នៅថ្ងៃនេះ ក្រុមប្រឹក្សាប្រធានគ្រប់គ្រងរបស់ក្រុមហ៊ុន LG Electronics បានប្រកាសជាផ្លូវការហើយស្តីអំពីការទិញយកក្រុមហ៊ុន ZKW Group ដែលជាក្រុមហ៊ុនផ្គត់ផ្គង់នូវភ្លើង និងប្រព័ន្ធភ្លើងរថយន្តលំដាប់ពិភពលោកនៅក្នុងតម្លៃជាង 1.1 ពាន់លានអ៊ឺរ៉ូ ដែលនេះ គឺជាការទិញយកដ៏ធំបំផុតរបស់ក្រុមហ៊ុននេះ។ នៅក្នុងកិច្ចព្រមព្រៀងនេះ ក្រុមហ៊ុន LG Electronics នឹងទិញយកភាគហ៊ុនច្រើនជាង 70% នៅក្នុងក្រុមហ៊ុន ZKW Group ជាមួយនឹងក្រុមហ៊ុន LG Corp ដែលទិញយកនូវចំនែកដែលនៅសល់ 30% នោះ។
យុទ្ធសាស្រ្តនេះ នឹងធ្វើឱ្យក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូងនេះ អាចឈានមុខគេនៅក្នុងវិស័យអំពូលភ្លើងនៅក្នុងការប្រើប្រាស់នៅលើរថយន្ត។ ទីស្នាក់ការកណ្តាលនៅក្នុងទីក្រុង Lower Austrian របស់រដ្ឋ Wieselburg ក្រុមហ៊ុន ZKW Group គឺជាក្រុមហ៊ុនបច្ចេកវិទ្យាឈានមុខគេនៅក្នុងវិស័យនៃប្រព័ន្ធភ្លើងនៅក្នុងរថយន្តនៅលើទីផ្សារជាច្រើននៅពាសពេញទ្វីបអ៊ឺរ៉ុប ចិន ម៉ិចស៊ិកូ និងសហរដ្ឋអាមេរិក។ ជាមួយនឹងប្រាក់ចំណេញដល់ទៅ 1.26 ពាន់លានអ៊ឺរ៉ូនៅក្នុងឆ្នាំ 2017 និងកម្រិតនៃកំណើននៃការលក់ប្រចាំឆ្នាំដល់ទៅ 20% នៅក្នុងរយៈពេល 5 ឆ្នាំមុននេះ ក្រុមហ៊ុន ZKW ត្រូវបានគេរកឃើញថា ត្រូវបានគេជ្រើសរើសប្រើប្រាស់នៅលើម៉ាកយីហោរថយន្តជាច្រើននៅក្នុងតំបន់អ៊ឺរ៉ុប ដែលក្នុងនោះ មានរថយន្តដូចជា Audi, BMW, Porsche និង Daimler និងជាច្រើនទៀត។
អាជីវកម្មអំពូលភ្លើងរបស់ក្រុមហ៊ុន ZKW ដែលផ្តោតទៅលើសមាសភាគ និង Accessories របស់រថយន្តថ្នាក់ប្រណិតនោះ នឹងមានទីផ្សារកាន់តែធំតាមរយៈការលក់របស់ក្រុមហ៊ុន LG។ នៅក្នុងការផលិតនូវភ្លើង LEDs និង Lasers នោះ ក្រុមហ៊ុន ZKW ក៏ធ្វើការផលិតនូវភ្លើង matrix LED headlamps និង laser headlights។ ក្រុមហ៊ុន LG និង ZKW នឹងផ្តោតសំខាន់ទៅលើដំណោះស្រាយក្នុងការអភិវឌ្ឍនូវភ្លើងកាន់តែឆ្លាតវៃជាមួយនឹងកម្រិតភាពច្បាស់ខ្ពស់ និងការជូនដំណឹងនៅលើផ្លូវតាមរយៈសេនស័រនោះ។
ក្រុមហ៊ុន ZKW Group នឹងបន្តធ្វើការគ្រប់គ្រងដោយក្រុមការងារដឹកនាំដោយនាយកប្រតិបត្តិ Oliver Schubert ដែលនឹងទទួលខុសត្រូវទៅលើប្រតិបត្តិការទាំងអស់ នៅលើពិភពលោក ដែលមានបុគ្គលិកច្រើនជាង 9000 នាក់នោះ។ ក្រុមហ៊ុន LG ប្តេជ្ញារក្សានូវសេ្ថរភាពនៃការងារស្វ័យភាព និងការងារនៅក្រុមហ៊ុន ZKW នេះ។ ជាពិសេសគឺការផលិតនៅក្នុងប្រទេសអូទ្រីស គឺនៅតែរក្សាទុកដដែល មិនមានការផ្លាស់ប្តូរនោះទេនៅក្នុងរយៈពេល 5 ឆ្នាំនោះ។
LG’s Vehicle Components Company មានកំណើននៃការលក់ដល់ទៅ 26% ជាមួយនឹងទឹកប្រាក់ 3.15 ពាន់លានដុល្លារអាមេរិកនៅក្នុងឆ្នាំ 2017 នេះ។ ទីផ្សារភ្លើងអំពូលរថយន្តនៅលើពិភពលោកនេះ នឹងមានការកើនឡើងពី 24.5 ពាន់លានដុល្លារអាមេរិកកាលពីឆ្នាំមុននេះទៅកាន់ 29 ពាន់លានដុល្លារអាមេរិកនៅឆ្នាំ 2020 ជាមួយនឹងការរួមចំណែកនៃភ្លើង Headlights ដល់ទៅ 70% នោ។ នៅក្នុងកិច្ចព្រមព្រៀងនេះ ក្រុមហ៊ុន LG គឺនាំមុខគេនៅក្នុងវិស័យសមាសភាគរបស់រថយន្ត និងការពង្រីកអាជីវកម្មភ្លើងរថយន្តចេញពីភ្លើងខាងមុខរបស់រថយន្តតែម្តង៕