នៅព្រឹត្តិការណ៍តាំងពិព័ណ៌រថយន្តទីក្រុងហ្សឺនែវ ប្រទេសស្វីស ក្រុមហ៊ុន Rimac បានបញ្ចេញរថយន្តប្រើថាមពលអគ្គីសនីប្រភេទ Hypercar-All-Electric របស់ខ្លួន គឺម៉ូដែល C-Two ដែលជាស៊េរីចុងក្រោយបង្អស់។ រថយន្តអគ្គីសនីស៊េរីថ្មីនេះ ទទួលបានការចាប់អារម្មណ៍ខ្លាំងជាមួយនឹងការរចនារូបរាងដ៏ប្រណិតបែបរថយន្តប្រណាំង មានកំលាំងម៉ាស៊ីនខ្លាំង និងបំពាក់នូវបច្ចេកវិទ្យាទំនើបៗចុងក្រោយ។ Rimac បានធ្វើការអះអាងថារថយន្ត C-Two របស់ខ្លួនអាចបើកបរបានក្នុងល្បឿន 258 ម៉ាយក្នុងមួយម៉ោង (ជាង 415 គីឡូម៉ែត្រក្នុងមួយម៉ោង) និងអាចបង្កើនសន្ទុះល្បឿនពី 0 ទៅ 60 ម៉ាយក្នុងមួយម៉ោងប្រើពេលតែ 1.58 វិនាទីប៉ុណ្ណោះ។
រថយន្តនេះប្រើប្រាស់ម៉ាស៊ីនកំលាំង 2,300Nm និងភ្ជាប់នូវប្រព័ន្ធត្រជាក់ Cool Styling ដែលជួយកាត់បន្ថយការកើនកំដៅម៉ាស៊ីន និងកំដៅអាគុយនៅពេលបើកបរក្នុងរយះពេលយូរ។ Rimac C-Two បំពាក់ដោយអាគុយប្រភេទ lithium ខ្នាត 6,960 manganese/nickel cells ដែលអាចផ្តល់នូវថាមពលបាន 120kWh ជាមួយកំលាំងចរន្តផ្ទុកថាមពល 1.4MW។ តួររថយន្តត្រូវបានផលិតឡើងជាមួយរចនាបថដ៏ប្រណិតជាមួយកង់ដែលមើលទៅបែបរថយន្តស្ព័រសមនឹងទ្វារទាំងពីរដែលបើកចហៀងឡើងលើដូចស្លាបមេអំប៉ៅ (Butterfly style) ផ្តល់នូវភាពងាយស្រួលក្នុងការចេញចូល។
Rimac C-Two មានប្រវែងទទឹង 1,968 មីលីម៉ែត្រ (ប្រហែល 1,96 ម៉ែត្រ)។ សម្រាប់យ៉ាន់កង់ទាំងបួនរបស់វាត្រូវបានរចនាឡើងយ៉ាងពិសេសសម្រាប់តែម៉ូដែល C-Two តែប៉ុណ្ណោះជាមួយសំបកកង់ដែលផលិតពីជ័រគុណភាពខ្ពស់ប្រភេទ Pirelli ស្វិតធន់ផ្តល់ទំនុកចិត្តក្នុងការបើកបរជាមួយប្រព័ន្ធហ្វ្រាំង carbon-ceramic brake system។ ចង្គៀងបំភ្លឺផ្លូវរបស់រថយន្តអគ្គីសនីនេះត្រូវបានរចនាឡើងយ៉ាងស្រស់ស្អាតបែប high-intensity LED lights មើលទៅកាចដោយបានរំលេចជាមួយអំពូលភ្លើង LED ចំនួន 58 គ្រាប់ និងប្រើប្រព័ន្ធបំភ្លឺ ventilation system ដែលអាចបំភ្លឺបានឆ្ងាយផ្តល់នូវសុវត្ថិភាពខ្ពស់នៅពេលបើកបរនៅពេលយប់។ ជាមួយមុខងារ Active Aerodynamics អាចជួយរក្សាលំនឹងរថយន្តនៅពេលបើកបរក្នុងល្បឿនអតិបរិមា។
នៅលើរថយន្តនេះ គឺមានមុខងារ Splitter មានភាពឆ្លាតវៃក្នុងការកំនត់បាននូវតម្រូវការភាពត្រជាក់របស់អាគុយដោយវានឹងធ្វើការបិទ និងបើកបរិមាណភាពត្រជាក់ដោយស្វ័យប្រវត្តិនៅពេលបង្កើនល្បឿន និងបន្ថយល្បឿន ឬក៏ចតរថយន្ត។ ខាងមុខងាររថយន្តត្រូវបានរចនាឡើងយ៉ាងពិសេសដោយមានរបាំងការពារដោយសំណាញ់ដែលជួយស្រូបខ្យល់សម្រាប់ជួយដល់ប្រព័ន្ធភាពត្រជាក់ (Cooling System) របស់ម៉ូទ័រអេឡិចត្រូនិចទាំងបួន និងអាគុយរបស់វាបានយ៉ាងប្រសើរថែមមួយកម្រិតទៀត។ យើងមិនទាន់ដឹងនៅឡើយទេថាតើក្រុមហ៊ុន Rimac បញ្ចេញលក់រថយន្តអគ្គីសនីដ៏ទំនើបរបស់ខ្លួនលើទីផ្សារពេលណានោះទេ ហើយតម្លៃរបស់វាក៏មិនទាន់ដឹងផងដែរ៕
