នៅក្នុងរយៈពេលប៉ុន្មានខែចុងក្រោយនេះ មានក្រុមហ៊ុនផលិតរថយន្តជាច្រើន ត្រូវបានរំខានទៅលើអាជីវកម្មរបស់ខ្លួនដោយសារតែបញ្ហានៃការប៉ះពាល់ទៅលើការរៀបចំនូវព្រឹត្តិការណ៍របស់ខ្លួន និងការបង្ហាញនូវ Showrooms របស់ខ្លួនជាលក្ខណៈសុប្បនិម្មិត។ អតិថិជនជាច្រើននៅតែស្វែងរកនូវម៉ូឌែលពិសេសៗ និងបទពិសោធន៍ផ្ទាល់ទៅលើការប្រើប្រាស់ ដោយពួកគេគ្រប់គ្នាមិនចង់ខកបំណង។
ក្រុមហ៊ុន Porsche បានដឹងច្បាស់ពីរឿងនេះ ដោយបានបង្កើតនូវមជ្ឈមណ្ឌលបទពិសោធន៍ជាច្រើន( Experience Centers) របស់ក្រុមហ៊ុនខ្លួននៅទូទាំងពិភពលោកក៏ផ្តល់អោយអតិថិជននូវបទពិសោធន៍កាន់តែអស្ចារ្យជាមួយនឹងរថយន្តថ្មីៗរបស់ខ្លួនផងដែរ។ ក្រុមហ៊ុន Porsche បានដំណើរការនូវមជ្ឈមណ្ឌលរបស់ខ្លួននៅក្នុងទីក្រុងជាច្រើនដូចជា Leipzig, Silverstone, Atlanta, Le Mans, Los Angeles, Shanghai, Hockenheim ហើយថ្មីៗនេះ ខ្លួនក៏បានបើកនៅក្នុងទីក្រុងតូក្យូរបស់ជប៉ុនផងដែរ។
មជ្ឈមណ្ឌលបទពិសោធន៍ (Experience Center) ថ្មីនេះក៏មានផ្លូវ Off-Road Track សម្រាប់ការបើកបរនូវរថយន្ត SUVs ជាច្រើនផងដែរ។ អ្នកជំនាញបើកបរនៅទីនោះ នឹងរង់ចាំក្នុងការបង្រៀនអំពីទ្រឹស្តីក្នុងការបើកបរតាមលក្ខណៈបច្ចេកទេស ហើយវាក៏មានការបើកអនុវត្តន៍ជាក់ស្តែងផងដែរ។ វាមានការបើកបរចម្ងាយដល់ទៅ 2.1 គីឡូម៉ែត្រ។ ក្រុមហ៊ុន Porsche ពិតជារីករាយមែនទែនទៅលើគម្រោងមួយនេះ។
លោក Detlev von Platen ដែលជាសមាជិកនៃក្រុមប្រឹក្សាភិបាលរបស់ផ្នែកលក់ និងទីផ្សាររបស់ក្រុមហ៊ុន Porsche បាននិយាយថា “ក្រុមហ៊ុន Porsche គឺផ្តោតទៅលើការផ្តល់នូវបទពិសោធន៍សម្រាប់អ្នកប្រើប្រាស់ ហើយសម្រាប់មជ្ឈមណ្ឌលបទពិសោធន៍ Porsche Experience Centers របស់យើងគឺមិនអាចរកឃើញថាមាននៅកន្លែងណាផ្សេងទៀតនោះទេនៅក្នុងពិភពរថយន្តនេះ។” គួរបញ្ជាក់ផងដែរថា ទីផ្សាររបស់ជប៉ុនគឺពិតជាចាប់អារម្មណ៍ខ្លាំងទៅលើម៉ាកយីហោ Porsche។ សម្រាប់មជ្ឈមណ្ឌលបទពិសោធន៍ថ្មី Experience Center នេះនឹងបើកដំណើរការនៅក្នុងឆ្នាំ 2021 នេះ៕