យោងតាមដំណឹងដែលចេញផ្សាយកាលពីពេលថ្មីៗនេះ បានបញ្ជាក់ថា នៅពេលនេះ ក្រុមហ៊ុនផលិតរថយន្តរបស់អាល្លឺម៉ង់ Mercedes បានត្រៀមប្រឡូកចូលទៅក្នុងទីផ្សាររថយន្តអគ្គិសនីហើយ តាមរយៈការប្រកាសបង្ហាញនូវ Mercedes-Benz EQS ដែលជារថយន្តជំនាន់ថ្មីឆ្នាំ 2022 របស់ខ្លួន។
នៅក្នុងព្រឹត្តិការណ៍ ដែលបានធ្វើឡើងនៅថ្ងៃព្រហស្បិ៍កន្លងទៅនេះ រថយន្ត Mercedes EV នេះ ត្រូវបានគេបង្ហាញចេញនូវមុខងារជាច្រើនដ៏អស្ចារ្យដែលអាចប្រកួតប្រជែងបានជាមួយនឹងក្រុមហ៊ុនជាច្រើនដូចជា Tesla ដែលមានវត្តមាននៅលើទីផ្សារថែមទៀត។
ការឌីស្សាញរូបរាងរបស់រថយន្ត Mercedes-Benz EQS នេះ គឺពិតជាស្រស់ស្អាត និងទាក់ទាញខ្លាំងមែនទែន ហើយនិងមានបច្ចេកវិទ្យាប្រណិតៗជាច្រើនថែមទៀតផង។ ក្រុមហ៊ុន Mercedes-Benz មានក្តីសង្ឃឹមនៅក្នុងការឌីស្សាញរូបរាងថ្មីសម្រាប់រថយន្តអេឡិចត្រូនិចប្រណិតប្រភេទ Sedans របស់ខ្លួនតាមរយៈវត្តមានរបស់រថយន្ត EQS ដែលបំពាក់នូវមុខងារប្រណិតៗជាច្រើនដែលធ្លាប់បានប្រើប្រាស់នៅលើរថយន្តអេឡិចត្រូនិចជាច្រើនរបស់ក្រុមហ៊ុន Tesla។
សូមជំរាបថា វត្តមានរបស់រថយន្ត Mercedes-Benz EQS 2022 នេះ គឺនឹងបង្ហាញខ្លួននៅក្នុងរដូវស្លឹកឈើជ្រុះនៅក្នុងសហរដ្ឋអាមេរិកនៅឆ្នាំក្រោយនេះ។ រថយន្ត Mercedes-Benz EQS 2022 នេះ នឹងក្លាយជាផ្នែកមួយនៃគ្រួសាររបស់រថយន្ត S-Class ថែមទៀតផង។
លោក Ola Kaellenius ដែលជានាយកប្រតិបត្តិរបស់ក្រុមហ៊ុន Mercedes-Benz បាននិយាយថា រថយន្ត EQS ត្រូវបានឌីស្សាញឡើងដើម្បីបំពេញនូវតម្រូវការជាច្រើនសម្រាប់អ្នកប្រើប្រាស់ ហើយវាបំពាក់នូវសមត្ថភាពដ៏ប្រណិតៗជាច្រើន។ សម្រាប់ផ្នែកខាងក្នុងរបស់រថយន្ត EQS ឆ្នាំ 2022 នេះ គឺមានការឌីស្សាញយ៉ាងប្រណិតដូចជាយាន្តអវកាស ហើយនិងមានអេក្រង់ជាច្រើនសម្រាប់ការកម្សាន្ត និងប្រតិបត្តិថែមទៀតផង។
រថយន្តអគ្គិសនី Mercedes-Benz EQS ជំនាន់ថ្មីឆ្នាំ 2022 នេះអាចនឹងមានតម្លៃច្រើនជាង $100,000 ។ តាមរយៈអ្នកឃ្លាំមើលជាច្រើននោះ រថយន្ត EQS នេះ គឺមានតម្លៃខ្ពស់ខ្លាំងជាងរថយន្ត Mercedes-Benz S-Class ហើយវាក៏ថ្លៃជាងរថយន្ត Model S របស់ Tesla ថែមទៀតផង៕