អាយឌីភី និងអេស៊ីអ៊ី ក្រោមការរៀបចំរបស់គណៈកម្មការកិច្ចការសង្គមរបស់ស្ថាប័នទាំងពីរ ដោយមានការចូលរួមដឹកនាំដោយយុវសិស្សទូតសុឆន្ទះ និងបុគ្គលិករបស់សាលាអេស៊ីអ៊ីទាំងអស់ បានប្រកាសរៀបចំកម្មវិធី អេស៊ីអ៊ី សប្បុរសធម៌ប្រចាំឆ្នាំលើកទី 4 នៅក្នុងឱកាសពីធីបុណ្យណូអែល នឹងត្រូវធ្វើឡើងនៅថ្ងៃអាទិត្យទី 24 ខែធ្នូ ឆ្នាំ 2017 នៅសាលាអេស៊ីអ៊ី ទីតាំងទូលទំពូង ចាប់ពីម៉ោង 3 រសៀលដល់ម៉ោង 8 យប់ នៅក្នុងគោលបំណងរៃអង្គាសថវិកាសម្រាប់បរិច្ចាគដល់មន្ទីរពេទ្យគុន្ធបុប្ផាបន្ថែមទៀត។ តាមការបញ្ជាក់របស់អ្នករៀបចំកម្មវិធីនេះ បានអោយដឹងថា កម្មវីធីសប្បុរសធម៌ បុណ្យណូអែលនៅសាលា អេស៊ីអ៊ី ត្រូវបានធ្វើឡើងជារៀងរាល់ឆ្នាំចាប់តាំងពីឆ្នាំ 2014 មក។ ហើយកាល ពីឆ្នាំ 2016 កម្មវិធីសប្បុរសធម៌នេះ គឺបានប្រព្រឹត្តិទៅប្រកបដោយភាពជោគជ័យ ដោយមានការចូលរួមគាំទ្រពីសំណាក់ សិស្ស និសិ្សត អាណាព្យាបាល និង បុគ្គលិក ប្រមាណជា 1800 នាក់ នៅក្នុងគោលបំណងរៃអង្គាសថវិកា ហើយបានបរិច្ចាគជូនដល់មន្ទីរពេទ្យគុន្ធបុប្ផា។
សម្រាប់ឆ្នាំ 2017 ដែលជាលើកទី 4 សម្រាប់ឆ្នាំថ្មីដែរនេះ នឹងមានលក្ខណៈពិសេស និងប្លែកជាងឆ្នាំមុនៗគឺថា អ្នកចូលរួមទាំងអស់នឹងទទួលបានអារម្មណ៏ប្លែក និងសប្បាយរីករាយជាមួយការតុបតែងរចនា ពិធីបុណ្យណូអែលទៅតាមប្រទេសផ្សេងៗមានដូចជា៖ អាមេរិច កាណាដា ណូវែលហ្សេឡង់ អូស្រ្តាលី ចក្រភពអង់គ្លេស បារាំង និងជប៉ុន។ មិនតែប៉ុណ្ណោះ អ្នកចូលរួមក៏អាចកម្សាន្តសប្បាយជាមួយសកម្មភាពផ្សេងៗដូចជា៖ រាំលេងសប្បាយជាមួយ DJ ល្បីៗ ថតរូបអនុស្សាវរីយជាមួយមិត្តភ័ក្ត និងក្រុមគ្រួសារ ឱកាសឈ្នះកាដូជាច្រើន និងការដាក់តាំងលក់ម្ហូបអាហារ ភេសជ្ជៈ និងវត្ថុអនុស្សាវរីយជាច្រើនទៀត។
លោក ម៉ៅស្រេង នាយក អាយឌីភី និងអេស៊ីអ៊ី ប្រចាំនៅកម្ពុជាបានមានប្រសាសន៏ថា៖ យើងរង់ចាំស្វាគមន៏អ្នករាល់គ្នាដើម្បីចូលរួមកម្មវិធីសប្បុរសធម៌ បុណ្យណូអែលនេះ ដែលនឹងធ្វើឡើងនៅថ្ងៃទី២៤ ខែធ្នូខាងមុខនេះ។ យើងមានសេចក្តីសោមនស្សរីករាយយ៉ាងខ្លាំងចំពោះ កិច្ចខំប្រឹងប្រែងរបស់បុគ្គលិកយើង យុវសិស្សទូតសុឆន្ទះ និងគ្រួសាររបស់ពួកគេក្នុងការរៀបចំ និងគាំទ្រកម្មវិធីនេះ ដើម្បីរៃអង្គាសថវិកាសម្រាប់បរិច្ចាគទៅមន្ទីពេទ្យគុន្ធបុប្ផា។ សំបុត្រមួយតម្លៃ 12000 រៀល ដែលអាចរកទិញបាននៅគ្រប់ទីតាំងសាលារៀនអេស៊ីអ៊ី នៅ ភ្នំពេញ (ទីតាំង សម្តេចប៉ាន សន្ធរមុខ និង ទួលទំពួង) ឬ អាចទំនាក់ទំនងតាមរយះទូរស័ព្ទលេខ 023 881 025 /023 218 318 /023 222 325។
សម្រាប់ព័ត៌មានបន្ថែម សូមចូលទៅកាន់៖ https://www.facebook.com/acecharitycambodia
