលក្រុមហ៊ុន Nissan គឺភាគហ៊ុនដែលមិនបានបោះឆ្នោតត្រឹមតែ 15% ប៉ុណ្ណោះ។ រដ្ឋាភិបាលរបស់បារាំងក៏មានភាគហ៊ុន 15% នៅក្នុង Renault ផងដែរ។ នៅក្នុងឆ្នាំ 2017 លោក Ghosn ទាមទារនូវកញ្ចប់ទឹកប្រាក់ដល់ទៅ 7.4m euro ($8.5m) នៅក្នុងតំណែងរបស់គាត់ ប៉ុន្តែរដ្ឋាភិបាលរបស់បារាំងមិនយល់ព្រមនោះទេ។ សរុបមកកញ្ចប់ទឹកប្រាក់នេះត្រូវបានអនុម័តនៅក្នុងឆ្នាំ 2018 ដែលត្រូវកាត់បន្ថយដល់ទៅ 1 ភាគ 3។ សម្រាប់ក្រុមហ៊ុន Nissan ក្រុមហ៊ុនសន្យាថានឹងធ្វើការជាមួយនឹងអ្នកស៊ើបអង្កេតទៅលើសកម្មភាពរបស់លោក Ghosn និង Kelly ។ ក្រុមហ៊ុនផលិតរថយន្តនេះនិយាយនៅថ្ងៃនេះថា “ក្រុមហ៊ុន Nissan ពិតជាសុំទោសសម្រាប់ការបង្កើតនូវរឿងដែលគួរអោយព្រួយបារម្ភយ៉ាងខ្លាំងសម្រាប់ម្ចាស់ភាគហ៊ុន និងភាគីដែលពាក់ព័ន្ធនោះ៕”