យោងតាមព័ត៌មានមួយដែលគេបង្ហោះនៅលើបណ្តាញសង្គមនៅក្នុងប្រទេសចិន បានបង្ហាញថា ក្រុមហ៊ុន Tesla បានដោះស្រាយទៅលើបញ្ហានៃការព្រួយបារម្ភទៅលើសុវត្ថិភាពនៅក្នុងប្រទេសចិន តាមរយៈការអះអាងថា កាមេរ៉ានៅលើរថយន្តអេឡិចត្រូនិចរបស់ខ្លួន គឺមិនដំនើរការនោះទេនៅក្នុងតំបន់មួយចំនួនដែលនៅស្ថិតក្រៅពីទីផ្សារអាមេរិកខាងជើង។
គួរបញ្ជាក់ថា ទីផ្សាររបស់ចិន គឺជាទីផ្សាររថយន្តធំបំផុតរបស់ពិភពលោក ហើយក្រុមហ៊ុនផលិតរថយន្តរបស់អាមេរិក ក៏ទទួលបាននូវភាពជោគជ័យយ៉ាងខ្លាំងនៅក្នុងប្រទេសនេះ ដោយសារតែរថយន្តអគ្គិសនីរបស់ខ្លួនផងដែរ។ ក្រុមហ៊ុននេះ បានប្រឈមមុខទៅនឹងបញ្ហានៃការព្រួយបារម្ភសុវត្ថិភាពនៅក្នុងប្រទេសនេះផងដែរ ខណៈពេលដែលកងកម្លាំងយោធា បានធ្វើការហាមប្រាមទៅលើរថយន្តជាច្រើនរបស់ Tesla ក្នុងការចូលទៅក្នុងបន្ទាយរបស់ខ្លួនដោយសារតែការព្រួយបារម្ភទៅលើបញ្ហាសុវត្ថិភាពដូចគ្នា។
នៅក្នុងការបង្ហោះនៅលើបណ្តាញសង្គមនោះ ក្រុមហ៊ុន Tesla បាននិយាយថា នៅក្នុងសហរដ្ឋអាមេរិក អ្នកប្រើប្រាស់រថយន្តនេះ អាចធ្វើការសម្រេចចិត្តក្នុងការបើក ឬបិទទៅលើមុខងារប្រព័ន្ធកាមេរ៉ានេះបាន។ សូមជំរាបថា ក្រុមហ៊ុន Tesla បានបំពាក់នូវប្រព័ន្ធ network security system កម្រិតសុវត្ថិភាពរបស់ពិភពលោក ដើម្បីធានាទៅលើការការពារសុវត្ថិភាពឯកជនភាព។ ការបង្ហោះនេះ ក៏មានការចែករំលែកនៅលើគណនី Weibo ផ្លូវការរបស់ក្រុមហ៊ុននេះ។
លោក Elon Musk ដែលជាស្ថាបនិក និង CEO របស់ក្រុមហ៊ុននេះ សង្កត់ធ្ងន់ខ្លាំងទៅលើការការពារឯកជនភាពនៃទិន្ន័យរបស់អ្នកប្រើប្រាស់។ គាត់បាននិយាយថា “វាពិតជាសំខាន់ណាស់ក្នុងការរក្សានូវការសម្ងាត់ជាមួយនឹងព័ត៌មាននោះ៕”