នៅក្នុងពេលថ្មីៗនេះ ការអភិវឌ្ឍន៍បច្ចេកវិទ្យាសម្រាប់ឧស្សាហកម្មយានយន្ត គឺមានការពេញនិយមខ្លាំងមែនទែនតាមរយៈនៃការផ្លាស់ប្តូរទៅកាន់ការប្រើប្រាស់រថយន្តបើកបរដោយស្វ័យប្រវត្តិ និងទីផ្សាររថយន្តអគ្គិសនី។ ជាក់ស្តែងថ្មីៗនេះ ក្រុមហ៊ុនបច្ចេកវិទ្យាយក្សរបស់ចិន Xiaomi ក៏បានប្រកាសអំពីផែនការរបស់ខ្លួនក្នុងការផលិតរថយន្តអគ្គិសនីផងដែរ។ នៅថ្ងៃនេះ យោងតាមការចេញផ្សាយរបស់សារព័ត៌មានថ្មីៗជាច្រើន បានបញ្ជាក់ថា មានក្រុមហ៊ុនមួយទៀតរបស់ចិន DJI នឹងក្លាយជាអ្នកបង្កើតទៅលើយន្តហោះ Drone ហើយក៏ឆ្ពោះទៅកាន់ឧស្សាហកម្មយានយន្តផងដែរ។
នៅក្នុងការបង្ហោះនៅលើគណនី WeChat របស់ DJI Automotive បានទម្លាយថា ក្រុមហ៊ុននេះ នឹងបង្ហាញនូវផលិតផលជាច្រើនដែលមានការពាក់ព័ន្ធទៅនឹងរថយន្តនៅក្នុងព្រឹត្តិការណ៍ Shanghai Auto Show ដែលនឹងធ្វើឡើងចាប់ពីថ្ងៃទី 19 ខែមេសាដល់ថ្ងៃទី 28 ខែមេសានេះ។ ការប្រកាសនេះ មិនមានការបញ្ជាក់ថា ផលិតផលណាមួយដែលនឹងប្រកាសនោះទេ ប៉ុន្តែវានឹងមានផលិតផលជាច្រើនដែលនឹងប្រើប្រាស់នៅក្នុងឧស្សាហកម្មរថយន្តនេះ។
សម្រាប់ពេលនេះ ក្រុមហ៊ុន DJI នៅមិនទាន់បង្កើតនូវផលិតផលសម្រាប់រថយន្តនោះទេ ប៉ុន្តែកាលពីពេលមុននេះ ក្រុមហ៊ុននេះ បានបង្ហើបថា ខ្លួនមានគម្រោងក្នុងការផ្តោតទៅលើប្រព័ន្ធបើកបរឆ្លាតវៃរួមជាមួយនឹងដំណោះស្រាយទៅលើផ្នែក Software និង Hardware ដើម្បីជួយក្រុមហ៊ុនផលិតរថយន្តជាច្រើនក្នុងការបង្កើតនូវរថយន្តឆ្លាតវៃជាច្រើនដែលមានតម្លៃសមរម្យបំផុតក្នុងការប្រើប្រាស់៕
