នៅពេលនេះ ក្រុមហ៊ុនផលិតរថយន្តជាច្រើននឹងប្រើប្រាស់នូវឱកាសផ្សេងៗគ្នាក្នុងការចាប់ផ្តើមយុទ្ធនាការផ្សព្វផ្សាយទៅលើស្ពតពាណិជ្ជកម្មនៃរថយន្តស្ព័រប្រណិតរបស់ខ្លួនទៅកាន់អតិថិជនជាច្រើននៅជុំវិញពិភពលោក។ ក្រុមហ៊ុន KIA គឺជាក្រុមហ៊ុនបន្ទាប់ដែលបង្ហាញអំពីគម្រោងជាច្រើនរបស់ពួកគេជាមួយនឹងស្ពតពាណិជ្ជកម្មថ្មីដែលមានរយៈពេល 60 វិនាទីសម្រាប់រថយន្តស៊េរីថ្មី 2021 Seltos SUV ហើយរថយន្តនេះគឺបើកបរដោយតារាល្បីឈ្មោះ Josh Jacobs។
នៅក្នុងវីដេអូនេះ គឺផ្តោតទៅលើការជំនះនូវភាពលំបាក និងការសម្រេចបាននូវក្តីសុបិន្តដែលមិនគួរអោយជឿចាប់តាំងពីលោក Jacobs ជួបជាមួយនឹងជីវិតដែលគ្មានផ្ទះសម្បែងតាំងពីកុមារភាពមុនពេលដែលសម្រេចបាននូវជោគជ័យធំធេងបំផុតនោះ។
ជាមួយនឹងចំណងជើងថា "Tough Never Quits" គឺជាសារមួយដែលមានការជម្រុញទឹកចិត្តខ្ពស់មែនទែនហើយគេឃើញលោក Jacobs បើកបរនូវរថយន្ត Kia Seltos នៅក្នុងរដ្ឋ Oklahoma ដែលជាទីកន្លែងកំណើតរបស់គាត់ ហើយវាក៏បង្ហាញនូវការលំបាកៗជាច្រើនដែលអ្នកបានឆ្លងកាត់ថែមទៀត។ លោក Oklahoma Jacobs ប្រាប់ខ្លួនឯងកាលពីក្មេងថា “ត្រូវជម្រុញខ្លួនអ្នកអោយក្លាយជាអ្នកណាម្នាក់ ហើយខ្ញុំសន្យាថាថ្ងៃណាមួយអ្នកនឹងអាចធ្វើបាន។” សាច់រឿងរបស់លោក Jacobs នេះគឺបានជម្រុញក្រុមហ៊ុន KIA ក្នុងការបង្កើតនូវមូលនិធិសប្បុរសធម៌ Yards Against Homelessness ដែលមានន័យថា ការប្រឆាំងទៅនឹងភាពគ្មានផ្ទះសម្បែងថែមទៀតផង។
នៅក្នុងយុទ្ធនាការមួយទៀតរបស់ក្រុមហ៊ុននេះគឺ Give It Everything ក្រុមហ៊ុន KIA ក៏នឹងប្រើប្រាស់នូវគំនិតផ្តួចផ្តើមក្នុងការបរិច្ចាកទឹកប្រាក់ $1,000 នៅក្នុងកម្មវិធី Super Bowl ហើយក៏បែងចែកទៅកាន់ដៃគូសប្បុរសធម៌ចំនួន ៣ របស់ខ្លួនគឺ Covenant House, Positive Tomorrows និង StandUp for kids ។ លោក Russell Wager ប្រធានផ្នែកទីផ្សាររបស់ក្រុមហ៊ុន Kia Motorsនៅអាមេរិកនិយាយថា យើងនៅក្នុងក្រុមហ៊ុន KIA សូមកោតសរសើរទៅលើការតាំងចិត្ត និងភាពអត់ធ្មត់របស់លោក Josh។
លោក Russell ក៏បាននិយាយថា សម្រាប់រថយន្តស៊េរីថ្មិ Seltos នេះ គឺពិតជាខ្លាំងក្លាមែនទែន ហើយសម្រាប់គំនិតនៅពីក្រោយស្ពតពាណិជ្ជកម្ម 'Tough Never Quits'នេះគឺពិតជាល្អឥតខ្ចោះសម្រាប់ទាំងលោក Josh និងក្រុមហ៊ុន KIA ។ សម្រាប់រថយន្ត Seltos subcompact crossover នេះ នឹងធ្វើការប្រកួតប្រជែងជាមួយនឹងរថយន្ត Ford EcoSport និង Nissan Kicks ។ រថយន្តនេះ នឹងចាប់ផ្តើមជាមួយនឹងតម្លៃតែជាង $20,000 ប៉ុណ្ណោះ (តម្លៃក្រៅប្រទេស)៕
