Ford Ranger Raptor គឺជារថយន្តប្រភេទ Truck ដែលមានកំលាំងខ្លាំងរបស់ក្រុមហ៊ុន Ford ដែលទទួលបានការគាំទ្រខ្លាំងពីបណ្តាអ្នកប្រើប្រាស់ដែលនិយមដំណើរកម្សាន្តបែបផ្សងព្រេងនៅតាមតំបន់ដែលមានផ្លូវពិបាកធ្វើដំណើរដោយមិនអាចប្រើរថយន្តធម្មតាទៅបានដូចជាផ្លូវឡើងភ្នំ ផ្លូវថ្ម ផ្លូវជ្រុះជ្រងជ្រលងដងអូរជាដើម។ ដោយមានទីផ្សារនៃអ្នកគាំទ្រមានការកើនឡើងក្នុងឆ្នាំ 2018 នេះ ក្រុមហ៊ុន Ford បានបង្ហាញចេញស៊េរីថ្មីឆ្នាំ 2018 ដែលមានការអភិវឌ្ឍកាន់តែអស្ចារ្យទាំងផ្នែករចនារូបរាង កំលាំងម៉ាស៊ីន និងបច្ចេកវិទ្យាប្រើប្រាស់ទំនើបជាងមុន។
ការរចនារូបរាងសាមញ្ញមើលទៅរឹងមាំ និងមានការតុបតែងនូវគ្រឿងបំពាក់ទំនើបៗ
មើលទៅលើការរចនារូបរាងខាងក្រៅរបស់ Ford Ranger Raptor ស៊េរីថ្មីនេះមានភាពសាមញ្ញមិនសូវជាសិចស៊ីខ្លាំងប៉ុន្មានទេ ប៉ុន្តែវាបង្ហាញអោយឃើញនូវភាពដ៏រឹងមាំស័ក្តិសមជាប្រភេទរថយន្ត Truck ដ៏មានអនុភាព។ តួររបស់វាមានកំពស់ខ្ពស់ពីដីជាមួយរង្វង់យ៉ាន់បែបស្ព័រផលិតពីលោហះធាតុ Alloy និងមានសំបកកង់ធំមានក្រឡាជ្រៅផ្តល់នៅកំលាំងទាញ និងរក្សាលំនឹងរថយន្តក្នុងការបើកបរបានគ្រប់ស្ថានភាពផ្លូវជាមួយសុវត្ថិភាពខ្ពស់។ បាតដែកខាងមុខក្រោមក្បាលរថយន្តត្រូវបានរចនាឡើងបែតបញ្ឆិតអឺតខ្ពស់ឡើងការពារតួររថយន្ត និងម៉ាស៊ីនផ្នែកខាងមុខពីការកលនៅពេលបើកលើផ្លូវទូលឡើងចុះ។
ផ្នែកសំណាញ់ខាងមុខត្រូវបានបំពាក់ឡើងយ៉ាងពិសេសវ័ណ្ឌដោយស៊ុមលោហះជួយបំភាយកំដៅកាត់បន្ថយកំដៅរបស់ម៉ាស៊ីនបានកាន់តែប្រសើរ។ ចង្គៀងបំភ្លឺផ្លូវ ចង្គៀងស៊ីញ៉ូឆ្វេងស្តាំ និងចង្គៀងកូដត្រូវបានរចនាយ៉ាងប្រណិតបន្ស៊ីបង្កប់ផ្អិបជាប់តួររថយន្តតែម្តង។ រីផ្នែកខាងក្រោយមិនសូវជាខុសពីរថយន្ត Truck ដទៃទៀតប៉ុន្មានឡើយ។ សម្រាប់ការតុបតែងខាងក្នុងវិញក៏មានភាពប្រណិតជាមួយកៅអីស្បែក ដៃចង្កូតស្បែកទន់ល្មើយដែលមានការរចនាយ៉ាងប្រណិតជាមួយប៊ូតុងចុចបញ្ជាការគ្រប់គ្រងមុខងារផ្សេងៗ និងតុបតែងលម្អដោយគ្រឿងបំពាក់ប្រើប្រាស់បច្ចេកវិទ្យាទំនើបៗជាច្រើន។
កំលាំងម៉ាស៊ីនខ្លាំងប្រើប្រាស់បច្ចេកវិទ្យាស្តង់ដារកម្រិតខ្ពស់រត់បានគ្រប់ស្ថានភាពផ្លូវ
Ford Ranger Raptor 2018 ប្រើប្រាស់ម៉ាស៊ីនម៉ាស៊ូតប្រើប្រាស់បច្ចេកវិទ្យាម៉ាស៊ីនចុងក្រោយរបស់ Ford ប្រភេទម៉ាស៊ីន 2.0L BiTurbo diesel engine ដែលផ្តល់នូវកំលាំងថាមពល 157Kw និងកំលាំងបង្វិល 500Nm ហើយវាអាចបង្កើនថាមពលដល់ 240,000rmp ដោយប្រើបច្ចេកវិទ្យា High-Tech inconel។ វាប្រើប្រាស់មុខងារ Transmission ដូចស៊េរី Ford Ranger F-15 Raptor និង Mustang GT ដែរដោយវាអាចបង្កើនកំលាំងដល់ 10 ដងដោយស្វ័យប្រវត្តិតម្រូវតាមស្ថានភាពផ្លូវ។
បំពាក់នូវប្រព័ន្ធបច្ចេកវិទ្យាទំនើបមានភាពឆ្លាតវៃ
Ranger Raptor 2018 មិនត្រឹមមានតែរូបរាងប្រកបដោយភាពរឹងមាំនោះទេ គឺថែមទាំងបំពាក់នូវបច្ចេកវិទ្យាឆ្លាតវៃមិនគួរឱ្យជឿជាមួយនឹងម៉ាស៊ីនស្តង់ដារកម្រិតខ្ពស់ និងបច្ចេកវិទ្យាទំនើបជួយសម្រួលដល់ការបើកបរកាន់តែមានផាសុខភាព និងសុវត្ថិភាពខ្ពស់។ វាបំពាក់បច្ចេកវិទ្យាឆ្លាតវៃសំឡេង Driver Assist Technologies (DATs) មានលក្ខណះឆ្លាតវៃដូចជាបច្ចេកវិទ្យា SYNC® 3 Voice ដែរសម្រាប់គ្រប់គ្រងការបញ្ជាបាននៅលើមុខងារដូចជា Navigation Satellite, Electronic Stability Control (ESC),Trailer Sway Control (TSC), Hill Start Assist (HSA), Hill Descent Control (HDC), Load Adaptive Control (LAC) , Lane Departure Warning (LDW) with Lane Keep Assist (LKA) និង Roll Over Mitigation (ROM)… ជាដើម។
ប្រព័ន្ធគ្រប់គ្រងការបើកបរនៅគ្រប់ស្ថានភាពផ្លូវ
Ranger Raptor ស៊េរីថ្មីចុងក្រោយនេះបំពាក់នូវប្រព័ន្ធ Terrain Management System (TMS) ដែលអនុញ្ញាតិអោយអ្នកបើកបរធ្វើការគ្រប់គ្រងទៅលើរថយន្តកំឡុងពេលបើកបរទៅតាមស្ថានភាពផ្លូវផ្សេងៗគ្នា។ វាអនុញ្ញាត្តិអោយអ្នកបើកបរអាចផ្លាស់ប្តូររបៀបក្នុងការបើកបរបាន 6 ប្រភេទផ្សេងគ្នាដូចជា Normal, Sport, Grass/Gravel/Snow, Mud/Sand, Rock និងBaja Mode សម្រាប់បើកនៅលើផ្លូវលំបាកខ្លាំង (Off-road)។ ចឹងនេះជារថយន្ត Ranger Raptor ស៊េរីថ្មីឆ្នាំ 2018 ដែលមានកំលាំងខ្លាំងអាចទ្រទ្រង់ការបើកបរបានគ្រប់ស្ថានភាពផ្លូវ និងបំពាក់នូវបច្ចេកវិទ្យាទំនើបៗចុងក្រោយបំផុត។ រថយន្តស៊េរីថ្មីនេះនឹងមានចេញលក់លើទីផ្សារក្នុងពេលឆាប់ៗនេះ៕