ខណៈពេលនេះ ក្រុមហ៊ុនជាច្រើនខិតខំប្រឹងប្រែងទៅលើបច្ចេកវិទ្យាបើកបរដោយខ្លួនឯងអោយក្លាយជាការពិត។ យើងបានឃើញនូវការខិតខំប្រឹងប្រែងជាច្រើនរបស់ក្រុមហ៊ុនធំៗដូចជា Apple, Google, Uber និង Tesla ជាដើម។ វាមានការប្រកួតប្រជែងកាន់តែច្រើននិងការពិភាក្សាជាច្រើនទៀតដែលនិយាយអំពីបច្ចេកវិទ្យាថ្មីនេះផងដែរ។ សម្រាប់ពេលនេះ វាមានបញ្ហាមួយចំនួនទៀតមុនពេលដែលរឿងនេះក្លាយជាការពិតនោះ។ នៅពេលដែលនិយាយអំពីបច្ចេកវិទ្យានេះ ក្រុមហ៊ុន Tesla គឺជាក្រុមហ៊ុនបច្ចេកវិទ្យាឈានមុខគេដោយសារតែក្រុមហ៊ុននេះបញ្ចេញនូវរថយន្តបើកបរស្វ័យប្រវត្តិមួយចំនួនផងដែរនៅលើទីផ្សារ។
យ៉ាងណាមិញ សម្រាប់រថយន្តទាំងនេះ គឺនៅតែមានដែនកំណត់របស់វា វានៅមិនទាន់មានបំពាក់នូវមុខងារបើកបរស្វ័យប្រវត្តិទាំងស្រុងនោះទេ។ ពេលនេះ ក្រុមហ៊ុននេះចង់អោយមានមុខងារបើកបរស្វ័យប្រវត្តិពេញលេញ ហើយវាប្រហែលជាពឹងផ្អែកទៅលើក្រុមហ៊ុនSamsung ដើម្បីធ្វើអោយរឿងនេះក្លាយជាការពិតផងដែរ។ តាមការបញ្ជាក់នៅក្នុងរបាយការណ៍ជាច្រើននោះ ក្រុមហ៊ុន Tesla កំពុងតែធ្វើការអភិវឌ្ឍទៅលើ HW4 hardware ជំនាន់ថ្មីរបស់ខ្លួន។ វានឹងប្រើប្រាស់នៅលើរថយន្ត 4D FSD (Four-Dimensional Fully Autonomous Driving) ដែលជាកញ្ចប់បើកបរស្វ័យប្រវត្តិដែលស្ថិតនៅក្រោមការអភិវឌ្ឍផងដែរ។ ក្រុមហ៊ុនផលិតរថយន្តនេះ នឹងធ្វើការជាមួយនឹងក្រុមហ៊ុន Samsung ដើម្បីធ្វើការអភិវឌ្ឍទៅលើបន្ទះឈីប 5nm ថ្មីនេះ។
ក្រុមការងារអភិវឌ្ឍរបស់ក្រុមហ៊ុន Tesla បានធ្វើការយ៉ាងខ្លាំងនៅក្នុងការអភិវឌ្ឍទៅលើបច្ចេកវិទ្យាឆ្លាតវៃនេះ។ ក្រុមហ៊ុននេះនឹងផ្តល់នូវរថយន្តជាច្រើនដែលមានសមត្ថភាពក្នុងការបើកបរដោយស្វ័យប្រវត្តិផងដែរ។ តាមការបញ្ជាក់ចេញពី Media Asia E អោយដឹងថា ក្រុមហ៊ុន Samsung បច្ចុប្បន្ននេះ គឺធ្វើការនៅលើបន្ទះឈីប 5nm ផងដែរ។សម្រាប់ជំហានបន្ទាប់នៅក្នុងរយៈពេលជាច្រើនឆ្នាំទៀតខាងមុខនោះគឺការអភិវឌ្ឍទៅលើបន្ទះឈីប 3nm ដែលវានឹងក្លាយជាការពិតនៅឆ្នាំ 2023 នេះ។ បច្ចុប្បន្ននេះ ក្រុមហ៊ុន Samsung គឺផ្តល់នូវបន្ទះឈីប 14nm សម្រាប់ក្រុមហ៊ុន Tesla ។
ពេលនេះ ក្រុមហ៊ុនជាច្រើនក៏ពង្រីកនូវកិច្ចសហប្រតិបត្តិការរបស់ខ្លួនផងដែរ។ ប្រព័ន្ធ infotainment system នៅក្នុងរថយន្តនេះគឺប្រើប្រាស់នូវបន្ទះឈីបផ្សេងៗគ្នាដូចជា processors, neural network processors (NPU), security integrated circuits, memory និងdisplay drive ICs (DDI) ផងដែរ។ ក្រុមហ៊ុនបច្ចេកវិទ្យាSamsung ជឿជាក់ថា ខ្លួនមានសមត្ថភាពក្នុងការអភិវឌ្ឍទៅលើបន្ទះឈីប 5nm chips សម្រាប់រថយន្តជាច្រើនបាន។ ប្រសិនបើក្រុមហ៊ុននេះទទួលបានជោគជ័យនោះ ក្រុមហ៊ុននេះនឹងបន្តនូវកិច្ចព្រមព្រៀងក្នុងការផ្គត់ផ្គង់ជាមួយនឹងក្រុមហ៊ុន Tesla ៕