រហូតមកដល់ពេលនេះ គឺមានរយៈពេលជិត 20 ឆ្នាំហើយ ចាប់តាំងពីរថយន្តស៊េរីថ្មីត្រកូល BMW 8 Series ដំបូងបំផុត បានបញ្ចប់ការផលិតរបស់ខ្លួន ប៉ុន្តែពេលនេះ រថយន្តស៊េរីថ្មីដ៏ទំនើបនេះ ក៏ចាប់ផ្តើមបង្ហាញខ្លួនសារជាថ្មីម្តងទៀតហើយ។ សម្រាប់រថយន្ត BMW 8 Series ជំនាន់ទី 2 ត្រូវបានក្រុមហ៊ុនដាក់បង្ហាញកាលពីខែមុននេះនៅក្នុងទីក្រុង Le Mans ហើយឥឡូវនេះ រថយន្តប្រភេទ Coupe ដ៏ប្រណិតនេះ ចាប់ផ្តើមធ្វើការផលិតជាផ្លូវការនៅក្នុងរោងចក្រ Dingolfing របស់ក្រុមហ៊ុន BMW នៅក្នុងប្រទេសអាល្លឺម៉ង់។ ក្រុមហ៊ុន BMW បានធ្វើការវិនិយោគទឹកប្រាក់យ៉ាងច្រើនសម្រាប់រថយន្ត 8 Series ថ្មីនេះ។
ក្រុមហ៊ុន BMW បានបញ្ជាក់ថា “ក្រុមហ៊ុនបានប្រើប្រាស់នូវបច្ចេកវិទ្យាថ្មីជាច្រើន សម្រាប់បញ្ចូលនៅក្នុងដំណើរការនៃការផលិតនេះ ដែលរួមមានប្រព័ន្ធ Self-driving transport systems និង Smart Devices ផងដែរ។” សម្រាប់រថយន្ត 8 Series ក៏ត្រូវផលិតឡើងមកជាមួយនឹងស៊េរី 5 Series និង 7 Series ហើយនេះគឺជារថយន្តដំបូងបំផុតរបស់ក្រុមហ៊ុន BMW ដែលមានដំបូលផលិតឡើងពី Carbon Fiber។
លោក Dr. Andreas Wendt ដែលជាប្រធានរោងចក្រ BMW Group Plant Dingolfing បាននិយាយថា “នៅក្នុងនាមជារោងចក្រមួយ ដែលធ្វើការផលិតនូវរថ យន្ត BMW 7 Series sedans រោងចក្រ BMW Group Plant Dingolfing មានបទពិសោធន៍យ៉ាងពូកែ នៅក្នុងការផលិតទៅលើរថយន្តប្រណិតៗជាច្រើន។ ពេលនេះ យើងបានរៀបចំធ្វើការផលិតទៅលើរថយន្តស៊េរីថ្មី BMW 8 Series Coupe។ លោកមានការជឿជាក់ថា អតិថិជន ជាច្រើនរបស់យើងនៅលើពិភពលោកនឹងស្រឡាញ់រថយន្ត Sports ដ៏ប្រណិតនេះជាក់ជាមិនខាន។”
គួរបញ្ជាក់ថា រថយន្តស៊េរីថ្មី 8 Series Coupe គឺជាម៉ូដែលតែមួយគត់ ដែលធ្វើការផលិតនៅក្នុងរោងចក្រនេះ នៅពេលនេះ។ សម្រាប់លក្ខណៈពិសេសនៃ M850i xDrive គឺមានការបង្ហាញនៅក្នុងរូបភាពជាច្រើន នៃការផលិតនៅក្នុងរោងចក្រនេះ ជាមួយនឹងការប្រើប្រាស់នូវម៉ាស៊ីន 4.4-liter twin-turbo V8 ដែលមានកម្លាំង 523 សេះ និងកម្លាំងរមួលដល់ទៅ 553 lb-ft ហើយវានឹងដាក់លក់នៅក្នុងខែវិច្ឆិកាខាងមុខនេះ។ រថយន្ត 8 Series Convertible និងរថយន្ត 8 Series Gran Coupe ក៏ចាប់ផ្តើមធ្វើការផលិតជាមួយគ្នាផងដែរ៕