ជារៀងរាល់ឆ្នាំក្រុមហ៊ុន អ អិម អេ ខេមបូឌា (RMA Cambodia) តែងតែរៀបចំដំណើរកំសាន្តសម្រាប់អតិថិជនរបស់ខ្លួនទៅកាន់រមណីយដ្ឋានផ្សេងៗនៅក្នុងប្រទេស ក៏ដូចជាទៅកាន់ប្រទេសជិតខាង ជាមួយនឹងក្បួនរថយន្ត ហ្វដ (Ford) គ្រប់ម៉ូឌែល។ ដោយឡែកសម្រាប់ឆ្នាំនេះ ក្រុមហ៊ុន ហ្វដ (Ford) នឹងរៀបចំដំណើរកំសាន្តសម្រាប់អតិថិជនទៅកាន់ខេត្តកោះកុង ប្រទេសកម្ពុជា ខេត្តត្រាតនិងខេត្តច័ន្ទបុរី ប្រទេសថៃ។
នៅក្នុងដំណើរកំសាន្តដ៏អស្ចារ្យនេះ មានរយៈពេល 4 ថ្ងៃ 3 យប់ គឺចាប់ពីថ្ងៃទី 06 ដល់ថ្ងៃទី 09 ខែធ្នូ ឆ្នាំ 2018 ដែលអ្នកចូលរួមទាំងអស់នឹងមាន ឱកាសរីករាយជាមួយទេសភាព ព្រៃភ្នំនៅតាមដងផ្លូវ និង ទឹកធ្លាក់ដ៏ស្រស់ស្អាត ក្នុងទឹកដីខេត្តកោះកុង រួមជាមួយនឹងបទពិសោធន៍ បោះជំរំដ៏រ៉ូមែនទិច នៅលើឆ្នេរសមុទ្រ យ៉ាងស្រស់ត្រកាលនៅខេត្តត្រាត និង ដើរទិញទំនិញ ជាច្រើនសំបូរបែបក្នុងតម្លៃសមរម្យក្នុងផ្សារទំនើបនៃទឹកដីខេត្តចន្ទបុរី ប្រទេសថៃថែមទៀតផង។
លោក ឡោ វុទ្ធី ប្រធានគ្រប់គ្រងផ្នែកលក់រថយន្ត Ford នៃក្រុមហ៊ុន RMA Cambodia បានមានប្រសាសន៍ថា៖ “នេះគឺជាឆ្នាំទី 12 នៃកម្មវិធី Ford Adventure ខ្ញុំពិតជាមានភាពសប្បាយ រីករាយមែនទែនដោយសារឆ្នាំនេះចំនួនរថយន្តដែល បានចូលរួម កើនឡើងរហូតដល់ជាង 100 ឡានដែលឆ្នាំមុនៗយើងអនុញ្ញាតឲ្យរថយន្តចូលរួមត្រឹមតែ 50 ទៅ 60 ឡានតែប៉ុណ្ណោះ។ នេះ ជាលើកទី 2 ហើយដែលក្បួនរថយន្តបានធ្វើដំណើរទៅកាន់ខេត្តកោះកុងនេះ ដែលលើកទី១ គឺនៅឆ្នាំ 2014 ដែលកាលនោះ ចំនួនរថយន្តដែលចូលរួមមានត្រឹមតែជាង 50 គ្រឿង និងអ្នកចូលរួមប្រមាណជាង 300 នាក់ប៉ុណ្ណោះ។
ដំណើរកម្សាន្តនេះ បានធ្វើឡើងជារៀងរាល់ឆ្នាំ ក្នុងនោះកាលពីឆ្នាំ 2007 ទៅខេត្តមណ្ឌលគិរី , ឆ្នាំ 2008 ទៅកាន់ខេត្តរតនគិរី , ឆ្នាំ2009 ទៅកាន់ខេត្តប៉ៃលិន, ឆ្នាំ 2010 និងឆ្នាំ 2011 ទៅកាន់ទឹកដីខេត្តចម្ប៉ាសាក់ ប្រទេសឡាវឆ្នាំ 2012 ទៅកាន់ខេត្តមណ្ឌលគិរី ឆ្នាំ 2013 ក៏បានទៅទឹកដីប្រទេសឡាវម្តងទៀត ឆ្នាំ 2014 ទៅកាន់ខេត្តត្រាត ប្រទេសថៃ ឆ្នាំ 2015 ទៅកាន់ខេត្តច័ន្ទបុរី ប្រទេសថៃ ឆ្នាំ 2016 ទៅកាន់ខេត្តបុរីរាម និងឆ្នាំ 2017 ទៅកាន់ទីក្រុងប៉ាតាយ៉ា ប្រទេសថៃដោយមានចំនួនអ្នកចូលរួមកើនឡើងជាបន្តបន្ទាប់ ។
លើសពីនេះទៅទៀត លោកក៏បានបន្ថែមទៀតថា ដំណើរកំសាន្ត FORD Adventure មិនត្រឹមតែជាការកំសាន្តសប្បាយប៉ុណ្ណោះទេអ្វីដែលសំខាន់ជាងនេះទៅទៀតនោះ គឺការចូលរូមចំណែកជួយសង្គមតាមរយៈការចែកអំណោយសប្បុរសធ៌មជូនដល់ ប្រជាជនដែលមានភាពខ្វះខាតនៅក្នុងតំបន់ ក៏ដូចជាបង្កើនទំនាក់ទំនងគ្នាល្អ ការជួយគ្នាទៅវិញទៅមករបស់អតិជន FORD និងបុគ្គលិករបស់់ក្រុមហ៊ុន RMA Cambodiaផងដែរ។