ក្រុមហ៊ុន Nissan ត្រូវបានបែកធ្លាយព័ត៌មានចចាមអារ៉ាមជាយូរមកហើយថា ក្រុមហ៊ុនផលិតរថយន្តដ៏ល្បីល្បាញរបស់ពិភពលោកមួយនេះ បាននឹងកំពុងធ្វើការផលិតចេញនូវរថយន្តម៉ូដែល Leaf ដែលជារថយន្តអគ្គីសនីប្រភេទ SUV ឬជាប្រភេទរថយន្តស្ព័រ នៅក្នុងទ្រង់ទ្រាយធំ។ អស់រយះពេលជាង 7 ឆ្នាំមកហើយ បន្ទាប់ពីការប្រកាសបង្ហាញចេញរថយន្តម៉ាក Leaf Crossover ក៏ប៉ុន្តែក្រុមហ៊ុន Nissan មិនបាននាំចេញរថយន្តស៊េរីមួយនេះ ទៅចរាចរណ៍លក់នៅលើទីផ្សារនោះទេ ប៉ុន្តែពេលនេះ លោកនាយកប្រតិបត្តិជាន់ខ្ពស់មួយរូបរបស់ Nissan បាននិយាយថា ក្រុមហ៊ុននឹងផលិតចេញរថយន្តស៊េរីថ្មីរបស់ខ្លួនដោយការផលិតនេះគឺផ្អែកទៅលើគំរូរបស់ IMx។
ប្រធានផ្នែករចនារថយន្តរបស់ក្រុមហ៊ុន Nissan ប្រចាំនៅតំបន់អឺរ៉ុបលោក Mamoru Aoki បានបញ្ជាក់ព័ត៌មានទៅកាន់បណ្តាញ Autocar កាលពីថ្មីៗនេះថា “IMx មិនមែនត្រឹមតែជាគំរូនៃរថយន្តនោះទេ, ក្នុងរយះពេលពីរបីឆ្នាំមកនេះ, រថយន្ត នឹងលេចរូបរាងឡើង (កំពុងស្ថិតក្នុងចង្វាក់ផលិតកម្ម)”។ រថយន្តនេះ ពិតជាមានភាពភ្ញាក់ផ្អើលខ្លាំងដោយសារតែគំរូ IMx ដែលមានលក្ខណៈទំនើបបំផុតដែលវាមិនត្រូវបានគេរំពឹងទុកថានឹងអាចកើតមានឡើងក្នុងចង្វាក់ផលិតកម្មរថយន្ត ប៉ុន្តែត្រូវបានក្រុមហ៊ុន Nissan ចាត់ទុកថា “IMx គឺបង្ហាញពីចក្ខុវិស័យសម្រាប់អនាគតរថយន្ត”។
គំរូ IMx នេះ ត្រូវបានប្រកាសចេញកាលពីខែតុលាឆ្នាំទៅ ហើយក្រុមហ៊ុន Nissan បានបញ្ជាក់ថា គំរូនេះ បានផ្តោតសំខាន់ទៅលើការផលិតរថយន្តអគ្គីសនី ដែលអាចដំណើរការបានដោយប្រើប្រាស់ម៉ូទ័រពីរ នៅក្នុងបរិមាណបន្ទុកអគ្គីសនីខ្ពស់បំផុត (High-Output Electric Motors) ដោយមួយនៅផ្នែកខាងមុខ និងមួយមួយទៀតនៅផ្នែកខាងក្រោយរថយន្ត ដែលអាចដំណើរការកង់ទាំងបួនរបស់រថយន្តព្រមគ្នា (all-wheel drive)។ ម៉ូទ័រទាំងពីរត្រូវបាន រួមបញ្ចូលគ្នាក្នុងការផលិតថាមពលអគ្គីសនីបានដល់ 360KW និងមានកំលាំងបង្វិល 700Nm។
ក្រុមហ៊ុន Nissan នៅមិនទាន់បញ្ជាក់ ពីសមត្ថភាពពិតប្រាកដរបស់រថយន្ត Leaf ជំនាន់ថ្មីនេះ នៅឡើយទេ ប៉ុន្តែក្រុមហ៊ុន បាននិយាយថារថយន្ត នឹងប្រើប្រាស់ថ្ម ដែលមានសមត្ថភាពផ្ទុកកម្រិតខ្ពស់ជាមួយការបង្កើនបន្ទុកថាមពលបានក្នុងកម្រិតខ្ពស់បំផុតផងដែរ ដោយសាកម្តងអាចបើកបរបានក្នុងចម្ងាយផ្លូវ 600Km ប្រហែល 372 miles។ លោក Aoki បានបញ្ជាក់បន្ថែមពីការរចនាផ្នែកខាងរបស់រថយន្តថា “ផ្នែកខាងក្នុងរថយន្តមានទំហំធំទូលាយជាងរថយន្តធម្មតា ដោយសារបណ្តុំថ្មត្រូវបានដាក់ភ្ជាប់នៅផ្នែកខាងក្រោមនៃរថយន្តដែលទុកកន្លែងកាន់តែទូលាយ។ ផ្នែកតាប្លូត្រូវបានរុញទៅផ្នែកខាងស្តាំ ហើយផ្នែកកង្ហារ HVAV (បញ្ចេញកំដៅ ស្រូបកំដៅ និងម៉ាស៊ីនត្រជាក់) ត្រូវបានបំពាក់នៅផ្នែកខាងក្រោមមានគម្របបិទពីលើ”។
គេមិនទាន់ដឹងច្បាស់ទេថាតើ Nissan នឹងនាំយករថយន្តប្រភេទនេះទៅកាន់ទីផ្សារនៅពេលណានោះទេប៉ុន្តែបើតាមការលើកឡើងរបស់លោក Aoki បានបង្ហើបថា “ប្រហែលពីរទៅបីឆ្នាំទៀត”។ ចឹងចាំមើលថាតើក្រុមហ៊ុន Nissan អាចផលិត និងចេញលក់រថយន្តអគ្គីសនី Leaf Crossover ដ៏ទំនើបរបស់ខ្លួននៅពីរបីឆ្នាំបន្ទាប់ទៀតពិតដែលអត់ព្រោះថារថយន្ត Nissan Leaf ដែលគេរំពឹងថាចេញលក់កាលពីឆ្នាំ 2014 គឺមិនឃើញមានចេញលក់លើទីផ្សារនោះទេ៕